Kɛlata Mɔɔ Vi Neazo Eku Ne Ɛkɛ
Mediema Gyihova Alasevolɛ:
Bɛnlea nwolɛ adenle mɔɔ yɛlɛ kɛ Maanzaleɛ Tumivolɛ, Gyihova duma la yɛ nwo zo a! Zɔhane duma ne le damɛnlangoate, ɔwɔ ɛkɛ dahuu yɛɛ ɔnlɛ ye ɛsaso. Gyihova a vale ye duma ne dole yɛ nwo zo a, na ɔvi ɛvolɛ 1931 titile, bɛfa zɔhane duma ne mɔɔ le ngakyile la a bɛfɛlɛ yɛ a. (Aye. 43:10) Yɛkola yɛfa yɛtu yɛ nwo kpole kɛ yɛle Gyihova Alasevolɛ.
Abɔnsam ɛlɛbɔ mɔdenle ɛsesebɛ kɛ ɔmaa Nyamenle duma ne azo aheda. Ɔlua ye tumi ne ati, maanle maanle ne ɛkpo Gyihova duma. Babelɔn Kpole ne, mɔɔ le ewiade adalɛ ɛzonlenlɛ maanle ne la, kyi Nyamenle duma na bɛye bɛvi Baebolo dɔɔnwo mɔɔ bɛhile ɔ bo la anu. Ɔle ngakyile kɛ, Gyisɛse kpogyale ɔ Ze duma ne zo, na ɔvale ɔlumuale wɔ neazo asɔneyɛlɛ ne mɔɔ ɔhilele ye ɛdoavolɛma la anu. Ɔhanle kɛ: “Bɛyɛ nzɛlɛlɛ a bɛyɛ ye zɛhae: ‘Yɛ Ze mɔɔ wɔ anwuma: Wɔ duma nwo ɛde.’ ” (Mat. 6:9) Nzinlii mɔɔ ɔlɛfi ahonle nu yeayɛ asɔne yeamaa ɔ Ze la, ɔhanle kɛ: “Mela wɔ [duma] ali mehile menli mɔɔ ɛvale bɛ ɛvile ɛtane ewiade ye anu ɛmanle me la.” (Dwɔn 17:6) Kɛmɔ yɛkulo kɛ yɛdi Gyisɛse neazo kɛnlɛma ne anzi la ati, yɛbɔ kpɔkɛ kɛ yɛbabɔ Gyihova duma ne nolo kpalɛ wɔ azɛlɛ ye azo amuala yɛadɛla mekɛ biala.
Ɛvolɛ edwɛkɛ maa 2009 mɔɔ se, “Bɛli edwɛkpa ne anwo daselɛ bɔkɔɔ,” la manle yɛ anwosesebɛ kɛ yɛwie yɛ ɛzonlenlɛ gyima ne bɔkɔɔ. (Gyi. 20:24, NW ) Ɔda ali wienyi kɛ Gyihova ɛyila yɛ mɔdenlebɔlɛ zo wɔ ɛzonlenlɛ ɛvolɛ ne mɔɔ ɛze ɛhɔ la anu. Yɛlile daselɛ kpole wɔ ewiade amuala yɛvale yɛwulale Gyihova duma ne anyunlunyia na yɛlile ye eni. Nolobɔlɛma fofolɛ mɔɔ bɛ dodo le 7,313,173 la bɔle nu lile menli kɔsɔɔti daselɛ, na eza bɛhilehile menli mɔɔ lɛ ahonle kpalɛ na bɛlɛkpondɛ ngyegyelɛ dɔɔnwo mɔɔ bɛyia ye alehyenlɛ biala sɔbelɛ la. Menli dodo 18,168,323 mɔɔ hɔle Kelaese ewule Ngakyelɛlilɛ ne abo la kile kɛ menli mgbe mgbe dɔɔnwo babɔ Gyihova duma ne kolaa na ewiade ɛtane ɛhye ara awieleɛ.
Mekɛ tendenle biala mɔɔ Gyihova bamaa nwolɛ adenle la, yɛbahɔ zo yɛava mɔdenlebɔlɛ yɛabɔ Belemgbunlililɛ edwɛkpa ne nolo, na yɛalua adenle biala mɔɔ yɛkɛnyia la azo yɛaha edwɛkɛ ne yeahile menli mɔɔ wɔ yɛ azɛlɛsinli ne anu la. (Mat. 24:14; Mak. 13:10) Saa yɛlɛdi daselɛ wɔ anlenkɛ nloa, wɔ gua ne mɔ azo, kɛlata nee telefuu zo, anzɛɛ mgbemgbɛnenu o, bɛmaa yɛbɔ mɔdenle yɛmaa menli dɔɔnwo mɔɔ yɛkɛhola la ɛnwu Gyihova duma nee ye bodane.
Yɛlɛ daselɛ biala mɔɔ kile kɛ ɔnrɛhyɛ Gyihova bayɛ debie yeava yeade ye duma ne anwo a. (Yiz. 36:23) Mekɛ mɔɔ menli kɔsɔɔti mɔɔ gua ye duma ne anwo evinli baha bɛ nloa ado nu la ɛlɛbikye ndɛndɛ. Nea kɛzi ɔbayɛ anyunlunyia kenle yeamaa Gyihova nɔhalɛ azonvolɛ kɔsɔɔti, mɔɔ bɛla Gyihova duma ne ali na bɛlie ye maanzaleɛ tumililɛ ne bɛdo nu la!
Ɛlɔlɛ nu mɔɔ Gyihova fi nea ye menli la lale ali wienyi wɔ “Bɛhɔ Zo Bɛzinza!” Maangyeba nee Maanle Maanle Avinli Nyianu mɔɔ bɛyɛle ye wɔ ewiade amuala wɔ 2009 la anu. Zɔhane nyianu ne mɔ yɛle debie titile wɔ yɛ teokelase tetedwɛkɛ nu, na ɔhanle yɛ ɔmanle yɛnwunle kɛzi ɔhyia kɛ yɛmaa yɛ nye da ɛkɛ wɔ Gyihova kenle ne anwo la.—Mak. 13:37; 1Tɛs. 5:1, 2, 4.
Nɔhalɛ nu, Gyihova boa yɛ; ɔmaa yɛ nye die. Ɔmaa yɛda ndile amolɛ zo na ɔfa yɛ ɔkɔ nzukpa mɔɔ gyi diinyi la anwo.—Edw. 23:1, 2; 100:2, 5.
Bɛnyia anwodozo kɛ Gyihova bahɔ zo ayila bɛ wɔ mekɛ mɔɔ bɛlɛkɔ zo bayɛ dɔɔnwo wɔ Belemgbunlililɛ gyima ne anu wɔ siane ne mɔ mɔɔ ɛlɛba anu la!
Yɛfa yɛ Keleseɛnema ɛlɔlɛ yɛbiza ewiade amuala mediemayɛlɛ ne,
Bɛ mediema,
Gyihova Alasevolɛ Neazo Eku