Gyihova Alasevolɛ Nyɛ A Wɔ Ewiade Amuala A?

Kɛzi bɛnwu Gyihova Alasevolɛ dodo ne ɛ?

Menli mɔɔ bɔ Nyamenle Belemgbunlililɛ ne anwo edwɛkpa ne nolo siane biala la a yɛbu bɛ kɛ bɛle Gyihova Alasevolɛ a. (Mateyu 24:14) Alasevolɛ mɔɔ bɛzɔne bɛ nee bɛdabɛ mɔɔ bɛtɛsɔnenle bɛ noko bɛkola bɛyɛ edwɛkɛhanlɛ gyima ne bie la boka nwo.

Asoo ɔwɔ kɛ awie ye ezukoa na bɛabu ye kɛ ɔle Dasevolɛ ɔ?

Kyɛkyɛ. Tɛ ndoboa mɔɔ awie ye la a maa bɛbu ye kɛ ɔle Dasevolɛ anzɛɛ ɔbanyia gyimalilɛ anzɛɛ nwolɛ adenle bie wɔ ahyehyɛdeɛ ne anu a. (Gyima ne 8:​18-​20) Nɔhalɛ nu, menli dɔɔnwo mɔɔ ye ndoboa la ɛngɛlɛ bɛ duma. Dasevolɛ biala fi ye ɛhulolɛ nu fa ye mekɛ, ye anwosesebɛ nee ye anwonyia boa ewiade amuala gyima ne.​​—2 Kɔlentema 9:7.

Kɛzi bɛnwu menli mɔɔ ɛlɛdi daselɛ la dodo ɛ?

Siane biala, Alasevolɛ ne mɔ bu edwɛkɛhanlɛ gyima ne anwo mgbonda wɔ bɛ asafo ne mɔ anu. Bɛfi bɛ ɛhulolɛ nu a bɛyɛ ɛhye a.

Asafo ne mɔ di mgbondabulɛ ne anwo gyima na bɛfa bɛnwa ɔfese ne mɔɔ wɔ bɛ maanle ne anu la. Ɔfese biala fa ye maanle ne anu ɛdeɛ ne nwa ewiade amuala gyima ne ati.

Wɔ ɛzonlenlɛ ɛvolɛa biala awieleɛ, bɛkola bɛnwu Alasevolɛ dodo mɔɔ wɔ maanle biala anu la. Bɛfa dodo ne bɛbɔ nu amaa bɛanwu Alasevolɛ dodo mɔɔ wɔ ewiade amuala la. Bɛfa mgbondabulɛ mɔɔ maanle biala kɛva kɛra la bɛgua “Ewiade Amuala” foa ne mɔɔ wɔ yɛ wɛbsaete ne azo la. Kɛ mɔɔ amaneɛbɔlɛ zɛhae mɔ maanle alimoa Kilisienema anwosesebɛ la, zɔhane ala a amaneɛbɔlɛ ɛhye mɔ maa yɛ anwosesebɛ ɛnɛ a.​​—Gyima ne 2:​41; 4:4; 15:3.

Bɛtia menli mɔɔ nee bɛ ahyehyɛdeɛ ne tu noko bɛngɔ daselɛlilɛ la bɛboka bɛ nwo ɔ?

Yɛndia menli zɛhae mɔ yɛmboka Alasevolɛ ne anwo ɛdeɛ, noko yɛdie bɛ kɛnlɛma wɔ yɛ asafo ne mɔ anu. Bɛ nuhua dɔɔnwo ba Kelaese ewule Ngakyelɛlilɛ ne bie ɛvolɛ biala, ɔti saa yɛte menli mɔɔ ba bie la dodo ne yɛfi Alasevolɛ ne mɔ dodo ne anu a, yɛkola yɛnwu menli ɛhye mɔ dodo ne. Wɔ ɛvolɛ 2025 ne anu, menli dodo mɔɔ rale Ngakyelɛlilɛ ne bie la le 20,635,015.

Menli dɔɔnwo mɔɔ ɛngɔ yɛ ayia ne mɔ bie la nyia sua nu Baebolo ɛzukoalɛ mɔɔ bɛndua ɛhwee la azo nvasoɛ. Wɔ 2025 anu, yɛyɛle Baebolo ɛzukoalɛ dodo 7,603,182 siane biala, bɛ nee bɛ nuhua dɔɔnwo zukoale debie wɔ mekɛ ko ne ala anu.

Nzɔne ati a Alasevolɛ dodo mɔɔ arane tia menli a ɔnyia la zonle tɛla mɔɔ bɛdabɛ mumua ne bɛtia la ɛ?

Fane dɔɔnwo ne ala, arane menli biza awie mɔ asɔne mɔɔ bɛkɔ la na bɛagyinla zo bɛabu bɛ mgbonda ne. Kɛ neazo la, U.S. Census Bureau ne ka kɛ bɛlɛtia menli a “bɛbiza menli bɛmaa bɛkile ɛzonlenlɛ mɔɔ bɛwɔ nu la” na bɛtoa zo bɛka kɛ, “bɛ mgbondabulɛ ne gyi mɔɔ menli ka la azo na ɔngile kɛ amgba ɔle zɔ.” Noko yɛnyɛ ye zɔ, menli mɔɔ bɛdi awie mɔ daselɛ na bɛbu nwolɛ mgbonda la a yɛtia bɛ kɛ bɛle Gyihova Alasevolɛ a, na tɛ bɛdabɛ mɔɔ bɛfa bɛ nloa mgbane ne ala bɛka kɛ bɛle Alasevolɛ la ɔ.