MOALƐ MAA ABUSUA
Kɛzi Bɛda Ɛhulolɛ Ali
Saa agyalɛ ɛlɛkyɛ a, ɛhulolɛ mɔɔ agyalɛma bie mɔ da ye ali kile bɛ nwo la azo te. Saa ɛhye ɛlɛkɔ zo wɔ wɔ agyalɛ nu a, ɔwɔ kɛ ɔgyegye wɔ ɔ?
Mɔɔ ɔwɔ kɛ ɛnwu ye la
Ɛhulolɛ nwo hyia na agyalɛ nu amia. Kɛ mɔɔ nzule nee aleɛ nwo hyia na yeanyia kpɔkɛdelɛ kpalɛ nee anwosesebɛ la, zɔhane ala a ɛhulolɛ mɔɔ bɛda ye ali dahuu la maa agyalɛ yɛ kɛnlɛma na nuhua mia a. Saa bɔbɔ bɛva ɛvolɛ dɔɔnwo bɛgya a, ɔhyia kɛ kunlima nee yelɛma nwu kɛ bɛ hu anzɛɛ bɛ ye mɔ kulo bɛ na bɛdwenle bɛ nwo kpalɛ.
Nɔhalɛ ɛlɔlɛ ɛnle angomedi. Ɔyɛ ninyɛne mɔɔ bamaa ɔ gɔnwo anye alie la. Yemɔti, kɛ anrɛɛ ɔbala ɛhulolɛ ali wɔ mekɛ mɔɔ ɔte nganeɛ ala la, kunli anzɛɛ yelɛ mɔɔ dwenle ɔ ye anzɛɛ ɔ hu anwo la bazuzu ninyɛne mɔɔ maa ɔ ye anzɛɛ ɔ hu anye die la anwo na yeabɔ mɔdenle yeayɛ yeamaa ye.
Fane dɔɔnwo ne ala, yelɛma hyia kɛ bɛbanwu kɛ bɛkulo bɛ tɛla kunlima. Bie a kunli bie kulo ɔ ye kpalɛ kpalɛ. Noko saa ɔda ye ali wɔ alehyenlɛ ne mɔlebɛbo nee ye awieleɛ anzɛɛ mekɛ mɔɔ bɛlɛnyia nla nu ngitanwolilɛ la ala a, ɔ ye adwenle nu bayɛ ye kesee saa amgba ɔkulo ye a. Ɔle kpalɛ kɛ ɔbala ɛhulolɛ ali mekɛ biala wɔ alehyenlɛ ne anu.
Mɔɔ ɛbahola wɔayɛ la
Fa wɔ edwɛkɛ da wɔ ɛhulolɛ ali. Edwɛkɛ sikalɛ le kɛ “Me kulo wɔ” anzɛɛ “Ɛsonle bolɛ ɛmaa me” bamaa ɛ ye anzɛɛ ɛ hu ade nganeɛ kɛ ɔ nwo hyia wɔ.
Baebolo ngyinlazo: “Mɔɔ ɛyi ahonle nu la a finde bɛ nloa a.”—Mateyu 12:34.
Nzuzulɛ: Ɔngyia kɛ ɛfa ɛ nloa ala ɛda ɛhulolɛ ali. Kɛlɛ—wɔ kɛlata zo, e-mail, anzɛɛ text message nu.
Fa wɔ nyɛleɛ da ɛhulolɛ ali. Atuu ɛyɛlɛ, bɛ nloa nwo ɛvolɛ anzɛɛ ɔ sa ala mɔɔ ɛbazɔ la bala ye ali kɛ saa ɛka kɛ “Mekulo wɔ a” ɛnee ɔvi wɔ ahonle nu. Ɛbahola wɔazɔ ye nu, wɔava ɛ nye wɔanlea ye anzɛɛ wɔahyɛ ye debie. Eza ɛbahola wɔayɛ ninyɛne wɔaboa ɛ ye—bie a le kɛ ɛbalɛ ye baage, ɛbabuke anlenkɛ, ɛbakpuda ahyɛnze, ɛbakpo ninyɛne, anzɛɛ ɛbado aleɛ wɔamaa ye. Wɔ menli dɔɔnwo afoa nu, ɛhye ɛnle moalɛ ala—ɔkile kɛ ɛkulo bɛ!
Baebolo ngyinlazo: “Bɛmmamaa yɛfa yɛ edwɛkɛhanlɛ anzɛɛ yɛ nloa mgbane yɛkulo menli, emomu bɛmaa yɛyɛ ye wɔ nyɛleɛ nee nɔhalɛ nu.”—1 Dwɔn 3:18.
Nzuzulɛ: Ninyɛne mɔɔ ɛnee ɛyɛ ɛfa ɛkile kɛ ɛkulo ɛ ye anzɛɛ ɛ hu kolaa na bɛagya la, kɔ zo yɛ.
Bɛnyia mekɛ bɛmaa bɛ nwo. Bɛnyia mekɛ bɛmaa bɛ nwo a, ɔbamaa bɛ agyalɛ ne anu amia na yeamaa ɛ ye anzɛɛ ɛ hu anwu kɛ ɛ nye die kɛ ɛ nee ye bayɛ ninyɛne abɔ nu. Nɔhalɛ nu, saa bɛlɛ ngakula anzɛɛ gyima dɔɔnwo bɛyɛ wɔ alehyenlɛ ne anu a, ɔbayɛ se kɛ bɛbanyia mekɛ bɛamaa bɛ nwo. Bie a bɛbahola bɛayɛ ngyehyɛleɛ na bɛ mu nwiɔ ala badiedia.
Baebolo ngyinlazo: ‘Bɛnwu ninyɛne mɔɔ hyia kpalɛ la.’—Felepaema 1:10.
Nzuzulɛ: Agyalɛma bie mɔ mɔɔ bɛnlɛ alagye la ye nɔsolɛ bie anzɛɛ dapɛne awieleɛ bie sie ɛkɛ na bɛfa bɛfinde.
Nwu ɛ hu anzɛɛ ɛ ye kpalɛ. Mɔɔ fale ɛhulolɛ nwo la, asolo awie biala nee ye ngyianlɛ. Bɛha kɛzi bɛ nuhua ko biala kulo kɛ bɛda ɛhulolɛ ali bɛkile ye la bɛhile bɛ nwo na bɛnlea saa ɔhyia kɛ bɛyɛ nzenzaleɛ a. Akee bɔ mɔdenle yɛ mɔɔ ɛ hu anzɛɛ ɛ ye kulo la maa ye. Kakye kɛ, ɛhulolɛ nwo hyia na agyalɛ nu amia.
Baebolo ngyinlazo: “Ɛlɔlɛ . . . ɔnle angomedi.”—1 Kɔlentema 13:4, 5.
Nzuzulɛ: Kɛ anrɛɛ ɛbaha kɛ bɛhulo wɔ la, biza ɛ nwo kɛ, ‘Duzu a mebahola meayɛ amaa me ye anzɛɛ me hu ahulo me kpalɛ a?’