Saa Meyɛ Asɔne A, Nyamenle Baboa Me Ɔ?

Baebolo ne bua kɛ

Ɛhɛe, Nyamenle boa menli mɔɔ fi bɛ ahonle nu yɛ ninyɛne mɔɔ ɔ nee ye ɛhulolɛdeɛ yia anwo asɔne la. Saa ɛtɛyɛle asɔne ɛlɛ bɔbɔ a, menli mɔɔ yɛle asɔne kɛ, “Nyamenle, boa me,” anwo neazo mɔɔ wɔ Baebolo ne anu la bamaa wɔ anwosesebɛ. Kɛ neazo la:

• “O [Gyihova] me Nyamenle, boa me! Wɔ ɛhulolɛ kpundii ne ati, die me!”​—Edwɛndolɛ 109:26.

• “Me nwo ɛhyele me yɛɛ mele ehyianli: O Nyamenle, boa me.”​—Edwɛndolɛ 69:6, Douay Version.

Nɔhalɛ nu, menli mɔɔ hɛlɛle edwɛkɛ ɛhye mɔ la ɛnee lɛ diedi kpole wɔ Nyamenle anu. Noko Nyamenle diele menli mɔɔ rale ɔ nyunlu nɔhalɛ nu, mɔɔ bie a le bɛdabɛ mɔɔ “nyane ɛha” bɛ anzɛɛ bɛ “anyelazo ɛwie” la kɔsɔɔti asɔneyɛlɛ.​—Edwɛndolɛ 34:18.

Ɔnle kɛ ɛte nganeɛ kɛ Nyamenle wɔ moa somaa yemɔti wɔ ngyegyelɛ ne mɔ ɛnvale ɔ nwo. Baebolo ne ka kɛ: “[Gyihova] wɔ anwuma bɔbɔ ɛdeɛ, noko ɔbu mɔɔ bɛlɛ ɔ nwo aze la, na mɔɔ memaa ɔ nwo zo la ɛmbikye ye.” (Edwɛndolɛ 138:6) Gyisɛse hanle hilele ye ɛdoavolɛma ne kenle ko kɛ: “Bɛ ti zo enrinli bɔbɔ bɛdia.” (Mateyu 10:30) Nyamenle ze ɛ nwo edwɛkɛ mɔɔ ɛdawɔ bɔbɔ ɛnze ye la. Ɛnee akee fane nyɛ a ɛyɛ asɔne kɛ ɔboa wɔ ɔmaa ɛgyinla wɔ ngyegyelɛ nloa a, ɔnrɛdie wɔ a!​—1 Pita 5:7.