TILE 32

KƐZI BƐBƆLE GYISƐSE ANWO BANE LA

ƆYƐ A Gyihova dua nwanwane adenle zo yɛ ninyɛne bie mɔ fa bɔ ngakula mɔɔ ɛngola ɛmbɔ bɛ nwo bane la anwo bane. Saa ɛlua alienwo ɛleka bie a, ɛbanwu adenle ko mɔɔ Gyihova dua zo yɛ ɛhye la. Noko bie a mɔlebɛbo ne, ɛnrɛde mɔɔ ɛlɛkɔ zo la abo kpalɛ.

Ɛnwu kɛ aloma bie ɛdwu ɛ nwo ɛkɛ ne. Ɔzɔho kɛ yeboda. Ɔtwenle ɔ ndɛba ko aze noko saa ɛlɛbikye ye a ɛnee ɔlɛkɔ. Saa ɛdoa aloma ne a, ɛnee ɔlɛkɔ ɔ nzi. Akee aloma ne tu kɔ arɛlevilɛ nu. Amuanrɛɛ ɔtɛbodale fee! Ɛte mɔɔ aloma ne ɛlɛyɛ la abo ɔ?—

Wɔ ɛleka mɔɔ ɛlua mɔɔ aloma ne dwule ɛ nwo ɛkɛ ne la, ɛnee ɔ mra ne mɔ vea kpɔkɛ ne anu. Ɛnee aloma ne sulo kɛ ɛbanwu ɔ mra ne mɔ na wɔahu bɛ. Ɔti a ɔyɛle ɔ nwo kɛ yeboda na ɔmaanle ɛvile ɛkɛ ne la. Ɛze awie mɔɔ bahola abɔ yɛ nwo bane kɛ mɔɔ aloma bɔ ɔ mra nwo bane la ɔ?— Wɔ Baebolo ne anu, bɛva Gyihova bɛtoto kɔleɛ mɔɔ bɔ ɔ mra nwo bane la anwo.—Ditilɔnomi 32:11, 12.

Aloma bie mɔɔ ɛnwu kɛ ngakula ɛlɛba ɔ mra ne mɔ anwo ɛkɛ la ɛlɛtwenle ɔ ndɛba aze kɛ asɛɛ yɛboda la — Kɛzi aloma ɛhye ɛlɛbɔ ɔ mra ne mɔ anwo bane ɛ?

Gyihova Ara mɔɔ sonle bolɛ na ɔ nye die ɔ nwo kpalɛ la a le Gyisɛse. Mekɛ mɔɔ Gyisɛse wɔ anwuma la, ɛnee ɔle sunsum nu abɔdeɛ mɔɔ lɛ tumi kɛ ɔ Ze la. Ɛnee ɔkola ɔnea ɔ nwo. Noko mɔɔ bɛwole Gyisɛse kɛ adɔma wɔ azɛlɛ ye azo la, ɛnee ɔwɔ kɛ bɛnea ye. Ɛnee ɔhyia kɛ bɛbɔ ɔ nwo bane.

Amaa Gyisɛse ahola ayɛ Nyamenle ɛhulolɛdeɛ wɔ azɛlɛ ye azo la, ɛnee ɔwɔ kɛ ɔnyi ɔyɛ sonla kpanyinli mɔɔ di munli la. Noko, Seetan bɔle mɔdenle kɛ ɔbahu Gyisɛse wɔ ye ngakula nu. Mɔdenle mɔɔ Seetan bɔle kɛ ɔku Gyisɛse wɔ ye ngakula nu nee ndenle mɔɔ Gyihova luale zo bɔle ɔ nwo bane la le edwɛkɛ mɔɔ yɛ anyelielɛ. Ɛkulo kɛ ɛtie bie ɔ?—

Bɛwole Gyisɛse la yeangyɛ biala Seetan maanle ɛwɔlɔra bie vindele anwomanyunlu wɔ Aduduleɛ nehane. Nwɔlɔra neɛnleanuma bie doale ɛwɔlɔra ne too bɛhɔvindele Gyɛlusalɛm. Mɔɔ bɛdwule ɛkɛ ne la, bɛbizale ɛleka mɔɔ Dwuuma belemgbunli ne mɔɔ bɛwo ye la wɔ la. Mekɛ mɔɔ bɛbizale menli mɔɔ bɛze mɔɔ Baebolo ne ka ye wɔ ɛhye anwo la, bɛbuale kɛ: “Wɔ Bɛtelɛhɛm.”—Mateyu 2:1-6.

