GYISƐSE LƐ SUNSUM ƐTANE NE MƆ ANWO ZO TUMI

ASOO ɛkakye deɛmɔti Nyamenle anwumabɔvolɛ ne mɔ ko rayɛle Seetan Abɔnsam la ɔ?​— Kɛmɔ ɛnee ɔkulo kɛ bɛsonle ye la ati a ɔdwazole ɔtiale Nyamenle a. Asoo anwumabɔvolɛma gyɛne doale Seetan?​— Ɛhɛe, bɛlile ɔ nzi. Baebolo ne fɛlɛ bɛ ‘Seetan anwumabɔvolɛma’ anzɛɛ sunsum ɛtane.​—Yekile 12:9.

Asoo sunsum ɛtane ɛhye mɔ die Nyamenle di ɔ?​— Baebolo ne ka kɛ, ‘Sunsum ɛtane ne mɔ die di kɛ Nyamenle wɔ ɛkɛ.’ (Gyemise 2:19) Noko kɛkala bɛsulo. Ɔluakɛ bɛze kɛ Nyamenle bahwe bɛ nzo wɔ ninyɛndane mɔɔ bɛyɛ la anwo. Duzu a bɛyɛ a?​—

Baebolo ne ka kɛ anwumabɔvolɛma zɔhane mɔ andɛnla ɛleka mɔɔ ɛnee bɛde wɔ anwuma la na bɛhakyile bɛ nwo mrenyia bɛradɛnlanle azɛlɛ ye azo. Bɛyɛle ɛhye ɔluakɛ ɛnee bɛkulo kɛ bɛ nee azɛlɛ ye azo mraalɛ mɔɔ anwo yɛ fɛ la da. (Gyɛnɛsese 6:1, 2; Dwuudu 6) Duzu a le nla?​—

Nla a le mekɛ mɔɔ nrenyia nee raalɛ kɛva bɛ nwo la. Ɛhye anzi, raalɛ ne kola nrenzɛ. Noko ɔle ɛtane kɛ anwumabɔvolɛma nee menli kɛla. Nyamenle kpondɛ kɛ nrenyia nee raalɛ mɔɔ bɛgya la ala a da a. Amaa saa bɛwo a, kunli ne nee yelɛ ne ahola anlea kakula ne.

Mekɛ mɔɔ anwumabɔvolɛ ne mɔ hakyile bɛ nwo menli na bɛ nee mraalɛ lale wɔ azɛlɛ ye azo la, bɛ mra ne mɔ nyinle yɛle kakanyinlima. Ɛnee bɛ ti yɛ se kpalɛ yɛɛ bɛyɛ menli amumuyɛ. Ɔti Nyamenle vale azuyilɛ kpole bie razɛkyele kakanyinlima ne nee ɛtanevolɛma kɔsɔɔti. Noko ɔmaanle Nowa bobɔle ɛlɛne ɔvale ɔliele menli ekyi bie mɔɔ yɛle kpalɛ la. Kilehilevolɛ Kpole ne hanle kɛ ɔwɔ kɛ yɛkakye mɔɔ zile wɔ Azuyilɛ ne anu la.​—Gyɛnɛsese 6:3, 4, 13, 14; Luku 17:26, 27.

Mɔɔ Azuyilɛ ne rale la, ɛze mɔɔ dole anwumabɔvolɛ zɔhane mɔ ɔ?​— Bɛgyakyile bɛ sonlabaka ne ɛkɛ na bɛziale bɛhɔle anwuma. Noko bɛangola bɛanyɛ Nyamenle anwumabɔvolɛma bieko, ɔti bɛrayɛle Seetan anwumabɔvolɛma anzɛɛ sunsum ɛtane. Na duzu a dole bɛ mra kakanyinlima ne mɔ a?​— Bɛwule wɔ Azuyilɛ ne anu. Na zɔhane ala a menli kɔsɔɔti mɔɔ andie Nyamenle la noko wule a.

