Ngyegyelɛ Nsia Ne Mɔɔ Doa Ye La

Mosisi nee Aalɔn hɔhanle Nyamenle nrɛlaleɛ ne hilele Falo kɛ: ‘Saa wɔammaa me menli ne angɔ a, mebamaa nrɛzenra ara azɛlɛ ne azo.’ Yigyibitima kɔsɔɔti azua nu yɛle nrɛzenra ngome. Nrɛzenra vale maanle ne amuala. Noko bie angɔ Gohyɛn, ɛleka mɔɔ ɛnee Yizilayɛma de la. Yigyibitima angomekye a ngyegyelɛ nna ne nee mɔɔ doa zo la rale bɛ nwo zo a. Falo kpale Mosisi kyɛlɛ kɛ: ‘Sɛlɛ Gyihova maa ɔye nrɛzenra ne mɔ ɔvi ɛkɛ. Wɔ menli ne bahola ahɔ.’ Noko mɔɔ Gyihova maanle nrɛzenra ne mɔ vile ɛkɛ la, Falo hakyile ye adwenle. Asoo Falo bazukoa debie avi ɛhye anu?

Gyihova hanle kɛ: ‘Saa Falo ammaa me menli ne angɔ a, Yigyibitima nyɛmoa ne mɔ anwo bado bɛ na bɛawu.’ Ye alehyenlɛ nu, nyɛmoa ne mɔ bɔle ɔ bo kɛ bɛwu. Noko Yizilayɛma nyɛmoa ɛdeɛ ne mɔ anwu. Noko Falo yɛle anzosesebɛ, yeammaa bɛangɔ.

Akee Gyihova zele Mosisi kɛ, ɔzia ɔhɔ Falo ɛkɛ na ɔkponde nzonle anwomanyunlu wɔ ɔ nyunlu ɛkɛ. Nzonle ne yɛle munlutu wɔ anwomanyunlu na ɔguale Yigyibitima anwo. Munlutu ne hakyile nyila bobɔle Yigyibitima nee bɛ nyɛmoa ne mɔ. Ɛhye amuala anzi, Falo ammaa Yizilayɛma angɔ.

Gyihova zoanle Mosisi wɔ Falo ɛkɛ bieko na ɔhanle kɛ: ‘Ɛmkpondɛ kɛ ɛmaa me menli ne mɔ kɔ ɔ? Ɛhyema, ezuawolɛ badɔ azɛlɛ ne azo amuala.’ Ye alehyenlɛ nu, Gyihova maanle ezuawolɛ dɔle, ɛsɛlɛmanye kpakyele na ɔkpale senle. Debie zɛhae bie ɛtɛsile Yigyibiti ɛlɛ. Ɔzɛkyele Yigyibitima mbaka nee bɛ aleɛ kɔsɔɔti, noko bie anzi Gohyɛn azɛlɛ zo. Falo hanle kɛ: ‘Sɛlɛ Gyihova maa ɔzɔ ɛhye anloa! Ɔwie a akee bɛbahola bɛahɔ.’ Noko mɔɔ ezuawolɛ ne nee ezule ne gyakyile ɛdɔlɛ ala la, yɛɛ Falo hakyile ye adwenle a.

Akee Mosisi hanle kɛ: ‘Abɛbɛ bali mbaka biala mɔɔ ezuawolɛ ne anzɛkye bɛ la.’ Abɛbɛ mgbe dɔɔnwo lile debie biala mɔɔ hale ɛya ne mɔ anu nee mbaka ne mɔ azo la. Falo kpale kyɛlɛ kɛ: ‘Sɛlɛ Gyihova maa ɔye abɛbɛ ne mɔ ɔvi ɛkɛ.’ Noko mɔɔ Gyihova yele abɛbɛ ne mɔ vile ɛkɛ la, Falo ammaa Yizilayɛma angɔ.

Gyihova hanle hilele Mosisi kɛ: ‘Tende ɛ sa wɔ anwomanyunlu.’ Ɛkɛ ne ala maanle nu yɛle awozinli kabikabi. Yigyibitima angola annwu debie biala yɛɛ bɛannwu awie biala too kenle nsa. Yizilayɛma ala a awozinli ne bie anva bɛ a.

Falo hanle hilele Mosisi kɛ: ‘Ɛ nee wɔ menli ne bahola ahɔ. Noko bɛgyakyi bɛ nyɛmoa ne mɔ wɔ ɛke.’ Mosisi hanle kɛ: ‘Ɔwɔ kɛ yɛ nee yɛ nyɛmoa ne mɔ kɔ amaa yɛava bie yɛabɔ afɔle yɛamaa yɛ Nyamenle ne.’ Falo vale ɛya kpole na ɔdeanle nu kɛ: ‘Fi ɛke kɔ! Saa menwu wɔ bieko a, mebahu wɔ.’