Ngyegyelɛ Nsa Ne Mɔɔ Limoa La

Bɛmaanle Yizilayɛma yɛle gyima ɛsesebɛ kɛ ngɛkɛlɛ. Gyihova maanle Mosisi nee Aalɔn hɔhanle hilele Falo kɛ: ‘Maa me menli ne ɛhɔ, amaa bɛazonle me wɔ fienemgbole ne anu.’ Falo vale anwomemaazo buale kɛ: ‘Mɔɔ Gyihova baha biala la ɛnvale me nwo, yɛɛ menrɛmaa Yizilayɛma ɛnrɛhɔ.’ Akee Falo maanle bɛyɛle gyima ɛsesebɛ kpalɛ. Gyihova yɛle kɛ ɔkile Falo ɛzulolɛ. Asoo ɛze mɔɔ Gyihova yɛle a? Ɔvale Ngyegyelɛ Bulu ɔrale Yigyibitima anwo zo. Gyihova hanle hilele Mosisi kɛ: ‘Falo ɛlɛyɛ anzosesebɛ. Ɛhyema nwonlomɔ, ɔbahɔ Azule Naele ne anloa. Kɔha kile ye kɛ, kɛmɔ yeammaa me menli ne angɔ la ati, Azule Naele ne bahakyi mogya.’ Mosisi diele na ɔhɔle Falo ɛkɛ. Falo nwunle kɛ Aalɔn vale ye kpɔma ne bɔle Azule Naele ne anu, na nzule ne hakyile mogya. Azule Naele ne bɔle ɔ bo kɛ ɔbɔ, nuhua fɛlɛ ne wule yɛɛ ɛnee bɛno nzule ne bie a ɔnyɛ boɛ. Noko Falo ammaa Yizilayɛma angɔ.

Kenle nsuu anzi, Gyihova maanle Mosisi hɔhanle hilele Falo kɛ: ‘Saa wɔammaa me menli ne angɔ a, Yigyibiti ɛke bayɛ ahɛlɛne ngome.’ Aalɔn maanle ye kpɔma ne zo, na ahɛlɛne ravale azɛlɛ ne azo bɔkɔɔ. Menli ne nwunle ahɛlɛne wɔ bɛ azua nu, bɛ ɛkpa ne mɔ azo yɛɛ bɛ ahyɛnze nu. Ɛnee ahɛlɛne wɔ ɛleka biala! Falo maanle Mosisi zɛlɛle Gyihova kɛ ɔye ngyegyelɛ ɛhye ɔvi ɛkɛ. Falo bɔle ɛwɔkɛ kɛ ɔbamaa Yizilayɛma adenle yeamaa bɛahɔ. Yemɔti Gyihova maanle ngyegyelɛ ne gyakyile, na Yigyibitima huohuanle ahɛlɛne ne mɔ anloa. Maanle ne anu bɔnle nvoanvoa. Noko eza Falo ammaa menli ne angɔ.

Akee Gyihova hanle hilele Mosisi kɛ: ‘Ka kile Aalɔn kɛ ɔva ye kpɔma ne ɔfi azɛlɛ nwo na munlutu ne bahakyi ngokowule.’ Ɛkɛ ne ala ɛleka biala yɛle ngokowule ngome. Falo menli ne bie mɔ hanle hilele ye kɛ: ‘Nyamenle a ɛva ngyegyelɛ ɛhye ɛra a.’ Noko Falo ammaa Yizilayɛma angɔ.