Nyia Akɛnrasesebɛ Na Di Nɔhalɛ Kɛ Bɛnaya

Ɛnee Bɛnaya le kovolɛ mɔɔ lɛ akɛnrasesebɛ, ɔboka sogyama mɔɔ honle maanle Belemgbunli Devidi yɛɛ nzinlii Belemgbunli Sɔlɔmɔn la anwo. Ɛnee Bɛnaya papa le ɛsɔfo, ɔti ɛnee ɔnda ɔngɔ konle yɛɛ ɔnva akodeɛ ɔnli gyima ɛdeɛ, noko ɔhɔle konle ngakyile mɔɔ bɛhonle bɛmaanle Gyihova la bie. Ɔlale akɛnrasesebɛ kpole ali. Kɛ neazo la, ɔhunle awenade wɔ kuma bie mɔɔ nzule wɔ nu la anu yɛɛ ɔhunle kakanyinli bie mɔɔ ɛnee lɛ akodeɛ la. Devidi liele Bɛnaya lile kpalɛ ɔti ɔmaanle ɔnleanle ye sinzavolɛma ne anwo zo.—2 Sa. 23:​20-23.

Mɔɔ Abesalɛm nee Adonaegya dele atua la, Bɛnaya hɔle zo lile nɔhalɛ maanle Devidi. (2 Sa. 8:18; 15:18; 1 Arl. 1:8) Mɔɔ Devidi yɛle ɛrelera la, eza Bɛnaya boale ɔmaanle bɛziele Sɔlɔmɔn belemgbunli. (1 Arl. 1:​32-40) Bɛnaya lile nɔhalɛ maanle Gyihova nee menli mɔɔ ɔkpale bɛ kɛ bɛli tumi la wɔ mekɛ bɔbɔ mɔɔ awie mɔ gyɛne anyɛ zɔ la.

Yɛdayɛ noko yɛhyia akɛnrasesebɛ na yɛahola yɛaho yɛatia Seetan, yɛ kpɔvolɛ mɔɔ anwo yɛ ɛzulolɛ yɛɛ menli mɔɔ bɛgyi ɔ nzi la. Eza ɔwɔ kɛ yɛbɔ kpɔkɛ kɛ yɛbahɔ zo yɛava Gyihova ngyinlazo ne mɔ yɛabɔ yɛ ɛbɛla. (Ɛfɛ. 6:11; 1 Pita 5:​8, 9) Saa awie mɔ kpa bɔbɔ kɛ bɛnrɛzonle Gyihova a, yɛmɛ yɛkɔ zo yɛdi nɔhalɛ yɛmaa ye na yɛnyia anwodozo kɛ ɔbamaa yɛ ahatualɛ.—2 Sa. 22:26.