Kɛzi Yɛboa Yɛ Mediema Wɔ Anwongyelelɛ Nu Ɛ?

Esiane si a, Gyihova Alasevolɛ yɛ moalɛ nwo ngyehyɛleɛ ndɛndɛ fa boa bɛ mediema mɔɔ edwɛkɛ ɛdo bɛ la. Mɔdenlebɔlɛ ɛhye mɔ kile ɛlɔlɛ kpalɛ mɔɔ yɛlɛ yɛmaa yɛ nwo la. (Dwɔn 13:34, 35; 1 Dwɔn 3:17, 18) Kɛzi yɛboa ɛ?

Yɛye ezukoa yɛboa. Mekɛ mɔɔ ɛhɔne kpole bie zile wɔ Dwudiya la, alimoa Kilisienema mɔɔ wɔ Anteɔko la vale ezukoa hɔboale bɛ sunsum nu mediema ne mɔ. (Gyima ne 11:27-30) Saa yɛte noko kɛ yɛ mediema mɔɔ wɔ ɛleka bie la anwo ɛhyele bɛ a, yɛdua asafo ne azo yɛye ndoboa yɛkɔboa bɛ.​—2 Kɔlentema 8:13-15.

Yɛfa moalɛ mɔɔ hyia la yɛmaa. Mgbanyima mɔɔ wɔ ɛleka mɔɔ esiane kɛzi la kpondɛ asafo ne anu amra na bɛnea kɛ awie biala wɔ ɛkɛ mɔɔ debie biala anyɛ ye a. Bie a moalɛ kɔmatii nea maa bɛmaa bɛ aleɛ, nzule kpalɛ mɔɔ bɛno, adɛladeɛ, dabelɛ yɛɛ ayile. Alasevolɛ dɔɔnwo mɔɔ ze gyima bie mɔ yɛ la tu bɛ nwo maa na bɛbɔ kakɛ bɛkɔyɛ moalɛ gyima ɛhye bie anzɛɛ bɛyɛ azua nee Belemgbunlililɛ Asalo ngakyile mɔɔ ɛzɛkye la boɛ. Koyɛlɛ mɔɔ wɔ yɛ ahyehyɛdeɛ ne anu nee kɛzi yɛyɛ gyima yɛbɔ nu la maa yɛkola yɛboɔboa ninyɛne mɔɔ hyia nee gyimayɛvoma nloa ndɛndɛ wɔ mekɛ mɔɔ hyia la anu. Yɛboa “bɛdabɛ mɔɔ yɛ nee bɛ lɛ diedi ko la” ɛdeɛ, noko saa ɔkɛyɛ boɛ a yɛboa awie mɔ, ɔnva nwo kɛ bɛkɔ asɔne gyɛne la.​—Galeehyeama 6:10.

Yɛboa bɛ wɔ sunsum nu na yɛkyekye bɛ rɛle. Menli mɔɔ esiane kɛdo bɛ la hyia arɛlekyekyelɛ kpalɛ. Wɔ mekɛ zɛhae anu, yɛnyia anwosesebɛ yɛfi Gyihova, “arɛlekyekyelɛ muala Nyamenle ne” ɛkɛ. (2 Kɔlentema 1:3, 4) Yɛfi anyelielɛ nu yɛfa Baebolo ne anu ɛwɔkɛ ne mɔ yɛkyekye menli mɔɔ bɛ anyelazo ɛwie la arɛle, na yɛmaa bɛnwu kɛ ɔnrɛhyɛ Nyamenle Belemgbunlililɛ ne bava esiane kɔsɔɔti mɔɔ fa nyanelilɛ nee amaneɛnwunlɛ ba la ara awieleɛ.​—Yekile 21:4.

• Duzu ati a esiane si a Alasevolɛ ne mɔ di nwolɛ gyima ndɛndɛ a?

• Kɛzi yɛkyekye menli mɔɔ kɛnyia bɛ ti la arɛle wɔ sunsum nu ɛ?