Akee Bɛwole!

Ebileham nee Sɛla gyale la ɛvolɛ dɔɔnwo ɛgua nu. Bɛgyakyile Ɛɛle asetɛnla kpalɛ ne na bɛhɔdɛnlanle ɛdanlɛsua nu. Noko Sɛla andendɛ ɔ nzo abo, ɔluakɛ ɛnee ɔlɛ Gyihova anu anwodozo.

Ɛnee Sɛla kpondɛ ralɛ, yemɔti ɔzele Ebileham kɛ: ‘Saa me sonvolɛ Heega wo a, ɔbayɛ me ra.’ Nzinlii, Heega wole ralɛ nrenyia. Bɛdonle ye Yehyemɛle.

Ɛvolɛ dɔɔnwo anzi mɔɔ ɛnee Ebileham ɛli ɛvolɛ 99 na Sɛla noko ɛli ɛvolɛ 89 la, bɛnyianle nyɛvolɛ nsa bie. Ebileham maanle bɛliele bɛ menle wɔ baka bie abo na ɔmaanle bɛ aleɛ bɛlile. Ɛze nyɛvolɛ ne mɔ menli holɛ ɔ? Bɛle anwumabɔvolɛma! Bɛzele Ebileham kɛ: ‘Ɛvolɛ bieko mekɛ zɛhae, ɛ nee ɛ ye Sɛla bawo ralɛ nrenyia.’ Ɛnee Sɛla wɔ ɛdanlɛsua ne anu ɔlɛtie. Yemɔti ɔzelele na ɔhanle kɛ: ‘Kɛkala mɔɔ mewie ɛrelera yɛ la yɛɛ mebawo ralɛ nrenyia a?’

Ye ɛvolɛ ko pɛpɛɛpɛ, Sɛla wole ralɛ nrenyia kɛ mɔɔ Gyihova anwumabɔvolɛ ne hanle la. Ebileham donle ye Ayezeke, mɔɔ ɔ bo kile “Ɛzelekɛ” la.

Mɔɔ Ayezeke lile ɛvolɛ nnu la, Sɛla nwunle kɛ Yehyemɛle ɛlɛgolo ɔ nwo. Ɛnee ɔkpondɛ kɛ ɔbɔ ɔ ra ne anwo bane, yemɔti ɔhanle kɛ Ebileham ɛmaa Heega nee Yehyemɛle ɛhɔ. Mɔlebɛbo ne, ɛnee Ebileham ɛmkpondɛ kɛ ɔyɛ. Noko Gyihova zele Ebileham kɛ: ‘Tie Sɛla edwɛkɛ ne. Mebanlea Yehyemɛle. Noko ɔlua Ayezeke anwo zo a me ɛwɔkɛ ne mɔ bara nu a.’