Thomas Emlyn Munzuvo Anzɛɛ Ɔgyinlanle Nɔhalɛ Ne Anzi Ɔ?

THOMAS Emlyn a le nwane, na duzu a hanle ye manle ɔgyinlanle nɔhalɛ ne anzi a? Duzu a yɛbahola yɛzukoa yɛavi ye ɛkɛ mɔɔ baboa yɛ ɛnɛ a?

Amaa yɛabua kpuyia ɛhye mɔ la, ɔwɔ kɛ yɛsia yɛkɔ ɛvoya 17 nee 18 ne mɔlebɛbo wɔ England nee Ireland. Ɛnee Angelekan Asɔne ne lɛ tumi kpalɛ. Protestantma ekpunli ngakyile nee awie mɔ nee asɔne ne anyɛ adwenle.

YEMƆ A LE NWANE?

Mekɛ mɔɔ ninyɛne ɛhye mɔ ɛlɛkɔ zolɛ la a bɛwole Thomas Emlyn a, wɔ May 27, 1663, wɔ Stamford, Lincolnshire mɔɔ wɔ England la. Ɔlile ɛvolɛ 19 la, ɔmanle ye ɛdendɛlɛ mɔɔ lumua la. Nzinlii, ɔyɛle ɛsɔfo ɔmanle dehelɛ bie kunlavolɛ mɔɔ ɛnee wɔ London la; noko nzinlii, ɔhɔle Belfast mɔɔ wɔ Ireland la.

Ɔnleanle asɔne bie azo wɔ Belfast. Mekɛ ɛlɛkɔ la, Emlyn zonlenle kɛ sonvolɛ wɔ ɛleka dɔɔnwo, mɔɔ bie a le Dublin la.

KƐMƆTI A BƐBULE YE KƐ YEBƆ MUNZULE Ɛ?

Wɔ zɔhane mekɛ ne anu, ɛnee Emlyn ɛlɛsukoa Baebolo ne kpalɛ. Ye debiezukoalɛ ne manle ɔzule Nsa-Ko ne anwo kpolera, ɔnva nwo kɛ dɛba ne ɛnee ɔdie ɔdi la. Mekɛ mɔɔ ɔyɛle neɛnleanu wɔ edwɛkpa ne anu la, ɔnwunle kɛ ɔdi ɔboa ndelebɛbo fofolɛ mɔɔ yenyia la.

Emlyn anga mɔɔ ɔnwunle ye la anwo edwɛkɛ ɛkɛ ne ala. Noko akee, menli mɔɔ wɔ Dublin asɔne ne anu la nwunle kɛ ɔlɛtendɛ a ɔnga Nsa-Ko ne anwo edwɛkɛ. Kɛmɔ ɛnee ɔze kɛ menli ɛnrɛlie ye edwɛkɛ ne ɛnrɛdo nu la ati, ɔhɛlɛle kɛ: “Menrɛhola menrɛdoa gyima mɔɔ melɛyɛ ye kɛkala wɔ ɛke la azo, kɛmɔ ɛnee medwenle kɛ mebayɛ la.” Wɔ June 1702, ɔ gɔnwo mɔ nwiɔ bizale ye deɛmɔti ɔlɛtendɛ a ɔnga Nsa-Ko ne anwo edwɛkɛ la. Emlyn hanle hilele bɛ kɛ ɔnlie ɔnli kɛ ɔle zɔ bieko na ɔhanle kɛ ɔgyakyi asɔne ne.

Mekɛ ekyi anzi, ɔvile Dublin mɔɔ wɔ Ireland la, na ɔhɔle England. Noko, dapɛne bulu anzi, ɔziale ɔrale Dublin kɛ ɔsiezie edwɛkɛ bie na yeazia yeahɔ London bɔkɔɔ. Mekɛ mɔɔ ɔhɔle ɛkɛ ne la, ɛnee ɔkulo kɛ ɔmaa bɛnwu nɔhalɛ mɔɔ wɔ ye edwɛkɛ ne anu la, ɔyɛle buluku mɔɔ bɛfɛlɛ ye kɛ An Humble Inquiry Into the Scripture-Account of Jesus Christ. Wɔ buluku ɛhye anu, ɔgyinlanle Ngɛlɛlera ne azo ɔhilele deɛmɔti Gyisɛse ɛnrɛhola ɛnrɛyɛ Nyamenle Bedevinli ne la anu wienyi. Ɛhye hanle menli mɔɔ wɔ Emlyn asɔne dɛba ne anu wɔ Dublin la ɛya. Bɛsɛmanle ye wɔ nwolɛ.

