Nwane Mɔ A Bahɔ Hell A?

Baebolo ne bua kɛ

Wɔ aneɛ mɔɔ bɛlimoale bɛvale bɛhɛlɛle Baebolo ne la anu, Hell (“Sheol” nee “Hades”) kile nla, ɔnle ɛleka mɔɔ bɛkile menli nyane wɔ senle nu a. Nwane mɔ a kɔ ɛkɛ a? Kpalɛma nee ɛtanema. (Dwobu 14:13; Edwɛndolɛ 9:17) Baebolo ne ka alesama nla ɛhye anwo edwɛkɛ kɛ ɔle ‘awuke mɔɔ teasema amuala bayia ɛkɛ.’​—Dwobu 30:23.

Mɔɔ Gyisɛse wule la ɔhɔle hell. Noko, ‘bɛangyakyi ye wɔ nla ne anu,’ ɔluakɛ Nyamenle dwazole ye.​—Gyima ne 2:31, 32.

Hell badɛnla ɛkɛ dahuu ɔ?

Nyamenle bamaa Gyisɛse tumi yeamaa yeadwazo awie biala mɔɔ bahɔ hell la yeara ngoane nu. (Dwɔn 5:28, 29; Gyima ne 24:15) Yekile 20:13 ka kenle bie ewudwazo ne anwo edwɛkɛ kɛ: ‘Ewule nee nla yele mowuamra mɔɔ bɛvale bɛziele la vindele.’ Saa bɛdwazo mowuamra amuala a, hell ɛnrɛdɛnla ɛkɛ bieko; yɛɛ awie ɛnrɛhɔ ɛkɛ bieko ɔluakɛ “ewule ɛnle ɛkɛ bieko.”​—Yekile 21:3, 4; 20:14.

Noko tɛ awie biala mɔɔ kɛwu la a kɔ hell a. Baebolo ne maa yɛnwu kɛ menli bie mɔ anye fuu yɛ ɛtane dedee mɔɔ akee bɛnnu bɛ nwo a. (Hibuluma 10:26, 27) Saa menli ɛhye mɔ wu a, bɛngɔ hell, emomu bɛkɔ Gehenna mɔɔ gyi ɛkɛ maa dahuu ɛzɛkyelɛ la. (Mateyu 5:29, 30) Kɛ neazo la, Gyisɛse hilele kɛ ye mekɛ zo ɛzonlenlɛ nu mgbanyima mɔɔ bɛle nabalaba la bie mɔ bahɔ Gehenna.​—Mateyu 23:27-33.