ƐZUKOALƐDEƐ 10
Kɛ Ɔkɛyɛ Na Wɔanwu Nɔhalɛ Ɛzonlenlɛ Ne Ɛ?
1. Asoo nɔhalɛ ɛzonlenlɛ kokye a wɔ ɛkɛ a?
“Bɛnlea bɛ nwo boɛ wɔ adalɛ ngapezoma anwo.”—MATEYU 7:15.
Gyisɛse hilehilele ye ɛdoavolɛma ɛzonlenlɛ kokye anwo debie, nɔhalɛ ɛzonlenlɛ ne. Ɔle kɛ adenle mɔɔ kɔ dahuu ngoane nu la. Gyisɛse hanle kɛ: “Menli ekyi bie a nwu” zɔhane adenle ne a. (Mateyu 7:14) Ɛzonlenlɛ mɔɔ gyi Nyamenle nɔhalɛ Edwɛkɛ ne azo la ala a ɔdie to nu a. Nɔhalɛ azonvolɛ kɔsɔɔti lɛ diedi ko.—Kenga Dwɔn 4:23, 24; 14:6; Ɛfɛsɛsema 4:4, 5.
Nea Asoo Nyamenle Die Ɛzonlenlɛ Kɔsɔɔti To Nu? vidio ne.
2. Duzu a Gyisɛse hanle ye wɔ adalɛ Kilisienema anwo a?
“Bɛka ye bagua nu kɛ bɛze Nyamenle, noko bɛfa bɛ gyima bɛkpo ye.”—TAETƐSE 1:16.
Gyisɛse bɔle kɔkɔ kɛ adalɛ ngapezoma bazɛkye Kilisiene ɛzonlenlɛ. Bɛyɛ bɛ nwo kɛ bɛle nɔhalɛ azonvolɛ. Bɛ asɔne ne mɔ ka kɛ bɛle Kilisienema. Noko mɔɔ bɛyɛ la maa yɛnwu kɛzi bɛde la bɔkɔɔ. Adenle boni azo? Nɔhalɛ ɛzonlenlɛ ala a maa yɛnyia Kilisienema kpalɛ mɔɔ da subane kpalɛ ali a.—Kenga Mateyu 7:13-23.
3. Kɛ ɔkɛyɛ na wɔanwu nɔhalɛ azonvolɛ ɛ?
Suzu ninyɛne nnu ɛhye mɔ mɔɔ maa yɛnwu bɛ la anwo:
Nɔhalɛ azonvolɛ bu Baebolo ne kɛ Nyamenle Edwɛkɛ.Bɛbɔ mɔdenle bɛfa ye ngyinlazo ne mɔ bɛbɔ bɛ ɛbɛla. Yemɔti nɔhalɛ ɛzonlenlɛ le ngakyile fi ɛzonlenlɛ mɔɔ gyi menli nzuzulɛ zo la anwo. (Mateyu 15:7-9) Nɔhalɛ azonvolɛ yɛ ninyɛne mɔɔ bɛkilehile awie mɔ la.—Kenga Dwɔn 17:17; 2 Timote 3:16, 17.
Gyisɛse nɔhalɛ ɛdoavolɛma di Nyamenle duma Gyihova ne eni. Gyisɛse lile Nyamenle duma ne eni na ɔlale ye ali. Ɔboale menli ɔmaanle bɛnwunle Nyamenle na ɔhilehilele bɛ kɛ bɛzɛlɛ bɛmaa Nyamenle duma nwo ɛde. (Mateyu 6:9) Ɛzonlenlɛ boni a maa bɛnwu Nyamenle duma ne wɔ ɛleka mɔɔ ɛde la ɛ?—Kenga Dwɔn 17:26; Wulomuma 10:13, 14.
Nɔhalɛ Kilisienema bɔ Nyamenle Belemgbunlililɛ ne nolo. Nyamenle zoanle Gyisɛse kɛ ɔrabɔ Belemgbunlililɛ ne anwo edwɛkpa ne nolo. Nyamenle Belemgbunlililɛ ne a le alesama anyelazo kokye a. Gyisɛse hɔle zo hanle nwolɛ edwɛkɛ too hɔle ewule nu. (Luku 4:43; 8:1; 23:42, 43) Ɔhanle kɛ ye ɛdoavolɛma babɔ ye nolo. Saa awie ba wɔ ɛkɛ ne kɛ ɔbaha Nyamenle Belemgbunlililɛ ne anwo edwɛkɛ a, ɛnee ɛzonlenlɛ boni anu a ɔwɔ a?—Kenga Mateyu 24:14.
Gyisɛse ɛdoavolɛma ɛnle ɛtane ewiade ɛhye afoa. Ɛbanwu ye kɛ bɛnva bɛ nwo bɛnwulowula maanyɛlɛ nee maanle konle nu. (Dwɔn 17:16; 18:36) Eza noko bɛnzukoa ewiade subane yɛɛ bɛnyɛ bɛ ninyɛndane ne bie. —Kenga Gyemise 4:4.
Nɔhalɛ Kilisienema lɛ ɛlɔlɛ kpole maa bɛ nwo ngoko. Nyamenle Edwɛkɛ ne mɔɔ bɛsukoa la maa bɛbu awie biala. Adalɛ ɛzonlenlɛ ta boa maanle dɔɔnwo anu konle, noko nɔhalɛ azonvolɛ ɛnyɛ zɔ. (Maeka 4:1-3) Emomu, nɔhalɛ Kilisienema fa bɛ mekɛ nee bɛ ninyɛne boa awie mɔ na bɛmaa bɛ anwosesebɛ.—Kenga Dwɔn 13:34, 35; 1 Dwɔn 4:20.
4. Ɛbahola wɔanwu nɔhalɛ ɛzonlenlɛ ne ɔ?
Ɛzonlenlɛ boni a ye ngilehilelɛ amuala gyi Nyamenle Edwɛkɛ ne azo, di Nyamenle duma ne eni, na ɔbɔ Nyamenle Belemgbunlililɛ ne nolo kɛ yemɔ a le alesama anyelazo kokye a? Nwane mɔ a lɛ ɛlɔlɛ maa bɛ nwo na bɛngɔ konle a? Kɛzi ɛdwenle nwo ɛ?—Kenga 1 Dwɔn 3:10-12.