Kɛzi Mgbanyima Ne Mɔ Sonle Asafo Ne Ɛ?

Yɛnlɛ ɛsɔfoma mɔɔ yɛtua bɛ kakɛ la wɔ yɛ ahyehyɛdeɛ ne anu. Emomu, kɛ mɔɔ bɛyɛle ye wɔ Kilisiene asafo ne mɔlebɛbo ne la, bɛkpa neavolɛma mɔɔ fɛta la kɛ “bɛnlea Nyamenle asafo ne” azo. (Gyima ne 20:28) Bɛle menli mɔɔ ɛnyi sunsum nu mɔɔ bɛdi asafo ne anyunlu a, na ‘bɛndwehwenle bɛ bo aze, bɛfi bɛ ɛhulolɛ nu bɛyɛ ye wɔ Nyamenle anyunlu; tɛ kɛ bɛkpondɛ ɔ nzi ahatualɛ la ati ɔ, emomu anyelielɛ nu.’ (1 Pita 5:1-3) Gyima boni a bɛyɛ a?

Bɛnea yɛ na bɛbɔ yɛ nwo bane. Mgbanyima ne mɔ kile asafo ne adenle na bɛbɔ nwolɛ bane wɔ sunsum nu. Kɛmɔ bɛze kɛ Nyamenle ɛva gyima ɛhye mɔɔ hyia la ɛwula bɛ sa nu la ati, bɛnyɛ kyengye wɔ ye menli ne anwo zo, emomu, bɛboa bɛmaa yɛ nwo tɔ yɛ na yɛ nye die. (2 Kɔlentema 1:24) Kɛ mɔɔ mboaneneavolɛ nea ye boane ko biala kɛnlɛma la, zɔhane ala a mgbanyima ne mɔ bɔ mɔdenle kɛ bɛbanwu asafo ne anu sonla ko biala a.​—Mrɛlɛbulɛ 27:23.

Bɛkilehile yɛ kɛzi bɛyɛ Nyamenle ɛhulolɛdeɛ la. Dapɛne biala, mgbanyima ne mɔ nea debiezukoalɛ zo wɔ asafo ne anu amaa yɛanyia diedi kpole. (Gyima ne 15:32) Mrenyia ɛhye mɔ eza di yɛ nyunlu wɔ edwɛkɛhanlɛ gyima ne anu, bɛ nee yɛ dua na bɛtete yɛ wɔ daselɛlilɛ foa kɔsɔɔti anu.

Bɛmaa yɛ nuhua ko biala anwosesebɛ. Amaa bɛali yɛ sunsum nu ngyianlɛ nwo gyima la, bɛkpɔla yɛ wɔ yɛ azua nu anzɛɛ wɔ Belemgbunlililɛ Asalo ɛkɛ amaa bɛagyinla Ngɛlɛlera ne azo bɛaboa yɛ na bɛakyekye yɛ rɛle.​—Gyemise 5:14, 15.

Ɛye gyima ɛhye mɔɔ bɛyɛ ye wɔ asafo ne anu la ɛsie ahane a, eza bɛyɛ gyima yɛɛ bɛlɛ abusua nu ɛzonlelilɛ mɔɔ die bɛ mekɛ a. Ɔfɛta kɛ yɛbu mediema ɛhye mɔ mɔɔ bɛbɔ mɔdenle la.​—1 Tɛsalonaekama 5:12, 13.

• Gyima boni a asafo nu mgbanyima yɛ a?

• Kɛzi mgbanyima ne mɔ kile kɛ bɛ nye die yɛ nwo ɛ?