EDWƐKƐ TITILE | DEƐMƆTI YƐDI NƆHALƐ LA

Kɛzi Adalɛbɔlɛ Ka Wɔ La

“Mekɛ biala mɔɔ yɛ nwo kɛhyele yɛ la yɛkola yɛbɔ adalɛ ekyi yɛdie yɛ nwo.”—Samantha, South Africa.

Ɛdie edwɛkɛ ɛhye ɛto nu ɔ? Kɛ mɔɔ Samantha hanle la, yɛ muala yɛyia tɛnlabelɛ mɔɔ anu yɛ se ɔvi mekɛ mɔɔ ɔkɔ mekɛ la. Kɛzi yɛyɛ yɛ nyɛleɛ wɔ tɛnlabelɛ mɔɔ sɔ yɛ nea kɛ yɛbɔ adalɛ la maa bɛnwu ngyinlazo mɔɔ yɛdie yɛto nu la. Kɛ neazo la, saa yɛsulo anyiemgbabɔlɛ a, bie a yɛbabu adalɛbɔlɛ kɛ ɔle adenle kpalɛ mɔɔ yɛdua zo yɛdwu yɛ bodane bie anwo. Noko akee, saa nɔhalɛ ne da ali a, mɔɔ vi nu ba la ta yɛ ngyegyelɛ dɔɔnwo. Suzu ɛhye mɔ anwo.

ADALƐBƆLƐ ƐMMAA BƐNLIE AWIE BƐNLI

Yɛdie awie yɛdi a yɛɛ yɛfa ye agɔnwolɛ a. Saa menli nwiɔ die bɛ nwo di a, bɛte nganeɛ kɛ bɛ nwo tɔ bɛ yɛɛ bɛlɛ banebɔlɛ. Noko sonla nu anwodozo ɛmba kenle ko. Saa agɔnwolɛma fi nɔhalɛlilɛ nu di adwelie na bɛanyɛ angomedi a, ɔmaa bɛdie bɛ nwo bɛdi. Noko, adalɛbɔlɛ kokye kola sɛkye anwodozo mɔɔ yɛlɛ ye wɔ awie anu la. Anwodozo mɔɔ yɛlɛ ye wɔ awie anu la sɛkye a, ɔyɛ se kɛ yɛbanyia ye bieko.

Asoo awie mɔɔ ɛdie ye ɛdi kɛ ɔle ɛ gɔnwo kpalɛ la ɛbɛlɛbɛla wɔ ɛlɛ ɔ? Saa ɔle zɔ a, kɛzi ɛdele nganeɛ ɛ? Bie a, ɔgyegyele wɔ na ɛdele nganeɛ kɛ yeye wɔ yemaa. Ndelebɛbo wɔ nu. Kpolerazulɛ biala ɛnle nwolɛ kɛ adalɛbɔlɛ kola sɛkye agɔnwolɛvalɛ kpalɛ.

ADALƐBƆLƐ LE KƐ EWULENZANE

Neɛnleanu bie maanle abɔlɔba Robert Innes mɔɔ kile debie wɔ Yunivɛsiti mɔɔ wɔ California la nwunle kɛ “mɛlɛbɛla le kɛ ewulenzane la.” Yemɔti yɛbahola yɛava mɛlɛbɛla yɛatoto ewule ngɛkɛba nwo—saa ɛfa awie mɔɔ bɔ adalɛ la agɔnwolɛ kyengye a, ɔbamaa ɛdawɔ noko “wɔabɔ” adalɛ.

Kɛ ɔkɛyɛ na wɔahoati adalɛbɔlɛ ɛ? Baebolo ne bahola aboa wɔ. Yɛsɛlɛ wɔ suzu Baebolo ngyinlazo ekyi bie anwo.

Ninyɛne Mɔɔ Ɛngile Nɔhalɛlilɛ La

Adalɛbɔlɛ

ƆKILE DUZU? Edwɛkɛ mɔɔ ɔnle nɔhalɛ mɔɔ yɛka yɛkile awie mɔɔ ɔwɔ kɛ ɔnwu nɔhalɛ ne la. Adalɛbɔlɛ bahola ahile edwɛkɛ mɔɔ ɛkakyi ɔ nye, ɛye bie wɔavi nu anzɛɛ ɛwudu nɔhalɛ edwɛkɛ nu amaa wɔabɛlɛbɛla awie la.

MƆƆ BAEBOLO NE KA LA: “[Gyihova] kyi sonla mɔɔ ɛnli boɛ [“ɛnli nɔhalɛ,” NW] la, na ɔmaa mɔɔ di boɛ la nwu ye ngyehyɛlɛ ne.” (Mrɛlɛbulɛ 3:32) “Bɛmmabɔ adalɛ bieko; awie biala ɛha nɔhalɛ ɛhile ɔ gɔnwo.”—Ɛfɛsɛsema 4:25.

Ɛsokpalɛ

ƆKILE DUZU? Ɛka awie anwo edwɛkɛ mɔɔ ɛnle kpalɛ la wɔava wɔazɛkye ye duma.

MƆƆ BAEBOLO NE KA LA: “Sonla mɔɔ ɛnlɛ adwenle kpalɛ la twehwe konle, yɛɛ azukuedulɛ [dumazɛkyelɛ] kpakye agɔnwolɛma avinli.” (Mrɛlɛbulɛ 16:28) “Ɛyɛne ɛnle senle nu a ɔnu, yɛɛ ɛleka mɔɔ azukuedulɛ [dumazɛkyelɛ] ɛnle la, butule ɛnle ɛkɛ.”—Mrɛlɛbulɛ 26:20.

Nzisi

ƆKILE DUZU? Ɛdua mɛlɛbɛla adenle zo wɔalie awie ezukoa anzɛɛ agyapadeɛ mɔɔ ɔnle wɔ ɛdeɛ la.

MƆƆ BAEBOLO NE KA LA: “Saa bɛbɔ awie ɛkpa na ahenle le ehyianli a anrɛɛ bɛmmasisi ye.” (Mɛla ne 24:14, 15) “Mɔɔ sisi ehyianli la tindi ye Bɔvolɛ ne anyunlu, na mɔɔ nwu mɔɔ ɛhyia la anwunvɔne la di ye Bɔvolɛ ne eni.”—Mrɛlɛbulɛ 14:31.

Debie Ɛwualɛ

ƆKILE DUZU? Awie debie mɔɔ yɛmbiza na yɛava la.

MƆƆ BAEBOLO NE KA LA: “Mɔɔ le awule la ɛgyakyi ye awule ne na ɔyɛ gyima, amaa yeanyia bie yeanlea ɔ nwo na eza yeanyia bie yeaboa bɛdabɛ mɔɔ bɛhyia la.” (Ɛfɛsɛsema 4:28) “Bɛmmabɛlɛbɛla bɛ nwo; . . . Bɛdabɛ mɔɔ bɛle nwule, bɛle anyebolo, bɛdabɛ mɔɔ nza ɛgya bɛ, bɛdabɛ mɔɔ bɛ nloa ɛdendɛlɛ ɛnyɛ fɛ nee bɛdabɛ mɔɔ bɛle ahɔdiawu la, biala ɛnrɛnyia Nyamenle Belemgbunlililɛ ne.”—1 Kɔlentema 6:9, 10.