Kɛ Ɔkɛyɛ Na Wɔadɛnla Aze Dahuu Ɛ?
Baebolo ne bua kɛ
Baebolo ne bɔ ɛwɔkɛ kɛ: “Awie mɔɔ yɛ mɔɔ Nyamenle kpondɛ la badɛnla aze dahuu.” (1 Dwɔn 2:17, Holy Bible—Easy-to-Read Version) Duzu a Nyamenle kpondɛ kɛ ɛyɛ a?
Sukoa Nyamenle nee ɔ Ra Gyisɛse anwo debie. Gyisɛse hanle ye wɔ asɔneyɛlɛ nu hilele Nyamenle kɛ: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.” (Dwɔn 17:3) Duzu a Nyamenle nee Gyisɛse mɔɔ ‘yɛnwu’ bɛ la kile a? Yɛbahola yɛanwu bɛ ɔlua Baebolo ne mɔɔ yɛbazukoa na yɛava nuhua edwɛkɛ ne yɛabɔ yɛ ɛbɛla la azo.a Baebolo ne maa yɛnwu Gyihova Nyamenle mɔɔ le yɛ Bɔvolɛ nee yɛ ngoane Maavolɛ la adwenle wɔ ninyɛne nwo. (Gyima ne 17:24, 25) Eza Baebolo ne maa yɛnwu ɔ Ra Gyisɛse mɔɔ hilehilele “edwɛkɛ mɔɔ maa dahuu ngoane la.”—Dwɔn 6:67-69.
Nyia Gyisɛse ɛkpɔnenlɛ afɔlebɔlɛ ne anu diedi. Gyisɛse rale azɛlɛ ye azo kɛ “ɔbazonle na yeava ye ngoane yeayɛ ɛkpɔnedeɛ.” (Mateyu 20:28) Gyisɛse ɛkpɔnelɛ afɔlebɔlɛ ne ɛmaa alesama ɛnyia anyelazo kɛ bɛbadɛnla aze dahuu wɔ Paladaese azɛlɛ zo.b (Edwɛndolɛ 37:29) Gyisɛse hanle kɛ: “Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.” (Dwɔn 3:16) Yɛ ye nzonlɛ kɛ, saa yɛdie Gyisɛse yɛdi ala a ɛnee ɔtɛwiele. Ɔwɔ kɛ ‘yɛda diedi zɔhane ali,’ na yɛkpa kɛ yɛbali ye ngilehilelɛ zo na yeayɛ ɔ Ze ɛhulolɛdeɛ.—Mateyu 7:21; Gyemise 2:17.
Ɛ nee Nyamenle ɛnyia agɔnwolɛvalɛ mɔɔ anu yɛ se. Nyamenle kulo kɛ yɛtwe yɛbikye ye na yɛyɛ ɔ gɔnwo. (Gyemise 2:23; 4:8) Nyamenle wɔ ɛkɛ dahuu. Ɔnrɛwu ɛlɛ, yɛɛ ɔkulo kɛ ɔ gɔnwo mɔ noko tɛnla aze dahuu. Nyamenle ɛlua ye Edwɛkɛ ne azo yemaa yɛnwu mɔɔ ɔkulo kɛ ye azonvolɛ nyia la: “[Gyihova] ɛmaa bɛnyi bɛhyɛ!”—Edwɛndolɛ 22:26.
Adalɛ Edwɛkɛ Mɔɔ Fale Dahuu Asetɛnla Nwo
Adalɛ edwɛkɛ: Sonla mɔdenlebɔlɛ bahola amaa yɛadɛnla aze dahuu.
Nɔhalɛ edwɛkɛ: Anyuhɔlɛ mɔɔ bɛnyia ye wɔ ayileyɛlɛ nu la maa menli te nganeɛ kɛ bɛbadɛnla aze bɛahyɛ, noko mɔdenlebɔlɛ ɛhye ɛnrɛmaa alesama ɛnrɛdɛnla aze dahuu. Nyamenle ala a bahola amaa yɛ dahuu ngoane a, ɔluakɛ ɔ ngomekye ala a ɔle “ngoane nzufeanvea a.” (Edwɛndolɛ 36:9) Yebɔ ɛwɔkɛ kɛ “ɔbame ewule bɔkɔɔ,” na yeamaa alesama mɔɔ di nɔhalɛ la anyia dahuu ngoane.—Ayezaya 25:8; 1 Dwɔn 2:25.
Adalɛ edwɛkɛ: Maanle titili bie mɔ azo menli a badɛnla aze dahuu a.
Nɔhalɛ edwɛkɛ: Nyamenle ɛnyɛ nyeyenu. Emomu, “wɔ maanle biala anu awie biala mɔɔ sulo ye na ɔyɛ mɔɔ ɔle kpalɛ la, ɔdie ye ɔto nu.” (Gyima ne 10:34, 35) Awie biala mɔɔ tie Nyamenle la bahola adɛnla aze dahuu ɔnva nwo maanle anzɛɛ abusua mɔɔ ɔvi nu la.
Adalɛ edwɛkɛ: Dahuu ngoane asetɛnla bavonle yɛ.
Nɔhalɛ edwɛkɛ: Nyamenle ne mɔɔ kulo yɛ na ɔkulo kɛ yɛ nye die la yɛɛ ɛva dahuu ngoane ɛbɔ yɛ ɛwɔkɛ a. (Gyemise 1:17; 1 Dwɔn 4:8) Ɔze kɛ saa yɛ nye balie a, ɔwɔ kɛ yɛnyia gyima mɔɔ yɛ kunlu dwo nwo la yɛyɛ. (Nolobɔvo ne 3:12) Nyamenle ɛbɔ ɛwɔkɛ kɛ, menli mɔɔ badɛnla aze dahuu wɔ azɛlɛ ye azo la akunlu badwo bɛ nwo, bɛbanyia gyima kpalɛ bɛayɛ na bɛ nee bɛ alɔvolɛ anye alie.—Ayezaya 65:22, 23.
Bieko, menli mɔɔ badɛnla aze dahuu la bahɔ zo azukoa bɛ Bɔvolɛ ne nee ye nwanwane gyima ne mɔ anwo ninyɛne fofolɛ dɔɔnwo. Ɔbɔle sonla kɛ ɔdɛnla aze dahuu na ɔzukoa ɔ nwo debie dɔɔnwo ɔnva nwo bɔbɔ kɛ ‘ɔnrɛnwu mɔɔ Nyamenle ɛyɛ, ɔvi mɔlebɛbo mɔɔ kɔ awieleɛ’ la. (Nolobɔvo ne 3:10, 11) Yemɔti, menli mɔɔ badɛnla aze dahuu la bazukoa na bɛayɛ ninyɛne fofolɛ mɔɔ yɛ anyelielɛ la dahuu.
a Gyihova Alasevolɛ yɛ Baebolo ɛzukoalɛ mɔɔ bɛnlie ɛhwee a. Saa ɛkpondɛ nwolɛ edwɛkɛ dɔɔnwo a, nea Kɛzi Bɛyɛ Baebolo Ɛzukoalɛ Ɛ? vidio ne.
b Nea edwɛkɛ “Kɛzi Gyisɛse Die Ngoane Ɛ?”