Maa Baebolo Ne Ɛhilehile Wɔ

Nyamenle A Le Nwane?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Nyamenle a le nwane?

Nɔhalɛ Nyamenle ne a le Bɔvolɛ ne mɔɔ bɔle ninyɛne kɔsɔɔti la. Baebolo ne fɛlɛ ye “damɛnlangoate Belemgbunli.” Ɛhye kile kɛ ɔnlɛ mɔlebɛbo na ɔnrɛnyia ye awieleɛ. (Yekile 15:3) Nyamenle le ngoane Ɛvileka, ɔ ngomekye a ɔwɔ kɛ yɛsonle ye a.—Kenga Yekile 4:11.

2. Kɛzi Nyamenle de ɛ?

Awie biala ɛtɛnwunle Nyamenle ɛlɛ ɔluakɛ ɔle Sunsum. Ɛhye kile kɛ ɔlɛ ngoane gyinlabelɛ mɔɔ kpogya tɛla abɔdeɛ mɔɔ ɛnyelɛ nwu bɛ mɔɔ bɛwɔ azɛlɛ ye azo la. (Dwɔn 1:18; 4:24) Yɛnwu Nyamenle subane mɔɔ ɔlɛ la wɔ ninyɛne mɔɔ yebɔ la anu. Kɛ neazo la, saa yɛdwenledwenle mbakama nee felawɔse ngakyile ne mɔ anwo a, bɛmaa yɛnwu Nyamenle ɛlɔlɛ nee ye nrɛlɛbɛ. Kɛzi ewiade ne le kpole la maa yɛnwu Nyamenle tumi.—Kenga Wulomuma 1:20.

Eza yɛbahola yɛazukoa Nyamenle subane ne mɔ anwo ninyɛne dɔɔnwo wɔ Baebolo ne anu. Kɛ neazo la, ɔmaa yɛnwu mɔɔ Nyamenle kulo nee mɔɔ ɔngulo, kɛzi ɔ nee menli di, nee kɛzi ɔdi tɛnlabelɛ ngakyile nwo gyima la.—Kenga Edwɛndolɛ 103:7-10.

3. Asoo Nyamenle lɛ duma?

Gyisɛse hanle kɛ: “Yɛ Ze mɔɔ wɔ anwuma: Wɔ duma nwo ɛde.” (Mateyu 6:9) Ɔwɔ nuhua kɛ Nyamenle lɛ amodinli dɔɔnwo ɛdeɛ, noko ye duma le kokye. Asolo kɛzi bɛbɔ ye la wɔ aneɛ dɔɔnwo anu. Wɔ Nzema nu yɛfɛlɛ ye “Gyihova.”—Kenga Edwɛndolɛ 83:18, NW.

Bɛye Nyamenle duma ne bɛvi Baebolo dɔɔnwo anu na bɛva amodinli Awulae anzɛɛ Nyamenle bɛzie ɔ bo zo. Wɔ Nzema Baebolo ne anu, bɛva amodinli Ɛdɛnkɛma a bɛzie ɔ gyakɛ anu a. Noko mekɛ mɔɔ bɛhɛlɛle Baebolo ne la, ɛnee Nyamenle duma ne finde nu kɛyɛ 7,000. Gyisɛse manle menli nwunle Nyamenle duma ne. Mekɛ mɔɔ ɔkilehile Nyamenle Edwɛkɛ ne anu la, ɔvale duma ne ɔlile gyima. Ɔboale menli ɔmanle bɛnwunle Nyamenle.—Kenga Dwɔn 17:26.

4. Asoo Nyamenle dwenle yɛ nwo?

Gyihova dwenle yɛ nwo. Ɔdaye mumua ne a ɔtie yɛ nzɛlɛlɛ a. (Edwɛndolɛ 65:2) Asoo amaneɛnwunlɛ mɔɔ ɛzo la kile kɛ Nyamenle ɛndwenle yɛ nwo ɔ? Menli bie mɔ ka kɛ Nyamenle maa yɛnwu amaneɛ ɔfa ɔsɔ yɛ ɔnea, noko ɛhye ɛnle nɔhalɛ. Baebolo ne ka kɛ: “Ɔle bɛkyi kɛ Nyamenle kɛyɛ amumuyɛ.”—Dwobu 34:10; kenga Gyemise 1:13.

Nyamenle ɛmaa yɛ adenle mɔɔ maa yɛkola yɛsi yɛ kpɔkɛ a. Nyamenle ɛyɛ ɛhye ɛva ɛli yɛ eni. Asoo yɛ nye ɛnzɔ nwolɛ adenle mɔɔ yɛlɛ yɛkpa kɛ yɛbazonle Nyamenle anzɛɛ yɛnrɛzonle ye la ɔ? (Dwɔhyua 24:15) Menli yɛ bɛ gɔnwo mɔ ɛtane yemɔti amaneɛnwunlɛ ɛbu. Saa Gyihova nwu ninyɛndane ɛhye mɔ a ɔdi nyane.—Kenga Mɔlebɛbo 6:5, 6.

Ɔnrɛhyɛ, Gyihova balua Gyisɛse anwo zo yeaye amaneɛnwunlɛ nee menli mɔɔ fa ba la yeavi ɛkɛ. Gyihova ɛmaa amaneɛnwunlɛ nwo adenle mekɛ ekyi. Edwɛkɛ bieko mɔɔ bara nzinlii la, bahilehile deɛmɔti Nyamenle ɛmaa amaneɛnwunlɛ nwo adenle la anu.—Kenga Ayezaya 11:4.

5. Duzu a Nyamenle kpondɛ kɛ yɛyɛ a?

Gyihova bɔle yɛ mɔɔ yɛkola yɛsukoa ɔ nwo debie na yɛkulo ye a. Ɔkpondɛ kɛ yɛsukoa nɔhalɛ edwɛkɛ mɔɔ fane ɔ nwo la. (1 Temɔte 2:4) Saa yɛsukoa Baebolo ne a, ɔmaa yɛbayɛ Nyamenle Agɔnwo.—Kenga Mrɛlɛbulɛ 2:4, 5.

Gyihova a manle yɛ ngoane a, ɛhye ati ɔwɔ kɛ yɛkulo ye yɛtɛla awie biala. Yɛbahola yɛamaa Nyamenle anwu kɛ yɛkulo ye ɔlua asɔneyɛlɛ nee ye ɛhulolɛdeɛ mɔɔ yɛbayɛ la azo. (Mrɛlɛbulɛ 15:8) Gyihova kpondɛ kɛ yɛkulo yɛ gɔnwo mɔ.—Kenga Maake 12:29-31; 1 Dwɔn 5:3.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 1.

[Nvoninli wɔ mukelɛ 23]

Asoo ndelebɛbo kpalɛ bie ati a bɛmaa amaneɛnwunlɛ nwo adenle ekyi a?