Gyisɛse Kulo Ngakula Edwɛkɛ

NEA kɛ Gyisɛse de ɛke mɔɔ yeva ɔ sa yedo kakula nrenya ne akɔme ɛ. Ɛkola ɛnwu ye kɛ Gyisɛse kulo ngakula edwɛkɛ amgba. Menli mɔɔ ɛlɛnea la le ye ɛzoanvolɛma. Duzu edwɛkɛ a Gyisɛse ɛlɛka ahile bɛ a? Maa yɛnlea.

Kɛkala a Gyisɛse nee ye ɛzoanvolɛma ne vi adenle tendenle bie mɔɔ bɛdule la ɛra a. Bɛlua adenle ne anu la ɛzoanvolɛma ne zule bɛ nwo kpolera. Yemɔti bɛvi adenle ne bɛrale la Gyisɛse bizale bɛ kɛ: ‘Duzu a bɛzule nwolɛ kpolera wɔ adenle nu a?’ Nɔhalɛ nu, ɛnee Gyisɛse ze mɔɔ bɛzule nwolɛ kpolera la. Noko ɔbizale bɛ ɔnleanle saa ɛzoanvolɛma ne kɛha kɛhile ye a.

Ɛzoanvolɛma ne anye ɔ nloa, ɔluakɛ bɛlua adenle ne anu la ɛnee bɛlɛsu kpolera kɛ bɛ nuhua boni a le kpole wɔ bɛ avinli a. Ɛzoanvolɛma ne bie mɔ kpondɛ kɛ bɛbu bɛ nwo kɛ bɛ nwo hyia tɛla bɛ gɔnwo mɔ. Kɛzi Gyisɛse bahile bɛ kɛ ɔnle kpalɛ kɛ bɛkɛhulo kɛ bɛkɛyɛ kpole ɛ?

Ɔvɛlɛle kakula nrenya ne, na ɔmanle ɔragyinlanle bɛ nyunlu ɛkɛ ne. Akee ɔzele ye ɛdoavolɛma ne kɛ: ‘Bɛhakye ɛhye, Kyesɛ bɛkakyi bɛ nyɛleɛ na bɛyɛ kɛ ngakula la, anrɛɛ bɛnrɛnwu Nyamenle belemgbunlililɛ ne ɛlɛ. Mɔɔ le kpole kpalɛ wɔ belemgbunlililɛ ne anu la a le sonla ne mɔɔ bɛlɛ ɔ nwo aze na ɔyɛ kɛ kakula ɛhye la.’ Asoo ɛze deɛ mɔɔ ɔti Gyisɛse hanle ɛhye la ɔ?

Mɔɔ ɔde a le kɛ ngakula ɛndwenle kɛ bɛkɛyɛ kpole anzɛɛ bɛ nwo kɛhyia kɛdɛla kɛ awie mɔ si de la. Yemɔti ɔwɔ kɛ ɛzoanvolɛma ne sukoa kɛ bɛkɛyɛ kɛ ngakula wɔ adenle ɛhye azo na bɛgyakyi kpole mɔɔ bɛyɛ anzɛɛ bɛ nwo mɔɔ ɔkyia la anwo kpolera ɛzulɛ.

Mekɛ gyɛne noko wɔ ɛkɛ mɔɔ Gyisɛse manle bɛnwunle kɛzi ɔkulo ngakula la. Mekɛ ekyi bie anzi menli bie vale ngakula rale Gyisɛse anwo ɛkɛ ne. Ɛzoanvolɛma ne bɔle mɔdenle kɛ bɛfoa bɛ. Na Gyisɛse hanle hilele ye ɛzoanvolɛma ne kɛ: ‘Bɛgyakyi ngakula ne mɔ bɛmaa bɛrɛla me nwo, bɛmmatua bɛ, na bɛdabɛ mɔɔ bɛle kɛ ɛhye mɔ zɛhae la yɛɛ Nyamenle belemgbunlililɛ ne le bɛ ɛdeɛ a.’ Akee Gyisɛse manle ngakula ne mɔ zo ngoko ngoko, na ɔyilale bɛ. Asoo ɔnyɛ anyelielɛ kɛ yɛkɛnwu kɛ Gyisɛse kulo ngakula edwɛkɛ?