Bɛbɔle Gyihova Ɛwɔkɛ

Yizilayɛma vile Yigyibiti la, kɛyɛ siane nwiɔ anzi bɛradwule Saenae Boka ne anwo na bɛyɛle bɛ azokoɛleɛ wɔ ɛkɛ. Gyihova vɛlɛle Mosisi wɔ boka ne azo na ɔhanle ɔhilele ye kɛ: ‘Menliele Yizilayɛma ngoane. Yemɔti saa bɛtie me ne na bɛdi me mɛla zo a, bɛbayɛ me menli titili.’ Mosisi hɔhanle edwɛkɛ mɔɔ Gyihova hanle hilele ye la hilele Yizilayɛma. Duzu a bɛyɛle a? Bɛbuale kɛ: ‘Debie biala mɔɔ Gyihova ɛha kɛ yɛyɛ la yɛbayɛ.’

Mosisi vole hɔle boka ne azo bieko. Gyihova hanle hilele ye wɔ ɛkɛ ne kɛ: ‘Me nee wɔ badendɛ wɔ kenle nsa ne azo. Bɔ menli ne kɔkɔ kɛ bɛmmaba Saenae Boka ne anwo.’ Mosisi hɔhanle hilele Yizilayɛma kɛ bɛziezie bɛ nwo na bɛdie Gyihova.

Kenle nsa ne azo, Yizilayɛma nwunle ɛsɛlɛmanye yɛɛ amungu kumɔɔnwo wɔ boka ne azo. Eza bɛdele ezulehululɛ kpole yɛɛ aweɛne ne. Akee Gyihova luale senle nu dwule boka ne azo. Yizilayɛma ahonle dule kpalɛ yemɔti bɛ nwo wosole bɛ. Boka ne kpusule kpole bie na esike ngome yile zo. Aweɛne ne ane liele kpole kpalɛ. Akee Nyamenle hanle kɛ: ‘Medame a mele Gyihova a. Mmasonle nyamenle gyɛne biala.’

Mosisi hɔle boka ne azo, na Gyihova vale kɛzi ɔwɔ kɛ menli ne sonle Ye yɛɛ kɛzi ɔwɔ kɛ bɛbɔ bɛ ɛbɛla la anwo mɛla maanle ye. Mosisi hɛlɛle mɛla ne na ɔgengale ɔhilele Yizilayɛma. Bɛbɔle ɛwɔkɛ kɛ: ‘Debie biala mɔɔ Gyihova ɛha kɛ yɛyɛ la yɛbayɛ.’ Bɛbɔle Nyamenle ɛwɔkɛ. Noko asoo bɛbali zolɛ ɔ?