Kɛzi Baebolo Ngyinlazo Boa Yɛ Ɛ?

1. Duzu ati a yɛhyia adehilelɛ a?

Yɛ Bɔvolɛ ne ze nrɛlɛbɛ tɛla yɛ. Ɔle Selɛ mɔɔ lɛ ɛlɔlɛ la ati ɔdwenle yɛ nwo. Bieko, yeambɔ yɛ kɛ yɛgyakyi ye na yɛli yɛ ti anwo. (Gyɛlɛmaya 10:23) Ɔti kɛ mɔɔ kakula hyia ye awovolɛ adehilelɛ la, zɔhane ala a yɛ muala yɛhyia Nyamenle adehilelɛ a. (Ayezaya 48:17, 18) Baebolo ngyinlazo maa yɛ adehilelɛ mɔɔ le ahyɛlɛdeɛ mɔɔ vi Nyamenle ɛkɛ a.​—Kenga 2 Timote 3:16.

Gyihova mɛla nee ngyinlazo ne mɔ kilehile yɛ ɛbɛla kpalɛ mɔɔ ɔwɔ kɛ yɛbɔ ye ɛnɛ la na ɔmaa yɛnwu kɛzi yɛbahola yɛanyia nyilalɛ dahuu kenle bie la. Kɛmɔ Nyamenle a bɔle yɛ la ati, yɛ nye die nwo kɛ yɛbali ye adehilelɛ zo.​—Kenga Edwɛne 19:7, 11; Yekile 4:11.

2. Duzu a le Baebolo ngyinlazo?

Baebolo ngyinlazo le nɔhalɛ titili bie mɔ. Noko mɛla ɛdeɛ, ɔdi tɛnlabelɛ fɔɔnwo bie mɔ anwo gyima. (Ditilɔnomi 22:8) Ɔwɔ kɛ yɛfa yɛ adwenle yɛdi gyima amaa yɛade kɛzi ngyinlazo bie fale tɛnlabelɛ bie anwo la abo. (Mrɛlɛbulɛ 2:10-12) Kɛ neazo la, Baebolo ne kile kɛ ngoane le ahyɛlɛdeɛ mɔɔ vi Nyamenle ɛkɛ a. Ngyinlazo titili ɛhye kile yɛ mɔɔ ɔwɔ kɛ yɛyɛ wɔ gyima nu, sua nu, yɛɛ mekɛ mɔɔ yɛlɛtu adenle la. Ɔmaa yɛnea yɛ nwo boɛ.​—Kenga Gyima ne 17:28.

3. Ngyinlazo nwiɔ boni a hyia kpalɛ a?

Gyisɛse hanle ngyinlazo nwiɔ bie mɔɔ hyia kpalɛ la anwo edwɛkɛ. Mɔɔ limoa la maa yɛnwu deɛmɔti bɛbɔle alesama la​—kɛ bɛkɛnwu Nyamenle, bɛkɛhulo ye, na bɛkɛzonle ye nɔhalɛ nu. Ɔwɔ kɛ yɛsuzu ngyinlazo ɛhye anwo wɔ yɛ kpɔkɛzilɛ biala anu. (Mrɛlɛbulɛ 3:6) Menli mɔɔ di ngyinlazo ɛhye azo la yɛ Nyamenle agɔnwo mɔ, bɛnyia nɔhalɛ anyelielɛ yɛɛ dahuu ngoane.​—Kenga Mateyu 22:36-38.

Ngyinlazo mɔɔ tɔ zo nwiɔ la maa yɛ nee menli tɛnla anzodwolɛ nu. (1 Kɔlentema 13:4-7) Saa yɛbahola yɛava ngyinlazo ɛhye yɛali gyima a, ɔwɔ kɛ yɛsukoa kɛzi Nyamenle nee menli dua la.​—Kenga Mateyu 7:12; 22:39, 40.

4. Kɛzi Baebolo ngyinlazo boa yɛ ɛ?

Baebolo ngyinlazo kilehile mbusua kɛzi bɛbɔ nu bɛtɛnla wɔ ɛlɔlɛ nu la. (Kɔlɔsaema 3:12-14) Eza Nyamenle Edwɛkɛ ne bɔ mbusua nwo bane ɔlua ngyinlazo fofolɛ mɔɔ ɔkile bɛ la azo​—kɛ ɔwɔ kɛ agyalɛ tɛnla ɛkɛ dahuu.​—Kenga Gyɛnɛsese 2:24.

Saa yɛdi Baebolo ngyinlazo zo a, ɔkola ɔbɔ yɛ gyima nwo bane ɔmaa yɛnyia anyelielɛ. Kɛ neazo la, gyimamenlema dɔɔnwo kulo gyimayɛvoma mɔɔ fa Baebolo ngyinlazo bɔ bɛ ɛbɛla la ati, bɛdi nɔhalɛ na bɛbɔ mɔdenle bɛyɛ gyima la. (Mrɛlɛbulɛ 10:4, 26; Hibuluma 13:18) Eza Nyamenle Edwɛkɛ ne kilehile yɛ kɛ yɛmaa yɛ kunlu ɛdwo ninyɛne mɔɔ hyia kpalɛ la anwo na yɛmaa agɔnwolɛvalɛ mɔɔ yɛ nee Nyamenle lɛ la ɛhyia yɛ ɛdɛla nwonane afoa nu ninyɛne.​—Kenga Mateyu 6:24, 25, 33; 1 Timote 6:8-10.

Saa yɛfa Baebolo ngyinlazo yɛdi gyima a ɔmaa yɛnyia kpɔkɛdelɛ kpalɛ. (Mrɛlɛbulɛ 14:30; 22:24, 25) Kɛ neazo la, saa yɛtie Nyamenle mɛla mɔɔ tua nzabolɛ la a ɔbɔ yɛ nwo bane ɔfi ewule nee esiane ngakyile nwo. (Mrɛlɛbulɛ 23:20) Gyihova maa yɛ adenle kɛ yɛnlo nza noko ɔnle kɛ yɛno ye dɔɔnwo. (Edwɛne 104:15; 1 Kɔlentema 6:10) Nyamenle ngyinlazo kilehile yɛ maa yɛnea yɛ nyɛleɛ nee yɛ nzuzulɛ boɛ na ɔboa yɛ. (Edwɛne 119:97-100) Noko, tɛ nɔhalɛ Kilisienema boɛyɛlɛ ti ala a bɛdi Nyamenle ngyinlazo zo a. Bɛdi zo bɛfa bɛwula Gyihova anyunlunyia.​—Kenga Mateyu 5:14-16.