Asoo Gyihova Alasevolɛ Tinlitinli Bɛ Mra Nwo Zo Maa Bɛdie Bɛ Ɛzonlenlɛ Ne Bɛto Nu Ɔ?

Kyɛkyɛ, ɔluakɛ Nyamenle ɛzonlenlɛ le awie ati anwo kpɔkɛzilɛ. (Wulomuma 14:12) Gyihova Alasevolɛ kilehile bɛ mra Baebolo ngyinlazo, noko saa bɛnyi a ɔwɔ kɛ bɛ nuhua ko biala si ɔ ti anwo kpɔkɛ kɛ ɔbayɛ Gyihova Dasevolɛ anzɛɛ ɔnrɛyɛ.—Wulomuma 12:2; Galeehyeama 6:5.

Gyihova Alasevolɛ kulo kɛ ɔwie bɛ mra boɛ kɛ mɔɔ awovolɛ dɔɔnwo kpondɛ la. Bɛkilehile bɛ mra ninyɛne mɔɔ bɛsuzu kɛ ɔbaboa bɛ la: sua nu gyimayɛlɛ, ɛbɛla kpalɛ ɛbɔlɛ nee bɛ diedi ne. Gyihova Alasevolɛ die di kɛ Baebolo ne maa bɛbɔ ɛbɛla kpalɛ, ɔti bɛbɔ mɔdenle bɛ nee bɛ mra sukoa na bɛ nee bɛ bɔ nu kɔ debiezukoalɛ amaa bɛava Baebolo ne anu ngyinlazo ne mɔ bɛabɔ bɛ ɛbɛla. (Ditilɔnomi 6:6, 7) Akee saa kakula ko biala nyi a, ɔbahola yeazi kpɔkɛ kɛ ɔbalie ye awovolɛ diedi ne yeado nu anzɛɛ ɔnrɛyɛ zɔ.

Asoo Gyihova Alasevolɛ sɔne mbɔdɔma?

Kyɛkyɛ. Baebolo ne ɛnlie mbɔdɔma mɔɔ bɛsɔne bɛ la ɛndo nu. Kɛ neazo la, ɔmaa yɛnwu kɛ alimoa Kilisienema dele edwɛkɛ ne, ‘bɛvale anyelielɛ bɛliele bɛlile’ na bɛnlunle bɛ nwo kolaa na bɛazɔne. (Gyima ne 2:14, 22, 38, 41) Ɔti saa bɛbazɔne awie a, ɔwɔ kɛ ahenle yɛ awie mɔɔ yenyi mɔɔ ɔkola ɔte mɔɔ Baebolo ne kilehile la abo, ɔdie ɔdi na ɔsi kpɔkɛ kɛ ɔbava mɔɔ yezukoa la yeabɔ ye ɛbɛla la. Adɔma ɛnrɛhola ɛnrɛyɛ ninyɛne ɛhye mɔ.

Saa ngakula ɛlɛnyi a, bie a bɛbazi kpɔkɛ kɛ bɛzɔne bɛ. Noko kolaa na bɛayɛ zɔ la, ɔwɔ kɛ bɛte kpɔkɛzilɛ zɔhane abo.

Asoo Gyihova Alasevolɛ kpo bɛ mra mɔɔ bɛammaa bɛanzɔne bɛ la?

Kyɛkyɛ. Saa awovolɛ mɔɔ bɛle Alasevolɛ ara bie anlie bɛ diedi ne ando nu a, bɛdi nyane. Noko bɛkulo bɛ ra ne, yɛɛ bɛmkpo ye ɔluakɛ yeanyɛ Dasevolɛ la ati.

Bɛnloma kakula nrenyia bie nzule nu bɛlɛsɔne ye. — Ɔwɔ kɛ awie biala, ɔnva nwo ɛvolɛ mɔɔ yeli la, si kpɔkɛ kɛ ɔbamaa bɛazɔne ye anzɛɛ ɔnrɛyɛ

Duzu ati a Gyihova Alasevolɛ nee bɛ mra kɔ daselɛlilɛ a?

Ndelebɛbo bie mɔ ati a yɛ nee yɛ mra ne mɔ kɔ daselɛlilɛ a.a

Baebolo ne ka kile awovolɛ kɛ ɔwɔ kɛ bɛkilehile bɛ mra Nyamenle anwo debie na bɛtete bɛ bɛmaa bɛsonle ye. (Ɛfɛsɛsema 6:4) Kɛmɔ awie diedi mɔɔ ɔka nwolɛ edwɛkɛ wɔ bagua nu la boka ye ɛzonlenlɛ nwo la ati, daselɛlilɛ ɛhɔlɛ le adenle titili ko mɔɔ bɛdua zo bɛkilehile kakula Nyamenle anwo debie a.—Wulomuma 10:9, 10; Hibuluma 13:15.
Baebolo ne mumua ne maa ngakula anwosesebɛ kɛ “bɛye Gyihova duma ne ayɛlɛ.” (Edwɛne 148:12, 13) Adenle titili ko mɔɔ bɛdua zo bɛye Nyamenle ayɛlɛ la a le kɛ bɛbaha ɔ nwo edwɛkɛ bɛahile awie mɔ.b
Saa ngakula nee bɛ awovolɛ kɔ daselɛlilɛ a, ɔboa bɛ wɔ adenle bie azo. Kɛ neazo la, ɔmaa bɛsukoa kɛ bɛ nee menli ngakyile kɔsɔɔti bɛadendɛ. Eza bɛnyia subane ngɛnlɛma le kɛ anwunvɔnezelɛ, atiakunlukɛnlɛma, ɛbulɛ nee kɛzi bɛdwenle awie mɔ anwo la. Daselɛlilɛ eza boa ngakula maa bɛte mɔɔ Baebolo ne ka ye wɔ bɛ diedi ne anwo la abo kpalɛ.