Ɔvi Azuyilɛ mekɛ ne azo too mɔɔ ba la, Nyamenle ɛtɛmaanle sunsum ɛtane ne mɔ adenle kɛ bɛhakyi bɛ nwo menli bieko. Yɛngola yɛnnwu sunsum ɛtane ne mɔ bɔbɔ ɛdeɛ, noko bɛbɔ mɔdenle kɛ bɛmaa menli ayɛ ninyɛndane. Bɛlɛmaa ngyegyelɛ dɔɔnwo ahɔ zo adɛla mekɛ biala. Bɛlɛyɛ ɛhye ɔluakɛ bɛvuandi bɛ bɛvi anwuma bɛragua azɛlɛ ye azo.

Ɛze deɛmɔti yɛngola yɛnnwu sunsum ɛtane mɔ la ɔ?​— Kɛmɔ bɛle sunsum la ati ɔ. Noko yɛze kɛ bɛwɔ ɛkɛ. Baebolo ne ka kɛ Seetan ‘ɛlɛbɛlɛbɛla menli mɔɔ wɔ azɛlɛ ye azo la amuala,’ na ye sunsum ɛtane ne mɔ a ɛlɛboa ye a.​—Yekile 12:9, 12.

Asoo Abɔnsam nee ye sunsum ɛtane ne mɔ bahola abɛlɛbɛla yɛdayɛ noko?​— Ɛhɛe, saa yɛannea boɛ a bɛbabɛlɛbɛla yɛ. Noko ɔnle kɛ yɛsulo. Kilehilevolɛ Kpole ne hanle kɛ: ‘Abɔnsam ɛnlɛ me nwo zo tumi biala.’ Saa yɛkɔ zo yɛbikye Nyamenle a, ɔbabɔ yɛ nwo bane yeavi Abɔnsam nee ye sunsum ɛtane ne mɔ anwo.​—Dwɔn 14:30.

Ɔhyia kɛ yɛnwu ninyɛndane mɔɔ sunsum ɛtane ne mɔ babɔ mɔdenle kɛ bɛmaa yɛayɛ la. Ɔti dwenle nwolɛ. Ninyɛndane boni mɔ a sunsum ɛtane ne mɔ yɛle wɔ mekɛ mɔɔ bɛrale azɛlɛ ye azo la ɛ?​— Kolaa na Azuyilɛ ne ara la, bɛ nee mraalɛ lale, ɛnee ɛhye le debie mɔɔ ɔnle kpalɛ kɛ anwumabɔvolɛma yɛ a. Ɛnɛ saa menli ɛnli Nyamenle mɛla mɔɔ fale nla nwo la azo a sunsum ɛtane ne mɔ anye die. Maa membiza wɔ, Nwane mɔ a ɔwɔ kɛ nee bɛ nwo da a?​— Wɔyɛ deɛ, agyalɛma ala ɔ.

Ɛnɛ ngakula mrenyia nee ngakula mraalɛ bie mɔ fa bɛ nwo wula nla nu, noko ɛhye ɛnle kpalɛ. Baebolo ne ka awie “mrenyianu” anwo edwɛkɛ. (Lɛvitikɔso 15:1-3) Raalɛ noko lɛ ye mraalɛnu. Bodane titili bie ati a Gyihova bɔle sonlabaka ne nvɛyeba ɛhye mɔ a, na agyalɛma ala a ɔwɔ kɛ fa die bɛ nye a. Saa menli yɛ ninyɛne mɔɔ Gyihova kyi la a ɔmaa sunsum ɛtane ne mɔ anye die. Kɛ neazo la, saa kakula nrenyia nee kakula raalɛ fa bɛ mrenyianu nee bɛ mraalɛnu di nwɔhoa a ɔyɛ sunsum ɛtane ne mɔ fɛ. Yɛngulo kɛ yɛmaa sunsum ɛtane ne mɔ anye die, ɔnle zɔ ɔ?​—

Debie bieko wɔ ɛkɛ mɔɔ sunsum ɛtane ne mɔ kulo noko Gyihova kyi a. Ɛze deɛ holɛ ko ɔ?​— Basabasayɛlɛ. (Edwɛne 11:5) Basabasayɛlɛ a le mekɛ mɔɔ menli kɛyɛ amumuyɛ na bɛkɛboda awie mɔ la. Kakye kɛ ɛhye a kakanyinlima ne, mɔɔ le sunsum ɛtane ne mɔ amra la yɛle a.

