MGBAVOLƐ NEE MBƐLƐRA BIZA KƐ
Asoo Mrenyia Mɔɔ Fa Mrenyia Nee Mraalɛ Mɔɔ Fa Mraalɛ La Ɛnle Kpalɛ?
“Melɛnyi la, ɛnee debie ko mɔɔ ɔyɛ se ɔmaa me kɛ mebagyinla ɔ nloa la a le ɛhulolɛ mɔɔ melɛ memaa menli mɔɔ me nee bɛ awodeɛ le ko la. Ɛnee mesuzu kɛ ɔbayɛ mekɛ ezinra nu debie, noko zɔhane nganeɛdelɛ ne tɛgyegye me.”—David, 23.
David le Kilisienenli mɔɔ ɔkulo kɛ ɔyɛ mɔɔ sɔ Nyamenle anye a. Asoo ɔbahola yeayɛ zɔ wɔ mekɛ mɔɔ ɔlɛ ɛhulolɛ ɔmaa menli mɔɔ ɔ nee bɛ awodeɛ le ko la? Kɛzi Nyamenle te nganeɛ wɔ mrenyia nee mrenyia yɛɛ mraalɛ nee mraalɛ nla nwo ɛ?
Duzu a Baebolo ne ka ye wɔ nwolɛ a?
Subane mɔɔ menli da ye ali wɔ mrenyia nee mrenyia yɛɛ mraalɛ nee mraalɛ nla nwo la le ngakyile wɔ maanle biala anu, yɛɛ ɔvi mekɛ mɔɔ kɔ mekɛ la ɔkakyi. Noko, tɛ mɔɔ menli dɔɔnwo die to la a Kilisienema fa bɔ bɛ ɛbɛla a, yɛɛ ‘bɛ ngilehilelɛ anwoma ne ɛmbɔ bɛ.’ (Ɛfɛsɛsema 4:14) Emomu, adwenle mɔɔ bɛlɛ ye wɔ awodeɛ ko nla (nee subane ngakyile) nwo la gyi Baebolo nu ngyinlazo zo.
Baebolo ne fa awodeɛ ko nla nwo ngyinlazo mɔɔ anu la ɛkɛ la maa. Nyamenle Edwɛkɛ ne ka kɛ:
“Ɔnle kɛ nrenya fa ɔ gɔnwo nrenya.”—Sɛlɛvolɛma 18:22.
“Kɛ mɔɔ bɛ ahonle nu atiakunluwɔzo ne de la . . . ati a Nyamenle ɛgyakyi bɛ ɛmaa nla nwo atiakunluwɔzo ɛtane la, bɔbɔ mraalɛ fa bɛ gɔnwo mɔ mraalɛ gyakyi mrenyia.”—Wulomuma 1:24, 26.
“Bɛmmabɛlɛbɛla bɛ nwo. Menli mɔɔ bɔ adwɔmane, awozonle ɛzonlenlɛma, agyalɛ ɛzɛkyelɛma, mrenyia mɔɔ maa mrenyia fa bɛ, mrenyia mɔɔ fa bɛ gɔnwo mɔ mrenyia, nwule, anyeboloma, nzama, menli mɔɔ bɔ aholoba, yɛɛ nzisima ɛnrɛnyia Nyamenle Belemgbunlililɛ ne.”—1 Kɔlentema 6:9, 10.
Nɔhalɛ nu, Nyamenle ngyinlazo ne mɔ fale awodeɛ ko nla yɛɛ nrenyia nee raalɛ nla nwo atiakunluwɔzo nwo. Nɔhalɛ edwɛkɛ ne a le kɛ, ɔwɔ kɛ awie biala komo ɔ nwo zo wɔ nganeɛdelɛ mɔɔ piepia ye maa ɔyɛ debie mɔɔ Nyamenle kyi la anwo.—Kɔlɔsaema 3:5.
Asoo ɛhye kile kɛ . . . ?
Asoo ɛhye kile kɛ Baebolo ne maa adenle maa yɛkpɔ mrenyia mɔɔ fa bɛ gɔnwo mɔ mrenyia la ɔ?
Kyɛkyɛ. Nɔhalɛ nu, Baebolo ne ɛnga kɛ yɛkpɔ menli mɔɔ fa bɛ nwo wula awodeɛ ko nla nu anzɛɛ menli mɔɔ bɔ adwɔmane la. Emomu, ɔka kɛ ‘yɛbɔ mɔdenle yɛmaa anzodwolɛ ɛdɛnla yɛ nee menli kɔsɔɔti avinli,’ ɔnva nwo ɛbɛla mɔɔ bɛbɔ la. (Hibuluma 12:14) Ɔti, ɔle nvonleɛ kɛ yɛbasisi bɛ, yɛakpɔ bɛ anzɛɛ yɛayɛ debie fofolɛ biala yɛatia bɛ.
