Kɛ Ɔkɛyɛ Na Wɔali Ewule Nwo Ɛzulolɛ Zo Ɛ?

Baebolo ne bua kɛ

Kɛmɔ ewule le yɛ kpɔvolɛ la ati, yɛsulo ye na yɛyɛ biala mɔɔ yɛbahola la yɛbɔ yɛ ngoane nwo bane. (1 Kɔlentema 15:26) Noko akee, ewule nwo ɛzulolɛ mɔɔ ɛnfɛta mɔɔ gyi adalɛ nee diedi mgbane zo la maa menli yɛ ngɛkɛlɛ “wɔ mekɛ mɔɔ bɛde ngoane nu la.” (Hibuluma 2:15) Saa ɛnwu nɔhalɛ ne a ɔnrɛmaa ɛnrɛzulo ewule na ɛ nye balie ɛbɛlabɔlɛ nu.​—Dwɔn 8:32.

Ewule nwo nɔhalɛ edwɛkɛ

• Mowuamra ɛnze ɛhwee. (Edwɛndolɛ 146:4) Ɔnle kɛ ɛsulo kɛ ɛwu a bɛbahile wɔ nyane ɔluakɛ, Baebolo ne fa ewule toto nafelɛ nwo.​—Edwɛndolɛ 13:3; Dwɔn 11:11-14.

• Mowuamra ɛnrɛhola ɛnrɛboda yɛ. Yɛ agbɔvolɛ mɔɔ kulo basabasayɛlɛ bɔbɔ la ‘die bɛ ɛnwomenle’ anzɛɛ ɛngola ɛnyɛ ɛhwee wɔ mekɛ mɔɔ bɛwu la. (Mrɛlɛbulɛ 21:16) Baebolo ne ka kɛ “bɛ ɛkpɔlɛ, nee bɛ anyebolo muala ɛwie.”​—Nolobɔvo ne 9:6.

• Saa yɛwu a ɔngile kɛ yɛ awieleɛ ne ala ɛne. Nyamenle balua ewudwazo ne azo yeamaa mowuamra azia ara ngoane nu bieko.​—Dwɔn 5:28, 29; Gyima ne 24:15.

• Nyamenle ɛbɔ mekɛ bie mɔɔ “ewule ɛnle ɛkɛ bieko” la anwo ɛwɔkɛ. (Yekile 21:4) Baebolo ne ka mekɛ zɔhane anwo edwɛkɛ kɛ: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu” mɔɔ bɛnrɛzulo kɛ bɛbawu a.​—Edwɛndolɛ 37:29.