ƐZUKOALƐDEƐ 3

Kɛzi Bɛnwunle Baebolo Ne Anu Nɔhalɛ Ne Bieko Ɛ?

Mrenyia ekpunli bie ɛlɛsukoa Baebolo ne wɔ 1870 ne anu — Baebolo Sukoavoma, 1870 ne anu

Nrenyia bie ɛlɛkenga Ɛzinzalɛ Arane ne mɔɔ limoa la — *Ɛzinzalɛ Arane* mɔɔ limoa, 1879

Raalɛ bie lɛ Ɛzinzalɛ Arane ne nee Awake! — Ɛnɛ *Ɛzinzalɛ Arane* ne

Baebolo ne hanle kɛ wɔ Kelaese ewule nzi, adalɛ kilehilevolɛma vi alimoa Kilisienema avinli bɛadwazo na bɛazɛkye Baebolo ne anu nɔhalɛ ne. (Gyima ne 20:29, 30) Nzinlii, yemɔ pɛpɛɛpɛ a zile a. Bɛvale awozonlezonlenlɛ adwenle bɛfonlanle Gyisɛse ngilehilelɛ ne, na adalɛ Kilisienezonlenlɛ bɔle ɔ bo. (2 Timote 4:3, 4) Kɛ ɔkɛyɛ na yɛanwu ye wienyi kɛ ɛnɛ yɛnyia ndelebɛbo kpalɛ ne mɔɔ Baebolo ne kilehile amgba la ɛ?

Mekɛ dwule kɛ Gyihova maa nɔhalɛ ne da ali. Ɔhanle ɔdole ɛkɛ ne kɛ ‘awieleɛ mekɛ ne anu, nɔhalɛ ndelebɛbo babu.’ (Daneɛle 12:4) Wɔ 1870 ne anu, menli ekpunli ekyi bie mɔɔ kulo kɛ bɛnwu nɔhalɛ ne la nwunle kɛ asɔne nu ngilehilelɛ dɔɔnwo ɛngyi Ngɛlɛlera ne azo. Yemɔti, bɛbɔle ɔ bo kɛ bɛkpondɛ Baebolo nu mɔlebɛbo ngilehilelɛ ne anwo ndelebɛbo, na Gyihova maanle bɛnyianle sunsum nu nwunu.

Nɔhavoma zukoale Baebolo ne kpalɛ. Baebolo Sukoavoma zɔhane mɔ mɔɔ limoa yɛ nyunlu la luale adenle ko ne ala mɔɔ yɛdua zo ɛnɛ la azo zukoale debie. Bɛzuzule Baebolo ne anu edwɛkɛ ko biala anwo. Saa bɛnwu Baebolo nu edwɛkɛ bie mɔɔ ɔyɛ se kɛ bɛkɛde ɔ bo a, bɛkpondɛ ngyehyɛnu fofolɛ mɔɔ kilehile edwɛkɛ zɔhane anu la. Saa bɛnwu kɛ mɔɔ bɛzuzu nwo la nee Ngɛlɛlera ne mɔɔ ɛha la yia a, bɛkɛlɛ bɛto ɛkɛ. Ɔlua Baebolo ne mɔɔ bɛmaa ɔkilehile edwɛkɛ nu la azo, bɛnwunle Nyamenle duma ne nee Belemgbunlililɛ ne, bodane mɔɔ ɔlɛ ɔmaa alesama nee azɛlɛ ne, gyinlabelɛ mɔɔ mowuamra wɔ nu nee ewudwazo anyelazo ne anwo nɔhalɛ ne bieko. Bɛ neɛnleanu ne maanle bɛnyianle fanwodi wɔ adalɛ diedi nee nyɛleɛ ɛtane nwo.—Dwɔn 8:31, 32.

Ɔkadwu 1879 la, Baebolo Sukoavoma ne nwunle kɛ mekɛ ɛdwu kɛ bɛda nɔhalɛ ne ali wɔ ɛleka biala. Yemɔti wɔ zɔhane ɛvolɛ ne anu, bɛbɔle ɔ bo kɛ bɛyɛ Ɛzinzalɛ Arane Ɔbɔ Gyihova Belemgbunlililɛ Nolo mɔɔ bɛtɛyɛ ye ɛnɛ la. Kɛkala yɛlɛka Baebolo ne anu nɔhalɛ ne yɛahile menli wɔ maanle mɔɔ bo 240 la azo wɔ aneɛ mɔɔ bo 900 la anu. Ɛnɛ, nɔhalɛ ndelebɛbo ɛbu zo ɛdɛla mekɛ biala!

Kelaese ewule ne anzi, kɛ bɛyɛle Baebolo ne anu nɔhalɛ ne ɛ?
Duzu a ɛmaa yɛnwu Nyamenle Edwɛkɛ ne anu nɔhalɛ ne bieko a?