Gyisɛse Maa Menli Dɔɔnwo Aleɛ

EDWƐKƐ mɔɔ ɛzi la ɛnle kpalɛ fee. Kɛkala ala a bɛhu Dwɔn Sɔnevolɛ ne a. Ɛnee Hɛlɔdease mɔɔ le belemgbunli ne aye ne la ɛngulo Dwɔn edwɛkɛ. Na ɔholale ɔnyianle belemgbunli ne ɔmanle ɔpɛle Dwɔn ati.

Mekɛ mɔɔ Gyisɛse dele edwɛkɛ ɛhye la, ɔlile nyane dɔɔnwo. Ɔ ngomekye ɔhɔle ɛleka bie mɔɔ ɛkɛ ne le koonwu la. Noko menli ne lile ɔ nzi. Mɔɔ Gyisɛse nwunle menli dɔɔnwo ne la, ɔlile bɛ nwo nyane. Yemɔti ɔhanle Nyamenle belemgbunlililɛ ne anwo edwɛkɛ ɔhilele bɛ, na ɔyɛle wuleravolɛma mɔɔ wɔ nu la ayile.

Ye nɔsolɛ nu, ye ɛdoavolɛma ne rahanle hilele ye kɛ: ‘Aleɛ asɛɛ ɛdwo, yɛɛ ɛke noko ɛmbikye sua zo. Yemɔti maa menli ne adenle maa bɛhɔ namunamu ne mɔ azo bɛhɔkpondɛ debie bɛli.’

Gyisɛse buale bɛ kɛ: ‘Ɔngyia kɛ bɛkɛhɔ. Bɛdabɛ bɛmaa bɛ debie bɛli.’ Gyisɛse bizale Felepe kɛ: ‘Nienwu a yɛkɛnyia aleɛ yɛkɛdɔ yɛkɛmaa menli ɛwolaa ɛhye a?’

Felepe buale kɛ: ‘Amaa awie biala anyia ekyi bɔbɔ ali la, ɔwɔ kɛ yɛnyia ezukoa dɔɔnwo yɛtɔ aleɛ dɔɔnwo.’ Andelu hanle kɛ: ‘Kakula nrenya ɛhye, mɔɔ zo yɛ aleɛ ne la, lɛ kpanwo mumua nnu yɛɛ fɛlɛ nwiɔ. Na ɛhye ɛnrɛdwu bɛ ɛleka bie.’

Gyisɛse zele bɛ kɛ: ‘Bɛmaa menli ne ɛdɛnlɛdɛnla ndile ne azo.’ Akee ɔyɛle Nyamenle mo wɔ aleɛ ne anwo, na ɔbɔle ɔ bo ɔbubule nuhua ngyikyi ngyikyi. Akee, ɛdoavolɛma ne vale kpanwo ne nee fɛlɛ ne manle menli ne kɔsɔɔti. Ɛnee mrenya 5,000, yɛɛ mraalɛ nee ngakula apenle apenle dɔɔnwo a wɔ ɛkɛ a. Bɛ muala bɛlile bɛmanle bɛ ko yile. Na mɔɔ ɛdoavolɛma ne sesale ɔ bo zo ne mɔɔ hale la, ɔyile ahɛndɛne 12!

Gyisɛse akee manle ye ɛdoavolɛma ne vole ɛlɛne nu kɛ bɛlua Galeli Nyevile ne azo bɛhɔ. Ye nɔe ne, ahumu kpole bie dule, na azudulɛ ne bɔle tiale ɛlɛne ne. Ɛdoavolɛma ne ahonle dule kpole. Akee, ɔdwule akɔlɛmɔleɛ la, bɛnwunle kɛ awie bie lua azule ne anye ɛlɛba bɛ nwo ɛkɛ. Bɛvale ɛzulolɛ bɛdeɛdeanle nu, ɔluakɛ ɛnee bɛnze deɛ mɔɔ bɛnwu ye la.

Gyisɛse zele bɛ kɛ: ‘Bɛmmasulo. Medame ɔ!’ Noko bɛanlie bɛanli. Yemɔti Pita hanle kɛ: ‘Awulae, saa amgba ɛdawɔ a, ɛnee maa adenle maa medame mendia azule ye anye membɛla ɛ nwo ɛkɛ.’ Gyisɛse buale kɛ: ‘Bɛla!’ Na Pita dwule na ɔbɔle ɔ bo kɛ ɔtia azule ne anye! Noko akee ye ahonle dule na ɔbɔle ɔ bo kɛ ɔnoma, na Gyisɛse zɔle ye nu.

Nzinlii, Gyisɛse manle menli apenle apenle aleɛ bieko. Wɔ mekɛ ɛhye anu ɔvale kpanwo nsuu yɛɛ fɛlɛ ngyikyi nwiɔ. Na eza bɛ kɔsɔɔti bɛnyianle dɔɔnwo bɛlile. Asoo kɛzi Gyisɛse nea menli la ɛnyɛ nwanwane? Mekɛ mɔɔ ɔbali tumi kɛ Nyamenle belemgbunli la ɔnrɛhyia kɛ yɛkɛdwenle debie biala anwo bieko!