ƐZUKOALƐDEƐ 11
Bɛhɛlɛle Gyisɛse Anwo Edwɛkɛ
Ɛnwu menli mɔɔ wɔ nvoninli ne anu la ɔ?— Bɛmɛ a le Mateyu, Maake, Luku, Dwɔn, Pita, Gyemise, Dwuudu yɛɛ Pɔɔlo. Ɛnee menli ɛhye mɔ kɔsɔɔti de aze wɔ Gyisɛse mekɛ zo, na bɛhɛlɛle Gyisɛse anwo edwɛkɛ. Maa yɛzukoa bɛ nwo debie dɔɔnwo.
Duzu a ɛze ye wɔ menli ɛhye mɔ anwo a?
Ɛnee bɛ nuhua nsa le ɛzoanvolɛma mɔɔ bɛ nee Gyisɛse hanle edwɛkɛ ne a. Ɛze menli nsa holɛ ko ɔ?— Mateyu, Dwɔn yɛɛ Pita. Ɛnee ɛzoanvolɛma Mateyu nee Dwɔn ze Gyisɛse kpalɛ, na bɛ nuhua ko biala hɛlɛle buluku mɔɔ ka Gyisɛse ɛbɛlabɔlɛ nu edwɛkɛ la. Ɛzoanvolɛ Dwɔn noko hɛlɛle buluku mɔɔ bɛfɛlɛ ye Yekile yɛɛ ngɛlata nsa mɔɔ bɛfɛlɛ ye Dwɔn Mɔɔ Lumua, Dwɔn Mɔɔ Tɔ Zo Nwiɔ yɛɛ Dwɔn Mɔɔ Tɔ Zo Nsa. Ɛzoanvolɛ Pita hɛlɛle ngɛlata nwiɔ mɔɔ wɔ Baebolo ne anu la. Bɛfɛlɛ ye Pita Mɔɔ Lumua yɛɛ Pita Mɔɔ Tɔ Zo Nwiɔ. Wɔ Pita kɛlata ne mɔɔ tɔ zo nwiɔ la anu, ɔhɛlɛle mekɛ mɔɔ Gyihova dendɛle vile anwuma na ɔhanle Gyisɛse anwo edwɛkɛ kɛ: ‘Me ra ɛne. Mekulo ye, yɛɛ me nye die ɔ nwo’ la.
Menli mɔɔ ɛha mɔɔ bɛwɔ nvoninli ne anu la noko ka Gyisɛse anwo edwɛkɛ wɔ mbuluku mɔɔ bɛhɛlɛle la anu. Bɛ nuhua ko a le Maake. Bie a bɛhyele Gyisɛse la ɛnee ɔwɔ ɛkɛ na ɔnwunle debie biala mɔɔ zile la. Ko noko a le Luku. Ɛnee ɔle dɔketa na ɔbayɛ kɛ ɔrayɛle Keleseɛnenli wɔ mekɛ mɔɔ Gyisɛse wule la.
Baebolo kɛlɛvolɛma nwiɔ mɔɔ ɛnwu bɛ wɔ nvoninli ne anu la a le Gyisɛse amediema ngakula nwiɔ ne. Ɛze bɛ duma ɔ?— Bɛfɛlɛ bɛ Gyemise nee Dwuudu. Alumua ne, bɛanlie Gyisɛse bɛanli. Ɛnee bɛdwenle bɔbɔ kɛ yezɛ. Noko nzinlii bɛnyianle Gyisɛse anu diedi na bɛrayɛle Keleseɛnema.
Baebolo kɛlɛvolɛ mɔɔ li awieleɛ mɔɔ ɛnwu ye wɔ nvoninli ne anu la a le Pɔɔlo. Kolaa na yeayɛ Keleseɛnenli la ɛnee bɛfɛlɛ ye Sɔɔlo. Ɛnee ɔkpɔ Keleseɛnema na ɔyɛ bɛ amumuyɛ. Ɛze debie mɔɔ manle Pɔɔlo rayɛle Keleseɛnenli la ɔ?— Kenle ko bie, mɔɔ Pɔɔlo lua adenle ne azo la arɛlevilɛ nu ala ɔdele kɛ awie ɛlɛtendɛ ahile ye wɔ anwuma. Gyisɛse ɔ! Ɔbizale Pɔɔlo kɛ: ‘Duzu ati a ɛkpɔ menli mɔɔ die me di la ɛ?’ Ɛhye anzi, Pɔɔlo hakyile na ɔrayɛle Keleseɛnenli. Pɔɔlo hɛlɛle Baebolo ne anu mbuluku 14, Wulomuma kɔdwu Hibuluma.
Yɛkenga Baebolo ne dahuu, ɔnle zɔ ɔ?— Saa yɛkenga Baebolo ne a, yɛsukoa Gyisɛse anwo ninyɛne dɔɔnwo. Ɛkulo kɛ ɛsukoa Gyisɛse anwo ninyɛne dɔɔnwo ɔ?—