Ukraine Konle Ne Ɛlɛkɔ Ɛvolɛ Nwiɔ​—Anyelazo Boni A Baebolo Ne Maa Yɛnyia A?

Wɔ Yalɛ, February 24, 2023, ɛnee Ukraine konle ne bɔle ɔ bo la yedwu ɛvolɛ ko. Amaneɛbɔlɛ bie mɔ kile kɛ Ukraine nee Russia sogyama kɛyɛ 300,000 ɛwu anzɛɛ ɛboda yɛɛ maanlema kɛyɛ 30,000 ɛwu wɔ konle ne anu. Noko, ɔbayɛ kɛ bɛ dodo ne bo zɔ.

Ɔyɛ alɔbɔlɛ kɛ, ɔnzɔho kɛ konle ɛhye bara awieleɛ kenlensa ye ala.

• “Kɛyɛ ɛvolɛ ko mɔɔ Russia sogyama hɔle Ukraine la, debie biala ɛngile kɛ konle ne ɛlɛba awieleɛ. Debie biala ɛngile kɛ bɛ nuhua ko bali konim, yɛɛ ɔnzɔho kɛ bɛbalie bɛado nu kɛ bɛsiezie bɛ avinli.”​—NPR (National Public Radio), February 19, 2023.

Konle ɛhye nee ngakyile mɔɔ ɛlɛkɔ zo la ɛmaa menli dɔɔnwo mɔɔ wɔ ewiade la ɛnwu amaneɛ na bɛlɛdi nyane. Anyelazo boni a Baebolo ne maa yɛnyia a? Asoo konle bara awieleɛ kenle bie ɔ?

Konle mɔɔ bamaa konle kɔsɔɔti ara awieleɛ

Baebolo ne ka konle bie mɔɔ balie alesama, na ɔnrɛzɛkye bɛ la anwo edwɛkɛ. Bɛfɛlɛ zɔhane konle ne Amagɛdɔn, na bɛha nwolɛ edwɛkɛ wɔ Baebolo ne anu kɛ “Nyamenle, Tumivolɛ Bedevinli ne kenle kpole ne anu konle ne.” (Yekile 16:14, 16) Nyamenle balua zɔhane konle ne azo yeava alesama tumililɛ mɔɔ fa konle ɛhye mɔ mɔɔ sɛkye ninyɛne dɔɔnwo ba la ara awieleɛ. Amaa wɔanwu kɛzi Amagɛdɔn bamaa anzodwolɛ adɛnla ɛkɛ ne bɔkɔɔ la, kenga edwɛkɛ ɛhye mɔ:

• “Duzu A Le Amagɛdɔn Konle Ne?”

• “Amagɛdɔn Le Edwɛkɛ Kpalɛ!”