Asoo ɛhye kile kɛ ɔwɔ kɛ Kilisienema dwazo tia mɛla mɔɔ fale awodeɛ ko agyalɛ nwo la ɔ?
Baebolo ne maa ɔda ali kɛ Nyamenle ngyinlazo mɔɔ fale agyalɛ nwo la a le kɛ nrenyia ko nee raalɛ ko baha bɛ nwo abɔ nu. (Mateyu 19:4-6) Noko, mɔɔ maanyɛlɛma kulo la azo a bɛgyinla bɛhyehyɛ awodeɛ ko agyalɛ nwo mɛla a, ɔngyi ɛbɛla kpalɛ ɛbɔlɛ zo. Baebolo ne ka kɛ Kilisienema mmagyinla afoa biala. (Dwɔn 18:36) Ɔti, bɛngyinla arane mɛla mɔɔ fale awodeɛ ko agyalɛ nwo la anzi yɛɛ bɛndwazo bɛntia.
Na saa . . . ?
Na saa awie ɛva ɔ nwo ɛwula nrenyia nee nrenyia yɛɛ raalɛ nee raalɛ nla nu noko ɛ? Ɔbahola yeahakyi ɔ?
Ɛhɛe. Nɔhalɛ nu, menli bie mɔ yɛle zɔ wɔ ɛvoyia mɔɔ limoa la anu! Mekɛ mɔɔ Baebolo ne hanle kɛ mrenyia mɔɔ fa bɛ gɔnwo mɔ mrenyia la ɛnrɛnyia Nyamenle Belemgbunlililɛ ne la, ɔdoale zo kɛ: “Kɛ ɛnee bɛ nuhua bie mɔ de la ɛne.”—1 Kɔlentema 6:11.
Asoo ɛhye kile kɛ awie mɔɔ vale ɔ nwo wulale nrenyia nee nrenyia yɛɛ raalɛ nee raalɛ nla nu na yegyakyi la ɛnrɛnyia nwolɛ nganeɛdelɛ biala ɔ? Kyɛkyɛ. Baebolo ne ka kɛ: “Bɛva subane fofolɛ ne mɔɔ bɛlua nɔhalɛ ndelebɛbo zo bɛlɛyɛ ye fofolɛ la bɛwula.” (Kɔlɔsaema 3:10) Ɔwɔ kɛ yɛkɔ zo yɛyɛ nzenzaleɛ.
Na saa awodeɛ ko nla nwo nganeɛdelɛ tɛgyegye awie mɔɔ kulo kɛ ɔdi Nyamenle ngyinlazo ne mɔ azo la ɛ?
Nganeɛdelɛ ɛhye le kɛ nganeɛdelɛ biala la, ɔbahola yeakpa kɛ ɔnrɛdwenle nwo anzɛɛ ɔnrɛli ɔ nzi. Adenle boni azo? Baebolo ne ka kɛ: “Bɛhɔ zo bɛmaa sunsum ne ɛhile bɛ adenle na bɛnrɛnyia nwonane nu atiakunluwɔzo fee.”—Galeehyeama 5:16.
Yɛye nzonlɛ kɛ ngyɛnu ne anga kɛ nganeɛdelɛ biala ɛnrɛra. Emomu, saa ɔsukoa Baebolo ne na ɔyɛ asɔne dahuu a ɔbanyia anwosesebɛ yeakpo nganeɛdelɛ zɔhane.
David, mɔɔ yɛlimoa yɛha ɔ nwo edwɛkɛ la nwunle kɛ ɛhye le nɔhalɛ—titili wɔ mekɛ mɔɔ ɔhanle ye ngyegyelɛ ne anwo edwɛkɛ ɔhilele ye Kilisiene awovolɛ la. Ɔka kɛ, “Ɔyele adesoa kpole ne ɔvile me kɔme zo. Saa menganle nwolɛ edwɛkɛ ndɛ a anrɛɛ me nye liele wɔ me mgbavolɛ nu.”
Saa yɛfa Gyihova ngyinlazo ne mɔ yɛdi gyima a, awieleɛ bɔkɔɔ ne yɛ nye die kpalɛ. Yɛze kɛ bɛle ‘fɔɔnwo, bɛmaa ahonle di fɛlɛko’ yɛɛ saa ‘yɛdi zolɛ a, yɛbanyia nyilalɛ kpole.’—Edwɛndolɛ 19:8, 11.