Baebolo Ne Bahola Aboa Me Yeamaa Meagyinla Ewule Mɔɔ Ɛnlɛ Ye Ayile La Anloa Ɔ?

Baebolo ne bua kɛ

Ɛhɛe. Nyamenle dwenle ye azonvolɛ mɔɔ bɛnde kpɔkɛ la anwo. Baebolo ne ka awie mɔɔ di nɔhalɛ la anwo edwɛkɛ kɛ: “[Gyihova] maa ye anwosesebɛ wɔ ye anwondolɛ nu; ye anwonyane nu, ɔyɛ ye ewule biala ayile.” (Edwɛndolɛ 41:3) Saa ɛlɛ ewule bie mɔɔ ɛnlɛ ye ayile la a, fa ninyɛne nsa ɛhye mɔɔ doa zo la di gyima na ɔbaboa wɔ:

1. Sɛlɛ anwosesebɛ mɔɔ ɛbava wɔagyinla ɔ nloa. “Nyamenle anzonudwolɛ ne mɔɔ bo sonla ndelebɛbo muala azo la” bahola amaa wɔ anwosesebɛ yeamaa wɔagyinla ngyegyelɛ ne anloa.​—Felepaema 4:6, 7.

2. Nyia adwenle kpalɛ. Baebolo ne ka kɛ: “Ɛzelekɛ le ayile kpalɛ, yɛɛ adwenleadwenle maa anwofofolɛ.” (Mrɛlɛbulɛ 17:22) Bɔ mɔdenle sele ɔluakɛ ɔbamaa wɔ adwenleadwenle ne azo ade yɛɛ ɔbaboa wɔ kpɔkɛdelɛ.

3. Nyia Nyamenle ɛwɔkɛ ne mɔ anu diedi. Anyelazo mɔɔ gyi kpɔkɛ zo la bamaa ɛ nye alie ɔnva nwo ewule biala mɔɔ ɛnlɛ ye ayile mɔɔ ɛlɛ la. (Wulomuma 12:12) Baebolo ne ka mekɛ mɔɔ “awie biala mɔɔ wɔ sua ne azo la ɛnrɛha kɛ, “Me nwo ɛdo me’” la anwo edwɛkɛ. (Ayezaya 33:24) Nyamenle baye ewule biala mɔɔ ɛnlɛ ye ayile ɛnɛ la yeavi ɛkɛ. Kɛ neazo la, Baebolo ne ka kɛzi bɛbaye mgbanyinliyɛlɛ bavi ɛkɛ ne la anwo edwɛkɛ kɛ: “Maa ye nwonane ɛzia ɛyɛ kɛ ye mgbavolɛ nu, na ɔnyia ye mgbavolɛ nu anwosesebɛ ne bieko.”​—Dwobu 33:25.

Yɛ ye nzonlɛ: Gyihova Alasevolɛ die Nyamenle moalɛ to nu noko bɛkpondɛ ayileyɛlɛ wɔ mekɛ mɔɔ bɛ nuhua bie banyia ewule mɔɔ ɛnlɛ ye ayile la. (Maake 2:17) Yɛnganvo ayileyɛlɛ titili bie yɛngile awie; yɛze ye kɛ ɔwɔ kɛ awie biala ɔdaye ɔsi ɔ ti anwo kpɔkɛ wɔ ɛhye anwo.