Bɛhyele Emlyn na bɛ nee ye hɔle Queen’s Bench Court ne mɔɔ wɔ Dublin la anu wɔ June 14, 1703. Wɔ ye True Narrative of the Proceedings mɔɔ ɔhɛlɛle la anu, Emlyn hanle kɛ bɛbɔ ye somolɛ kɛ “yehɛlɛ na yeyɛ buluku mɔɔ nuhua edwɛkɛ ne se yebɔ munzule na yeha edwɛkɛ ɛtane mɔɔ le kɛ Gyisɛse Kelaese nee Nyamenle Selɛ ne ɛnzɛ la.” Bɛanli edwɛkɛ ne boɛ. Ireland Asɔne ne anu ɛsɔfo mgbanyima nsuu dɛnlanle ndɛnebuavolɛma ne anwo ɛkɛ. Bɛammaa Emlyn angilehile ye edwɛkɛ nu. Richard Levins, lɔya mɔɔ ɛlie duma la, hanle hilele Emlyn kɛ bɛbahu ye “kɛ bɛdi la na bɛnrɛmaa ɔnrɛnyia adenle ɔnrɛlie ɔ nwo.” Bɛwiele edwɛkɛ ne di la, Ndɛnebuavolɛ Richard Pyne, Ireland Ndɛnebualɛ Kpanyinli ne hanle hilele edwɛkɛlilɛma ne kɛ saa bɛambua edwɛkɛ ne kɛmɔ bɛkpondɛ la a, yɛ “awulae nee ɛsɔfo ne mɔ anye dua bɛ,” kile kɛ bɛbahwe edwɛkɛlilɛma ne anzo.

Bɛbuale Emlyn fɔlɛ na lɔya kpanyinli ne hanle hilele ye kɛ ɔhwe edwɛkɛ ne ɔzia. Emlyn amkponle. Bɛbɔle ye kakɛ na bɛdole ye efiade ɛvolɛ ko. Kɛmɔ yeangola kakɛ ne tua la ati, ɔlale efiade ɛvolɛ nwiɔ kɔkpula kɛ ɔ gɔnwo bie hanle hilele mgbanyima ne mɔ manle bɛdele kakɛ ne azo la. Bɛyele Emlyn wɔ July 21, 1705. Anyiemgba mɔɔ ɔbɔle la hanle ye manle ɔhanle edwɛkɛ mɔɔ yɛlumua yɛha la kɛ: “Menwu mɔɔ meze kɛ ɔle ye [Nyamenle] nɔhalɛ nee anyunlunyia la anwo amaneɛ.”

Emlyn hɔle London, ɛleka mɔɔ awieleɛ kolaa ne ɔbokale William Whiston mɔɔ le Baebolo nwomanli mɔɔ bɛvoa ye ɔluakɛ ɔhɛlɛle debie mɔɔ ɔte nganeɛ kɛ ɔle Baebolo nu nɔhalɛ la ati la anwo. Ɛnee Whiston bu Emlyn kpalɛ, na ɔvɛlɛle ye “‘Keleseɛnezonlenlɛ dɛba nu sonla titile mɔɔ tie awie edwɛkɛ la.’”

KƐMƆTI A ƆKPOLE NSA-KO NGILEHILELƐ NE Ɛ?

