Asoo Bɛhyehyɛ Mekɛ Mɔɔ Yɛbava Yɛawu La Bɛdo Ɛkɛ Ɔ?

Baebolo ne bua kɛ

Kyɛkyɛ, bɛtɛhyehyɛle mekɛ mɔɔ yɛbava yɛawu la bɛtɛtole ɛkɛ. Baebolo ne ɛnga kɛ bɛlimoa bɛhyehyɛ mɔɔ bazi kenle bie la bɛdo ɛkɛ, emomu ɔka kɛ “edwɛkɛ mɔɔ yɛ nye ɛnla” la a to yɛ na ɔmaa yɛwu a.​—Nolobɔvo ne 9:​11, New World Translation.

Na se Baebolo ne ka kɛ yɛlɛ “mekɛ mɔɔ sonla wu” la wɔ ɛkɛ?

Ɛhɛe, Nolobɔvo ne 3:2 ka “mekɛ mɔɔ bɛwo sonla, yɛɛ mekɛ mɔɔ sonla wu; mekɛ mɔɔ bɛdua, yɛɛ mekɛ mɔɔ bɛbu mɔɔ bɛlua la” anwo edwɛkɛ. (King James Version) Noko, edwɛkɛ mɔɔ boka nwo la maa yɛnwu kɛ ɛnee Baebolo ne ɛlɛka mɔɔ kɔ zo wɔ sonla ɛbɛlabɔlɛ nu ɔvi ye awolɛ nu kɔdwu ye ewule nu la anwo edwɛkɛ. (Nolobɔvo ne 3:1-8) Kɛ mɔɔ Nyamenle ɛntinlitinli ɛyazonlɛnli ɔmmaa ɔnlua debie wɔ mekɛ titili bie anu la, zɔhane ala a ɔtɛhyehyɛle mekɛ mɔɔ yɛ nuhua ko biala bɛava awu la ɔtɛtole ɛkɛ a. Edwɛkɛ ne a le kɛ, ɔnle kɛ yɛmaa ɛbɛlabɔlɛ nu ninyɛne die yɛ mekɛ somaa na yɛkpo yɛ Bɔvolɛ ne.​—Nolobɔvo ne 3:11; 12:1, 13.

Yɛbahola yɛamaa yɛ ngoane mekɛ awa

Ɔnva nwo kɛ yɛnze mɔɔ bazi kenle bie la, saa yɛsi kpɔkɛ nrɛlɛbɛ nu a yɛbahola yɛadɛnla aze yɛahyɛ. Baebolo ne ka kɛ: “Nrɛlɛbɛvolɛ ngilehilelɛ le ngoane nzufeanvea, amaa mɔɔ tie la abɔ ahoane ewule ngane ne mɔ.” (Mrɛlɛbulɛ 13:14) Mosisi noko hanle hilele Yizilayɛma kɛ saa bɛdi Nyamenle mɛla ne mɔ azo a, ‘bɛ mekɛ bawa.’ (Mɛla ne 6:2) Mɔɔ nee ɛhye ɛnle ko la, saa yɛannea yɛ nwo boɛ a yɛ nyɛleɛ ɛtane bahola amaa yɛawu ndɛ.​—Nolobɔvo ne 7:17.

Noko, saa yɛyɛ nrɛlɛbɛvolɛma anzɛɛ yɛnea yɛ nwo boɛ bɔbɔ a yɛnrɛhola yɛnrɛnriandi ewule. (Wulomuma 5:12) Noko tɛnlabelɛ ɛhye bahakyi, ɔluakɛ Baebolo ne ɛbɔ ɛwɔkɛ kɛ mekɛ mɔɔ “ewule ɛnle ɛkɛ bieko” la bara.​—Yekile 21:4.