Bɛanli Bɛ Ɛwɔkɛ Zo

Gyihova hanle hilele Mosisi kɛ: ‘Bɛla me nwo ɛke wɔ boka ye azo. Mebahɛlɛ me mɛla ne wɔ awolɛ ndɛbandɛba zo meamaa wɔ.’ Mosisi vole hɔle boka ne azo na ɔlile alehyenlɛ nee aledwolɛ kenle 40 wɔ ɛkɛ. Gyihova hɛlɛle Mɛla Bulu ne wɔ awolɛ ndɛbandɛba nwiɔ azo na ɔvale ɔmaanle Mosisi wɔ boka ne azo.

Mekɛ hɔle bie la, Yizilayɛma adwenle yɛle bɛ kɛ Mosisi ɛnrɛra bieko. Bɛhanle bɛhilele Aalɔn kɛ: ‘Yɛkpondɛ awie mɔɔ ɔbali yɛ nyunlu la. Yɛ nyamenle maa yɛ!’ Aalɔn hanle kɛ: ‘Bɛyeye bɛ nvutuke ne mɔ bɛrɛlɛ me.’ Ɔholole nvutuke ne ɔyɛle ɛnlankɛ ralɛ ananze. Menli ne hanle kɛ: ‘Yɛ Nyamenle ne mɔɔ yele yɛ vile Yigyibiti la ɛne!’ Bɛbɔle ɔ bo kɛ bɛsonle ɛnlankɛ ralɛ ananze ne, na bɛlile nwolɛ ɛvoyia. Asoo nvonleɛ wɔ nwolɛ ɔ? Ɛhɛe, ɔluakɛ ɛnee bɛbɔ ɛwɔkɛ kɛ bɛbazonle Gyihova angomekye. Noko bɛanli bɛ ɛwɔkɛ ne azo.

Gyihova nwunle mɔɔ ɛlɛkɔ zo la, na ɔhanle ɔhilele Mosisi kɛ: ‘Dwu aze kɔ menli ne anwo lɔ. Bɛkpo me na bɛlɛsonle adalɛ nyamenle.’ Mosisi vi boka ne azo dwule, ɛnee ɔlɛ awolɛ ndɛbandɛba nwiɔ ne.

Mɔɔ Mosisi bikyele azokoɛleɛ ne la, ɔdele kɛ menli ne ɛlɛto edwɛne. Akee ɔnwunle kɛ bɛlɛsi agole yɛɛ bɛlɛbɔ bɛ ti aze bɛamaa ɛnlankɛ ralɛ ananze ne. Mosisi vale ɛya kpole. Ɔvuandinle awolɛ ndɛbandɛba nwiɔ ne ɔguale aze na ɔbubule. Ɔzɛkyele ananze ne ɛkɛ ne ala. Akee ɔbizale Aalɔn kɛ: ‘Kɛ ɔyɛle mɔɔ menli ne maanle ɛyɛle ɛtane kpole ɛhye ɛ?’ Aalɔn hanle kɛ: ‘Mmafa ɛya. Ɛdawɔ ɛze kɛzi menli ɛhye mɔ de la. Ɛnee bɛlɛkpondɛ nyamenle, yemɔti a menvale bɛ nvutuke ne menyɛle ɛnlankɛ ralɛ ɛhye memaanle bɛ a!’ Anrɛɛ ɔnle kɛ Aalɔn yɛ zɔ. Mosisi vole hɔle boka ne azo na ɔkpale Gyihova kyɛlɛ kɛ ɔva menli ne ɛtane ɔhyɛ bɛ.

Gyihova vale menli mɔɔ bɛkpondɛ kɛ bɛtie ɔ ne la ɛtane hyɛle bɛ. Asoo wɔnwu deɛmɔti anrɛɛ ɔwɔ kɛ Yizilayɛma tie Mosisi la?