Ɛyɛ Mɔɔ Nyamenle Kulo La Ɔ?

“Wɔmɔ ka debie biala mɔɔ ɛkulo la, na mebayɛ meamaa wɔ.” Ɔbayɛ se kɛ ɛbaha edwɛkɛ ɛhye wɔahile awie mɔɔ ɛnze ye fee anzɛɛ manivolɛ bie. Noko akee, ɔnrɛyɛ se kɛ ɛbaha ɛhye wɔahile ɛ gɔnwo kpalɛ bie. Agɔnwolɛma kpalɛ yɛ mɔɔ bɛ gɔnwo mɔ kulo la maa bɛ.

Baebolo ne kile kɛ dahuu Gyihova yɛ mɔɔ bamaa ye azonvolɛ anye alie la maa bɛ. Kɛ neazo la, Belemgbunli Devidi mɔɔ ɛnee le Nyamenle agɔnwo kpalɛ la hanle kɛ: ‘O Gyihova me Nyamenle, wɔmaa wɔ adwenle, nee wɔ nwanwane nyɛleɛ wɔ yɛ nwo ɛyɛ mɔnwo. Saa meka nwolɛ edwɛkɛ a, anrɛɛ bɛzonle somaa mɔɔ bɛngola bɛ tia a.’ (Edwɛndolɛ 40:5) Mɔɔ tɛla ɛhye la, Gyihova yɛ debie kpalɛ maa menli bɔbɔ mɔɔ bɛnze ye la, “ɔmaa bɛ aleɛ na ɔmaa bɛ nye die.”​—Gyima ne 14:17.

Kɛmɔ Gyihova anye die kɛ ɔbayɛ ninyɛne mɔɔ maa menli nye die la ati, ndelebɛbo wɔ nu kɛ menli mɔɔ kulo kɛ yɛ Nyamenle agɔnwo la yɛ ninyɛne mɔɔ bamaa ɔ ‘nye alie’ la. (Mrɛlɛbulɛ 27:11) Noko duzu a ɛyɛ a ɔbazɔ Nyamenle anye a? Baebolo ne bua kɛ: “Bɛmmamaa bɛ rɛle fi kɛ bɛkɛyɛ kpalɛ na bɛkɛboa bɛ nwo ngoko ngoko, ɔboalekɛ ɛhye a le [afɔlebɔlɛ] mɔɔ sɔ Nyamenle anye a.” (Hibuluma 13:16) Asoo ɛhye kile kɛ yɛyɛ kpalɛ na yɛboa awie mɔ a, yemɔ ala bamaa yɛazɔ Gyihova anye ɔ?

Baebolo ne ka kɛ: “Ɔyɛ se kɛ awie mɔɔ ɛnlɛ diedi la kɛhola kɛzɔ Nyamenle anye.” (Hibuluma 11:6) Ɔhyia kɛ yɛnwu ye kɛ ‘Ebileham liele Nyamenle lile na ɔlua zo bɛvɛlɛle Ebileham Nyamenle agɔnwo.’ (Gyemise 2:23) Gyisɛse Kelaese noko zile zolɛ kɛ saa yɛkulo kɛ Nyamenle yila yɛ dahuu a, ɔwɔ kɛ ‘yɛdie Nyamenle yɛdi.’ (Dwɔn 14:1) Ɛhye ati, kɛ ɔkɛyɛ na wɔanyia diedi ne mɔɔ Nyamenle kpondɛ kɛ menli mɔɔ ɔmaa bɛbikye ye nyia la bie ɛ? Ɛbahola wɔabɔ ɔ bo wɔazukoa Nyamenle Edwɛkɛ, Baebolo ne. Saa ɛyɛ zɔ a, ɛbanyia ye ‘ɛhulolɛdeɛ ne anwo nɔhalɛ ndelebɛbo’ na wɔanwu kɛzi ‘ɛbayɛ mɔɔ ɔkulo la.’ Akee mekɛ mɔɔ ɛlɛnyia Gyihova anwo nɔhalɛ ndelebɛbo kpole na ɛlɛfa ye tenlene ngyinlazo ne mɔ wɔabɔ wɔ ɛbɛla la, ɛbanyia diedi kpole wɔ ye nu na wɔabikye ye kpalɛ.​—Kɔlɔsaema 1:9, 10.