BAEBOLO KPUYIA MƆƆ BƐBUA
Duzu a Gyisɛse bayɛ ye kenlebie a?
Wɔ ɛvolɛ 33 Y.M., Gyisɛse wule, ɔdwazole ɔvile ewule nu, na ɔhɔle anwuma. Mekɛ bie anzi, bɛmanle Gyisɛse tumi kɛ ɔli Belemgbunli. (Daneɛle 7:13, 14) Kenlebie, Gyisɛse bayɛ ye gyima kɛ Belemgbunli la yeamaa anzondwolɛ ara na yeaye ehyia yeavi ɛkɛ.—Kenga Edwɛndolɛ 72:7, 8, 13.
Kɛmɔ Gyisɛse le Belemgbunli la ati, ɔbaye ninyɛndane yeavi azɛlɛ ye azo
Gyisɛse bayɛ nwanwane ninyɛne dɔɔnwo kɛ alesama Tumivolɛ. Ɔbava tumi ne mɔɔ Selɛ ne ɛva ɛmaa ye la yeali gyima na yeamaa alesama ali munli bieko. Bɛbadɛnla azɛlɛ ye azo mɔɔ bɛnrɛyɛ mgbanyinli na bɛawu a.—Kenga Dwɔn 5:26-29; 1 Kɔlentema 15:25, 26.
Duzu a Gyisɛse ɛlɛyɛ ye ɛnɛ a?
Gyisɛse ɛlɛkile ye nɔhalɛ ɛdoavolɛma adenle yeamaa bayɛ ewiade amuala edwɛkɛhanlɛ gyima ne. Bɛkɔ menli ɛkɛ na bɛkile bɛ mɔɔ Baebolo ne ka wɔ Nyamenle Belemgbunlililɛ ne anwo la. Gyisɛse hanle kɛ ɔbahɔ zo yeaboa ye ɛdoavolɛma wɔ gyima ne anwo kɔkpula kɛ Nyamenle Belemgbunlililɛ ne bazɛkye sonla tumililɛ la.—Kenga Mateyu 24:14; 28:19, 20.
Ɔlua nɔhalɛ Keleseɛne asafo ne azo, Gyisɛse ɛlɛkile menli ɛbɛlabɔlɛ adenle kpalɛ. Ɔbahɔ zo yeahile bɛ adenle wɔ ewiade ɛtane ɛhye ɛzɛkyelɛ ne anu yeahɔdwu ewiade fofolɛ ne mɔɔ Nyamenle ɛbɔ nwolɛ ɛwɔkɛ la anu.—Kenga 2 Pita 3:7, 13; Yekile 7:17.