‘Di Menli Mɔɔ Le Kɛ Bɛdabɛ La Eni’
ƆVI 1992 mɔɔ ba la, Neazo Eku ne maa mediema mgbanyima mɔɔ bɛnyi sunsum nu na bɛlɛ anwubielɛ la boa ye kɔmatii ne mɔ wɔ bɛ gyimayɛlɛ nu.a (Nea ɔ bo ɛkɛ edwɛkɛ ne.) Boavolɛma ɛhye mɔ mɔɔ bɛboka ‘mboane gyɛne’ ne la boa Neazo Eku ne kpalɛ. (Dwɔn 10:16) Bɛkɔ ayia mɔɔ kɔmatii ne mɔɔ bɛwɔ nu yɛ ye dapɛne biala la bie. Bɛ gyima a le kɛ bɛbava edwɛkɛ biala mɔɔ fale bɛ gyima ne anwo la bɛado gua na bɛahile bɛ adwenle. Neazo Eku ne anu amra a si kpɔkɛ ne a, yɛɛ boavolɛma ne nea kɛ bɛbava kpɔkɛ mɔɔ bɛbazi la bɛayɛ gyima. Mediema ɛhye mɔ lɛ ɛhulolɛ kɛ bɛbayɛ debie biala mɔɔ bɛse bɛyɛ la. Bɛ nee Neazo Eku ne anu amra tu adenle kɔyɛ nyianu titili nee maanle maanle avinli nyianu. Bɛkola bɛmaa bɛkɔkpɔla Bɛtɛle bie kɛ gyima ti agyakɛnugyinlavolɛma.
Adiema ko mɔɔ yezonle kɛ boavolɛ ɔvi 1992 mɔɔ ba la se, “Saa meyɛ gyima mɔɔ bɛva bɛmaa me la a, ɔmaa Neazo Eku ne kola fa ye adwenle sie sunsum nu ninyɛne zo kpalɛ.” Adiema ko noko mɔɔ yeva ɛvolɛ 20 yezonle kɛ boavolɛ la ka kɛ, “Ɔle nwolɛ adenle kpole ɔtɛla debie biala mɔɔ ɛnee gyi me nye zo la.”
Neazo Eku ne ɛmaa ye boavolɛma ne gyima dɔɔnwo na ɔ nye sɔ gyima ɛsesebɛ mɔɔ mediema ɛhye mɔ ɛlɛyɛ ye nɔhalɛ nu la. Bɛmaa yɛ muala yɛli ‘menli mɔɔ le kɛ bɛdabɛ la eni.’—Felepaema 2:29.
a Nea ɛlɛka “Kɛzi Neazo Eku Ne Nea Belemgbunlililɛ Gyima Ne Azo La” mɔɔ wɔ Nyamenle Belemgbunlililɛ Di Tumi! buluku ne tile 12 ne na ɔbamaa wɔanwu Neazo Eku ne kɔmatii nsia ne gyima.