Nzɔne A Baboa Wɔ Yeamaa Wɔade Baebolo Ne Abo A?

Baebolo ne bua kɛ

Baebolo mumua ne baboa wɔ yeamaa wɔade mɔɔ wɔ nu la abo. Ɔnva nwo maanle mɔɔ ɛvi nu la, ‘ɔnyɛ se yɛɛ ɔmbo ɛ nwo zo’ kɛ ɛbade Nyamenle edwɛkɛ mɔɔ wɔ Baebolo ne anu la abo.​—Mɛla ne 30:11.

Mɔɔ baboa wɔ yeamaa wɔade Baebolo ne abo la

1. Nyia adwenle kpalɛ. Die to nu kɛ Baebolo ne le Nyamenle Edwɛkɛ. Bɛlɛ ɛ nwo aze, ɔluakɛ Nyamenle kyi mɔɔ le anwomemaazo la. (1 Tɛsalonaekama 2:13; Gyemise 4:6) Noko mmadie debie biala ɛdi​—Nyamenle kulo kɛ ɛfa wɔ “adwenle” ne ɛdi gyima kpalɛ.​—Wulomuma 12:1, 2.

2. Sɛlɛ nrɛlɛbɛ. Baebolo ne ka ye wɔ Mrɛlɛbulɛ 3:5 kɛ, “Mmafa wɔ adwenle ɛsɔ ɛ ngome wɔ nrɛlɛbɛ.” Emomu, ‘sɛlɛ Nyamenle’ kɛ ɔmaa wɔ nrɛlɛbɛ mɔɔ ɛbava wɔade Baebolo ne abo.​—Gyemise 1:5.

3. Sukoa ye dahuu. Saa ɛsukoa Baebolo ne dahuu na wɔantoto ye nu a ɛbanyia zolɛ nvasoɛ.​—Dwɔhyua 1:8.

4. Dua edwɛkɛtile zo sukoa. Ɛkpa edwɛkɛtile bie na ɛdua Baebolo ne azo ɛsukoa a, ɔbamaa wɔade mɔɔ Ngɛlɛlera ne kilehile la abo. Fa “mɔlebɛbo ngilehilelɛ” bɔ ɔ bo na akee wɔahɔ ngilehilelɛ mɔɔ “anu yɛ se la azo.” (Hibuluma 6:1, 2) Ɛbanwu ye kɛ ɛbahola wɔava ngɛlɛlera ne wɔatoto nwo yɛɛ ɛbahola wɔava Baebolo tɛkese bie wɔahile fofolɛ abo, bɔbɔ mɔɔ “bɛ bo ɛdelɛ ɛnla aze la.”​—2 Pita 3:16.

5. Kpondɛ moalɛ fi awie mɔ ɛkɛ. Baebolo ne tu yɛ folɛ kɛ yɛkpondɛ moalɛ wɔ menli mɔɔ te Baebolo ne abo la ɛkɛ. (Gyima ne 8:30, 31) Gyihova Alasevolɛ yɛ Baebolo ɛzukoalɛ mɔɔ bɛnlie ɛhwee a. Kɛ mɔɔ ɛnee alimoa Kilisienema ne yɛ la, bɛdua Ngɛlɛlera ne azo bɛboa awie mɔ bɛmaa bɛnwu mɔɔ Baebolo ne kilehile amgba la.​—Gyima ne 17:2, 3.

Ninyɛne mɔɔ ɛnrɛhyia nwo la

1. Nwoma kpole. Gyisɛse ɛzoanvolɛma 12 ne dele Ngɛlɛlera ne abo yɛɛ bɛhilehilele awie mɔ noko ɛnee bie mɔ bu bɛ kɛ “bɛle menli mɔɔ ɛnze nwoma a.”​—Gyima ne 4:13.

2. Ezukoa. Ɛbahola wɔazukoa mɔɔ Baebolo ne kilehile mɔɔ ɛnrɛdua ezukoa biala a. Gyisɛse hanle hilele ye ɛdoavolɛma ne kɛ: ‘Bɛnyianle ye mgbane, bɛva bɛmaa mgbane.’​—Mateyu 10:8.