Nwɔlɔra neɛnleanuma ɛva ahyɛlɛdeɛ ɛrɛlɛ Mɛle nee Dwosefi kɛ bɛva bɛmaa Gyisɛse — Mekɛ mɔɔ nwɔlɔra neɛnleanuma ne hɔkpɔlale Gyisɛse la, kɔkɔbɔlɛ boni a Nyamenle vale maanle bɛ mɔɔ ɔbɔle Gyisɛse anwo bane a?

Mekɛ mɔɔ Gyɛlusalɛm Belemgbunli Hɛlɔdo atisesebɛ dele belemgbunli fofolɛ ɛhye mɔɔ bɛwo ye wɔ Bɛtelɛhɛm anwo edwɛkɛ la, ɔhanle ɔhilele nwɔlɔra neɛnleanuma ne kɛ: ‘Bɛhɔkpondɛ kakula ne kpalɛ na bɛrabɔ me amaneɛ.’ Ɛze deɛmɔti ɛnee Hɛlɔdo kpondɛ kɛ ɔnwu ɛleka mɔɔ Gyisɛse wɔ la ɔ?— Kɛmɔ ɛnee ɔ nye bolo ye na ɔkpondɛ kɛ ɔku ye la ati ɔ!

Kɛzi Nyamenle bɔle ɔ Ra ne anwo bane ɛ?— Mɔɔ nwɔlɔra neɛnleanuma ne nwunle Gyisɛse la, bɛhyɛle ye debie. Nzinlii, Nyamenle bɔle nwɔlɔra neɛnleanuma ne kɔkɔ wɔ ɛlalɛ nu kɛ bɛmmasia bɛkɔ Hɛlɔdo ɛkɛ ne bieko. Ɔti bɛluale adenle gyɛne zo bɛhɔle sua nu na bɛanzia bɛangɔ Gyɛlusalɛm. Mɔɔ Hɛlɔdo nwunle kɛ nwɔlɔra neɛnleanuma ne ɛhɔ la, ɔvale ɛya kpole. Kɛmɔ Hɛlɔdo bɔle mɔdenle kɛ ɔku Gyisɛse la ati, ɔmaanle bɛhunle ngakula mrenyia mɔɔ bɛtɛdwule ɛvolɛ nwiɔ mɔɔ bɛwɔ Bɛtelɛhɛm la kɔsɔɔti! Noko ɛnee Gyisɛse ɛnle ɛkɛ.

Ɛze kɛzi Gyisɛse vile ɛkɛ ne la ɔ?— Mekɛ mɔɔ nwɔlɔra neɛnleanuma ne hɔle sua nu la, Gyihova bɔle Mɛle ahu Dwosefi kɔkɔ kɛ ɔdwazo ɔnriandi ɔhɔ Yigyibiti mɔɔ wɔ moamoa la. Wɔ ɛkɛ ne, Gyisɛse anwo dɔle ye vile Hɛlɔdo atisesebɛ ne asa nu. Ɛvolɛ dɔɔnwo anzi, mɔɔ Mɛle nee Dwosefi yɛɛ Gyisɛse vi Yigyibiti ziale rale la, Nyamenle bɔle Dwosefi kɔkɔ bieko. Ɔhanle ɔhilele ye wɔ ɛlalɛ nu kɛ ɔhɔ Nazalɛte, na Gyisɛse anwo badɔ ye wɔ ɛkɛ ne.—Mateyu 2:7-23.