Sunsum ɛtane ne mɔ eza kulo kɛ bɛnwunlonwunla menli. Ɔyɛ a bɛyɛ bɛ nwo kɛ menli mɔɔ ɛwu la. Bie a bɛfa menli mɔɔ ɛwu la ane bɛtendɛ bɔbɔ. Sunsum ɛtane ne mɔ dua adenle ɛhye azo bɛlɛbɛla menli dɔɔnwo bɛmaa bɛdie bɛdi kɛ mowuamra wɔ ɛkɛ na bɛkola bɛ nee anyewɔzoamra tendɛ. Nɔhalɛ nu, sunsum ɛtane ne mɔ maa menli dɔɔnwo die di kɛ nwomenle wɔ ɛkɛ.

Ɔti ɔwɔ kɛ yɛmaa yɛ nye da ɛkɛ amaa Seetan nee ye sunsum ɛtane ne mɔ ambɛlɛbɛla yɛ. Baebolo ne bɔ kɔkɔ kɛ: ‘Seetan bɔ mɔdenle yɛ ɔ nwo kɛ wienyi nu anwumabɔvolɛ, na zɔhane a ye azonvolɛ noko de a.’ (2 Kɔlentema 11:14, 15) Noko, sunsum ɛtane ne mɔ ɛnle kpalɛ fee. Maa yɛnlea kɛzi bɛbɔ mɔdenle kɛ bɛmaa yɛayɛ kɛ bɛdabɛ la.

Nienwu a menli sukoa basabasayɛlɛ nee nla yɛɛ sunsum nu abɔdeɛ nee nwomenle nwo edwɛkɛ a?​— Asoo tɛ tɛlevihyɛne nee vidio mɔɔ bɛnea, kɔmpita nee fonu mɔɔ bɛfa bɛkɔ yintanɛte zo yɛɛ agɔnwolɛ ɛtane mɔɔ bɛ nee bɛ tu la a bɛsukoa bɛfi bɛ ɛkɛ a? Saa yɛyɛ ninyɛne ɛhye mɔ a, ɛnea a nwane a ɔmaa yɛbikye ye kpalɛ a, Nyamenle anzɛɛ Abɔnsam nee ye sunsum ɛtane ne mɔ? Kɛzi ɛnwu ye ɛ?​—

Ɛnea a nwane a kulo kɛ yɛtie na yɛnea ninyɛne mgbane mgbane a?​— Seetan nee ye sunsum ɛtane ne mɔ ɔ. Ɔti, duzu a ɔwɔ kɛ yɛyɛ a?​— Ɔwɔ kɛ yɛkenga, yɛtie na yɛnea ninyɛne mɔɔ le kpalɛ maa yɛ na ɔbaboa yɛ yeamaa yɛazonle Gyihova la. Ɛze ninyɛne mgbalɛ ɛhye mɔ bie mɔɔ yɛbahola yɛayɛ la ɔ?​—

Saa yɛyɛ mɔɔ le kpalɛ la a, ɔnle kɛ yɛsulo sunsum ɛtane ne mɔ. Gyisɛse lɛ tumi kpole tɛla bɛ yɛɛ bɛsulo ye. Kenle ko bie sunsum ɛtane mɔ bizale Gyisɛse kɛ: “Wɔra kɛ ɛbazɛkye yɛ ɔ?” (Maake 1:24) Saa mekɛ dwu kɛ Gyisɛse sɛkye Seetan nee ye sunsum ɛtane ne mɔ a ɔnrɛyɛ yɛ fɛ ɔ?​— Kɔkpula zɔhane mekɛ ne, yɛbahola yɛanyia anwodozo kɛ saa yɛbikye Gyisɛse nee ɔ Ze mɔɔ wɔ anwuma la a ɔbabɔ yɛ nwo bane yeavi sunsum ɛtane ne mɔ anwo.