Pɛ Edwɛkɛ Mɔɔ Wɔ Baebolo Ne Anu La Anwo Nvoninli

Tetedwɛkɛ dɔɔnwo mɔɔ maa yɛnyia ɛzukoalɛdeɛ mɔɔ anwo hyia la wɔ Baebolo ne anu. Saa yɛpɛ edwɛkɛ ɛhye mɔ anwo nvoninli wɔ yɛ adwenle nu a, ɔbamaa yɛade mɔɔ yɛkenga la abo kpalɛ na yɛanyia zolɛ nvasoɛ bɔkɔɔ. Nzuzulɛ mɔɔ bahola aboa wɔ yeamaa wɔapɛ edwɛkɛ mɔɔ wɔ Baebolo ne anu la anwo nvoninli la bie mɔ ɛne.

• Kenga ye kpole. Saa ɛkenga Baebolo ne kpole a, ɔbahola yeaboa wɔ yeamaa wɔapɛ mɔɔ ɛlɛkɔ zo la anwo nvoninli kpalɛ. Saa bɛlɛbɔ nu bɛagenga Baebolo ne kɛ abusua a, bɛbahola bɛahyɛ menli mɔɔ wɔ nu la edwɛkɛ ne bɛamaa sonla ko biala agenga ko biala edwɛkɛ ne amaa bɛade ɔ bo kpalɛ.

• Pɛ mɔɔ zile la anwo nvoninli. Bɔ mɔdenle kɛ ɛbade kɛzi ɛnee menli mɔɔ wɔ edwɛkɛ ne anu la dwenle nee kɛzi ɛnee bɛte nganeɛ la abo. Kɛ neazo la, biza ɛ nwo kɛ: ‘Duzu ati a ahenle ne hanle zɔhane edwɛkɛ ne anzɛɛ yɛle ye nyɛleɛ zɔhane a? Saa medame a ɛnee mewɔ zɔhane tɛnlabelɛ ne anu a, anrɛɛ nzɔne adwenle a bara me ti anu anzɛɛ kɛzi mebade nganeɛ ɛ?’

• Dolɔdolɔ mɔɔ ɛnee ɛlɛkɔ zo la. Saa ɛdolɔdolɔ mɔɔ hɔle zo wɔ Baebolo ne anu la a, ɔbahola yeaboa wɔ yeamaa wɔapɛ nwolɛ nvoninli na wɔahakye, saa bɔbɔ ɛnze debie dolɔ kpalɛ a.