Dwosefi vale Mɛle nee Gyisɛse hɔle Yigyibiti amaa yeabɔ Gyisɛse anwo bane — Kɛzi bɛbɔle kakula Gyisɛse anwo bane bieko ɛ?

Wɔnwu kɛzi Gyihova bɔle ɔ Ra ne anwo bane la ɔ?— Ɛnea a nwane a le kɛ nloma mralɛ ne mɔ mɔɔ bɛ mame vale bɛ veale kpɔkɛ ne anu anzɛɛ ɔle kɛ Gyisɛse wɔ mekɛ mɔɔ ɔle kakula la ɛ? Asoo tɛ ɛdawɔ ɔ?— Menli bie wɔ ɛkɛ mɔɔ bɛkulo kɛ bɛyɛ wɔ amumuyɛ a. Ɛze menli holɛ ko ɔ?—

Baebolo ne ka kɛ Seetan le kɛ awenade mɔɔ luolua nu ɛlɛkpo la, ɔkpondɛ kɛ ɔkye yɛ ɔdi. Na kɛ mɔɔ awenade ta kye nane ngyikyi la, zɔhane ala a Seetan nee ye sunsum ɛtane ne mɔ anye sa ngakula a. (1 Pita 5:8) Noko Gyihova lɛ tumi kpole tɛla Seetan. Gyihova bahola abɔ ɔ mra nwo bane anzɛɛ ɔbaye debie ɛtane biala mɔɔ Seetan bava ayɛ bɛ la avi ɛkɛ.

Ɛkakye mɔɔ yɛzukoale ye wɔ buluku ɛhye Tile 10 ne anu mɔɔ ɔfale debie mɔɔ Abɔnsam nee ye sunsum ɛtane ne mɔ bɔ mɔdenle kɛ bɛmaa yɛayɛ la ɔ?— Nɔhalɛ nu, bɛlɛbɔ mɔdenle kɛ bɛmaa yɛava yɛ nwo yɛawula nla nu ngitanwolilɛ mɔɔ Nyamenle se ɔnle kpalɛ la anu. Nwane mɔ ala a ɔwɔ kɛ bɛnyia nla nu ngitanwolilɛ a?— Ɛhɛe, nrenyia nee raalɛ mɔɔ bɛnyi na bɛgya la ɔ.

Noko, ɔyɛ alɔbɔlɛ kɛ mgbanyima bie mɔ kulo kɛ bɛ nee ngakula da. Saa bɛyɛ zɔ a, ɔmaa ngakula mrenyia nee ngakula mraalɛ bɔ ɔ bo yɛ ninyɛndane mɔɔ bɛzukoa bɛvi mgbanyima ɛhye mɔ ɛkɛ la bie. Bɛdabɛ noko bɛbɔ ɔ bo bɛfa bɛ mrenyianu nee bɛ mraalɛnu bɛdi gyima wɔ adenle ɛtane zo. Ɛhye bie a zile wɔ mekɛ tendenle bie mɔɔ ɛze ɛhɔ la wɔ Sodɔm suakpole ne azo a. Baebolo ne ka kɛ, ‘ngakula mrenyia nee mgbanyima kɔsɔɔti mɔɔ wɔ ɛkɛ la,’ bɔle mɔdenle kɛ bɛ nee mrenyia ne mɔ mɔɔ rakpɔlale Lɔɔto la bala.—Gyɛnɛsese 19:4, 5.

Ɔti kɛ mɔɔ ɛnee ɔhyia kɛ bɛbɔ Gyisɛse anwo bane la, zɔhane ala a ɔhyia kɛ bɛbɔ ɛdawɔ noko ɛ nwo bane bɛfi mgbanyinli—⁠nee ngakula gyɛne bɔbɔ—mɔɔ kulo kɛ bɛ nee wɔ da la anwo a. Menli ɛhye mɔ ta yɛ bɛ nwo kɛ bɛ gɔnwo a le wɔ. Saa ɛka ɛkile bɛ kɛ ɛnrɛha debie biala mɔɔ bɛkulo kɛ bɛ nee wɔ yɛ la ɛnrɛhile awie a, bie a bɛbahyɛ wɔ debie bɔbɔ. Noko menli ɛhye mɔ le kɛ Seetan nee ye sunsum ɛtane ne mɔ la, bɛle angomedi, na bɛkulo kɛ bɛ nye die ala. Na bɛbɔ mɔdenle kɛ bɛ nee ngakula bala amaa bɛanyia anyelielɛ ɛhye. Ɛhye ɛnle kpalɛ fee!

