EDWƐKƐ TITILE | ƐBAHOLA WƆABIKYE NYAMENLE
Ɛbɛlabɔlɛ Biala Ɛndɛla Ɛhye
Kɛ ɔkɛyɛ na wɔabikye Nyamenle ɛ? Yɛzuzu ninyɛne ɛhye mɔ mɔɔ ɛyɛ a ɛbahola wɔayɛ ɔ gɔnwo kpalɛ la anwo:
Nwu Nyamenle duma Gyihova ne, na bɔ.
Dua asɔneyɛlɛ nee ye Edwɛkɛ, Baebolo ne ɛzukoalɛ zo tendɛ kile ye dahuu.
Bɔ mɔdenle yɛ mɔɔ sɔ Gyihova anye la.
Dua ninyɛne ɛhye mɔ azo bikye Nyamenle bɔ ye duma, yɛ asɔne, sukoa ye Edwɛkɛ ne, na yɛ mɔɔ sɔ ɔ nye la
Kɛmɔ wɔnwu ninyɛne nsa ɛhye mɔ la, asoo ɛbahola wɔaha kɛ ɛlɛyɛ mɔɔ hyia la na wɔabikye Nyamenle ɔ? Ɛleka wɔ ɛkɛ mɔɔ ɛnea a ɛbahola wɔayɛ dɔɔnwo ɔ? Nɔhalɛ nu, ɔhyia mɔdenlebɔlɛ noko suzu mɔɔ bavi nu ara la anwo nea.
Jennifer mɔɔ wɔ United States la ka kɛ: “Nvasoɛ wɔ mɔdenle biala mɔɔ yɛbɔ kɛ yɛ nee Nyamenle bayɛ agɔnwolɛ la azo. Agɔnwolɛvalɛ ɛhye maa yɛnyia nyilalɛ dɔɔnwo: yɛnyia Nyamenle anu diedi, yɛte ye subane ne abo kpalɛ, akee mɔɔ tɛla biala la, yɛnyia ɛlɔlɛ kpole yɛmaa ye. Ɛbɛlabɔlɛ biala ɛndɛla ɛhye!”
Saa ɛkulo kɛ ɛ nee Nyamenle yɛ agɔnwolɛ kpalɛ a, Gyihova Alasevolɛ bahola aboa wɔ. Bɛbayɛ ngyehyɛleɛ bɛ nee wɔ azukoa Baebolo ne mɔɔ ɛndua ɛhwee a. Ɛbahola noko wɔahɔ bɛ Belemgbunlililɛ Asalo ɛkɛ na wɔadie Baebolo ne mɔɔ bɛsukoa la bie, ɛkɔ ɛkɛ a, ɛbanwu menli mɔɔ bɛ nee Nyamenle agɔnwolɛvalɛ ne sonle bolɛ maa bɛ la.a Mekɛ mɔɔ ɛlɛyɛ zɔ la, ɛbade nganeɛ kɛ edwɛndolɛnli ne la, ɔhanle kɛ: “Na mame, ɔle kpalɛ kɛ menwɔbikye Nyamenle.”—Edwɛndolɛ 73:28.
a Saa ɛkpondɛ kɛ ɛbiza Baebolo ɛzukoalɛ anzɛɛ ɛnwu Belemgbunlililɛ Asalo mɔɔ bikye wɔ la a, ka kile ahenle mɔɔ vale magazine ɛhye manle wɔ la anzɛɛ kɔ yɛ Intanɛte gyimalilɛleka ne, www.jw.org/nzi, na nea Ɛ NEE YƐ ƐLI NGITANWO wɔ ɔ bo ɛkɛ ne.