Kɛmɔ William Whiston nee nwomanli bieko mɔɔ bɛbu ye kpalɛ, Isaac Newton nwunle ye la, Emlyn noko nwunle kɛ Baebolo ne ɛngilehile Nsa-Ko ngilehilelɛ ne kɛmɔ bɛhile wɔ Athanasia Diedi ne anu la. Ɔhilele nuhua kɛ: “Mezuzu nwolɛ kpalɛ, na mezukoa Ngɛlɛlera nwuanzanwuanza ne la, . . . menwu kɛ ɔle adwenle kpalɛ kɛ . . . mebahakyi me adwenle wɔ mɔɔ ɛnee medie medi wɔ Nsa-Ko ne anwo la.” Ɔdwulale ye edwɛkɛ ne kɛ “Nyamenle ne mɔɔ le Gyisɛse Kelaese Selɛ la angomekye a le Tumivolɛ Bedevinli a.”

Duzu a manle Emlyn hanle zɔhane a? Ɔnwunle ngɛlɛlera dɔɔnwo mɔɔ kile kɛ ngakyile wɔ Gyisɛse nee Ɔ Ze avinli la. Neazo ekyi a wɔ ɛke la (Bɛhyea edwɛkɛ mɔɔ Emlyn hanle wɔ ngɛlɛlera ne anwo la):

• Dwɔn 17:3: “Bɛanga kɛ Kelaese a le Nyamenle ko ne anzɛɛ Nyamenle ɛlɛ, na yeayɛ Nyamenle kokye ne.” Selɛ ne ala a bɛfɛlɛ ye “nɔhalɛ Nyamenle kokye ne a.”

• Dwɔn 5:30: “Ralɛ ne ɛnyɛ mɔɔ ɔkulo la, emomu ɔyɛ mɔɔ Selɛ ne kulo la.”

• Dwɔn 5:26: “Selɛ ne a maa ye ngoane a.”

• Ɛfɛsɛsema 1:3: “Bɛta bɛka Gyisɛse anwo edwɛkɛ kɛ Nyamenle Ra ɛdeɛ, noko yɛnnwu kɛ bɛka Selɛ ne anwo edwɛkɛ kɛ Nyamenle Selɛ, ɔnva nwo kɛ bɛta bɛfɛlɛ ye yɛ Awulae Gyisɛse Kelaese Selɛ la.”

Emlyn zuzule daselɛ ne kɔsɔɔti anwo wiele la, ɔhanle ye wienyi kɛ: “Ɛleka biala ɛnle Ngɛlɛlera nwuanzanwuanza ne anu mɔɔ kile kɛ Selɛ ne, Ralɛ ne yɛɛ Sunsum Nwuanzanwuanza ne gyi ɛkɛ maa sonla ko ne ala a.”

DUZU A YƐSUKOA YƐFI NU A?

Ɛnɛ, menli dɔɔnwo sulo kɛ bɛbagyinla mɔɔ Ngɛlɛlera ne kilehile la anzi. Noko Emlyn nyianle ɛhulolɛ kɛ ɔbagyinla Baebolo ne anu nɔhalɛ ne anzi. Ɔhanle kɛ, “Saa sonla anga nɔhalɛ mɔɔ hyia kpalɛ, mɔɔ ɔnwu ye kɛ nuhua la ɛkɛ na nwolɛ daselɛ wɔ Ngɛlɛlera nwuanzanwuanza ne anu la a, ɛnee duzu ati a ɔwɔ kɛ ɔkenga na ɔyɛ nwolɛ neɛnleanu a?” Emlyn ɛnrɛbu ɔ nye ɛnrɛgua nɔhalɛ ne azo.

Neazo mɔɔ Emlyn nee awie mɔ ɛyɛ la kola ka yɛ maa yɛsuzu nwo kɛ yɛbanyia ɛhulolɛ yɛagyinla nɔhalɛ ne anzi wɔ mekɛ mɔɔ bɛlɛgolo yɛ nwo la anu. Yɛdayɛ noko yɛbahola yɛabiza yɛ nwo kɛ, ‘Boni a hyia kpalɛ a​—menli nyunlu enililɛ nee ɛlolɛ anzɛɛ Nyamenle Edwɛkɛ ne mɔɔ yɛgyinla ɔ nzi la ɔ?’