Ɛze mɔɔ bɛbayɛ amaa bɛ nye alie la ɔ?— Bie a bɛbabɔ mɔdenle bɛava wɔ mrenyianu anzɛɛ wɔ mraalɛnu bɛali nwɔhoa. Noko ɔnle kɛ ɛmaa awie gyɛne biala fa wɔ mrenyianu anzɛɛ wɔ mraalɛnu di nwɔhoa. Ɔnle kɛ ɛmaa ɛ diema nrenyia anzɛɛ ɛ diema raalɛ anzɛɛ wɔ mame anzɛɛ wɔ papa bɔbɔ fa di nwɔhoa. Mmamaa awie gyɛne biala fa ɔ sa ka wɔ nvɛyeba ɛhye.

Kakula raalɛ bie ɛmaa ɔ sa zo na ɔlɛka yeahile nrenyia bie kɛ ɔmmasɔ ye ɛleka mɔɔ ɔnle kɛ ɔsɔ la — Saa awie kulo kɛ ɔsɔ wɔ ɛleka mɔɔ ɔnle kɛ ɔsɔ a duzu a ɔwɔ kɛ ɛka a yɛɛ duzu a ɔwɔ kɛ ɛyɛ a?

Kɛ ɔkɛyɛ na wɔabɔ ɛ nwo bane wɔavi menli mɔɔ yɛ ninyɛndane ɛhye mɔ la anwo ɛ?— Mɔɔ limoa la, mmamaa awie biala fa wɔ mrenyianu anzɛɛ wɔ mraalɛnu di nwɔhoa. Saa awie bɔ mɔdenle kɛ ɔyɛ zɔ a, maa ɛ nye ɛbolo ka ye kpole kɛ: “Gyakyi! Mekaha!” Saa ahenle ka kɛ ɛdawɔ a wɔmaa yeyɛ wɔ zɔ a, mmadie ye ɛdi. Ɔnle nɔhalɛ. Saa ɔle nwane bɔbɔ a, kɔha mɔɔ yeva yeyɛ wɔ la! Saa ɔka kɛ mɔɔ bɛlɛyɛ la bɛ mu nwiɔ ala a bɛze bɔbɔ a ka kile awie. Saa ahenle ka kɛ ɔbahyɛ wɔ ninyɛne ngɛnlɛma anzɛɛ ɔnwunlonwunla wɔ bɔbɔ a, nriandi fi ɔ nwo ɛkɛ na ka mɔɔ yeyɛ la kile awie.

Ɔnle kɛ ɛsulo, noko ɔwɔ kɛ ɛnea ɛ nwo boɛ kpalɛ. Saa wɔ awovolɛ bɔ wɔ kɔkɔ wɔ menli bie mɔ anwo anzɛɛ ɛleka bie mɔɔ ɛkɔ a ɔbahola yeayɛ esiane yeamaa wɔ la a, ɔwɔ kɛ ɛtie bɛ. Saa ɛtie bɛ a, ɔnrɛmaa awie mɔɔ le amumuyɛ la asa ɛnrɛha wɔ na yeagyegye wɔ.

Kenga kɛzi ɛbahola wɔabɔ ɛ nwo bane wɔavi adwɔmane ɛbɛla nwo la anwo debie wɔ Gyɛnɛsese 39:7-12; Mrɛlɛbulɛ 4:14-16; 14:15, 16; 1 Kɔlentema 6:18; yɛɛ 2 Pita 2:14.