Asoo Gyihova Alasevolɛ di ɛvoyia ngakyile ne mɔ?

Gyihova Alasevolɛ ɛnli ɛzonlenlɛ nu ɛvoyia ngakyile anzɛɛ ɛvoyia gyɛne mɔɔ ɛnzɔ Nyamenle anye la.c (2 Kɔlentema 6:14-17; Ɛfɛsɛsema 5:10) Kɛ neazo la, yɛnli awolɛ kenle anzɛɛ Bolonyia mɔɔ ɛnvi Kilisiene ɛzonlenlɛ nu la.

Noko yɛkpondɛ mekɛ yɛ nee yɛ abusua ne bɔ nu die yɛ nye na yɛkyɛ yɛ mra ninyɛne. Yɛngendɛ mekɛ titili bie wɔ ɛvolɛ ne anu na yɛ nee yɛ abusua ne abɔ nu ayia na yɛahyɛ yɛ nwo debie, emomu, yɛyia nu na yɛkyɛ debie wɔ ɛvolɛ ne anu amuala.

Selɛ bie nee ɔ ye ɛlɛkyɛ bɛ ra raalɛ nee bɛ ra nrenyia debie. — Kilisiene awovolɛ anye die nwo kɛ bɛbahyɛ bɛ mra ninyɛne

Kɛzi bɛdabɛ mɔɔ bɛtetele bɛ kɛ Gyihova Alasevolɛ la te nganeɛ ɛ?

“Daselɛlilɛ maanle menwunle kɛ ɔwɔ kɛ mebu awie mɔ ɔnva nwo mɔɔ bɛdie bɛdi anzɛɛ kɛzi bɛ nee me di la. Eza saa yɛkɔ daselɛlilɛ a, menli ta ka bɛ ngyegyelɛ nwo edwɛkɛ kile yɛ. Ɔti kɛ anrɛɛ mebadwenle me ngome me nwo la, menzukoale kɛ mebadwenle awie mɔ nganeɛdelɛ nwo na meazuzu bɛ ngyianlɛ nwo.”—Tara.d
“Me awovolɛ antinlitinli me nwo zo kɛ menyɛ Dasevolɛ. Ɛnee dahuu bɛka bɛkile me kɛ mekola mesi kpɔkɛ. Mekɛ biala mɔɔ mekɛbiza me Mame Alasevolɛ ne mɔ diedi bie anwo kpuya la, ɔbua kɛ, ‘Wɔyɛ nwolɛ neɛnleanu ɔ?’ Ɔti menyɛle neɛnleanu dɔɔnwo na akee menliele menlile kɛ ɛhye le ɛzonlenlɛ mɔɔ ɔwɔ kɛ mekɔ bie a—na tɛ kɛ ɔle me awovolɛ ɛzonlenlɛ ala.”—Ellie.
“Meande nganeɛ kɛ ɛvoyia mɔɔ menli la ati ɛnee melɛminli debie. Ɛnee meyɛ ngyehyɛleɛ me nee Alasevolɛ gyɛne yɛ ninyɛne bɔ nu dapɛne awieleɛ biala. Yɛdi aleɛ, yɛsi agole na yɛdi nwɔhoa ngakyile. Ɛnee menli mɔɔ me nee bɛ kɔ sukulu la ta ka kɛ me nee me gɔnwo mɔ yɛ ninyɛne dɔɔnwo bɔ nu tɛla kɛzi bɛyɛ ye la.”—Melissa.
“Ɛnee mete deɛmɔti yɛnli Bolonyia la abo ɛdeɛ, noko ɔdwu mekɛ ne bie a mete nganeɛ kɛ melɛminli debie. Mɔɔ boale me maanle menlile zɔhane nganeɛdelɛ ne azo la a le kɛ, ɛnee me awovolɛ ta fɛlɛ me gɔnwo mɔ nee yɛ mbusuafoɔ ba yɛ sua nu ɛkɛ. Eza mekakye kɛ bɛhyɛle me ninyɛne.”—Miguel.

a Alasevolɛ ngakula ɛngɔ daselɛlilɛ wɔ mekɛ mɔɔ bɛ awovolɛ anzɛɛ kpanyinli bie mɔɔ ɔbanlea bɛ la ɛmboka bɛ nwo la.

b Baebolo ne ka ngakula dɔɔnwo mɔɔ bɛzɔle Nyamenle anye ɔlua bɛ diedi ne mɔɔ bɛhanle nwolɛ edwɛkɛ bɛhilele awie mɔ la azo.—2 Arelemgbunli 5:1-3; Mateyu 21:15, 16; Luku 2:42, 46, 47.

c Nea edwɛkɛ “Duzu Ati A Gyihova Alasevolɛ Ɛnli Ɛvoyia Bie Mɔ Ɛ?”

d Bɛhakyi menli ne bie mɔ aluma.