Wɔziezie Ɛ Nwo Kɛ ‘Ɛbanyia Azɛlɛ’ Ne Ɔ?
YƐ MUALA yɛ nye die Gyisɛse ɛwɔkɛ ɛhye anwo: “Anyelielɛ a le bɛdabɛ mɔɔ bɛle bɛlɛvo la, ɔluakɛ bɛbanyia azɛlɛ ne.” (Mat. 5:5) Menli mɔɔ bɛkpokpa bɛ la banyia azɛlɛ ne wɔ mekɛ mɔɔ bɛ nee Gyisɛse ɛlɛdi tumi wɔ anwuma la. (Yek. 5:10; 20:6) Ɛnɛ, nɔhalɛ Kilisienema dɔɔnwo anye la kɛ bɛbanyia azɛlɛ ne na bɛadɛnla zolɛ dahuu wɔ mekɛ mɔɔ bɛdi munli, bɛlɛ anzodwolɛ nee anyelielɛ la. Amaa bɛadwu bodane ɛhye anwo la, bɛbayɛ gyima dɔɔnwo. Suzu nuhua nsa anwo: bɛbaboa bɛamaa bɛayɛ azɛlɛ ne paladaese, bɛbanlea kɛ bɛdabɛ mɔɔ bɛdwazo bɛ la banyia mɔɔ bɛhyia la na bɛahilehile bɛ. Eza dwenle mɔɔ ɛbahola wɔayɛ ye ɛnɛ bɔbɔ wɔahile kɛ ɛlɛ ɛhulolɛ kɛ ɛbaboa wɔamaa bɛayɛ zɔhane gyima ne la anwo.
WƆZIEZIE Ɛ NWO KƐ ƐBAMAA AZƐLƐ NE AYƐ PALADAESE Ɔ?
Mɔɔ Gyihova hanle kɛ alesama ɛyi “azɛlɛ ne na bɛnlea zolɛ” la, ɛnee ɔlɛkile kɛ ewiade amuala bayɛ paladaese. (Gyn. 1:28) Bɛdabɛ mɔɔ bɛbanyia azɛlɛ ne la bali mɔlebɛbo mɛla zɔhane azo. Mɔlebɛbo ne, azɛlɛ ne ɛnrɛyɛ paladaese ɔluakɛ Yidɛn tola ne ɛnle ɛkɛ bieko. Amagɛdɔn pɛ nu ala a, ɔbahyia kɛ bɛyɛ gyima dɔɔnwo bɛsiezie azɛlɛ ne ɛleka mɔɔ bɛzɛkye ye kɛkala la. Ɔbayɛ gyima kpole kpalɛ!
Ɛhye maa yɛkakye gyima ɛsesebɛ mɔɔ Yizilayɛma yɛle wɔ mekɛ mɔɔ bɛvi Babelɔn bɛziale bɛhɔle la. Awie biala andɛnla bɛ azɛlɛ ne azo too ɛvolɛ 70. Noko Ayezaya hanle dole ɛkɛ ne kɛ ɔlua Gyihova moalɛ zo bɛbazia bɛahɔdɛnla zolɛ. Ngapezo ne hanle kɛ: “Ɔbamaa ye fienemgbole ne ayɛ kɛ Yidɛn na ye ɛsɛlɛ ne ayɛ kɛ Gyihova tola ne.” (Aye. 51:3) Yizilayɛma ne holale yɛle ye zɔ. Zɔhane ala a ɔlua Gyihova moalɛ zo, bɛdabɛ mɔɔ bɛbanyia azɛlɛ ne la bahola ayɛ gyima amaa azɛlɛ ne ayɛ paladaese a. Ɛbahola wɔahile ye kɛkala kɛ ɛlɛ ɛhulolɛ kɛ ɛbayɛ zɔhane gyima ne bie.
Adenle ko a le kɛ ɛbayɛ biala mɔɔ ɛbahola la wɔamaa wɔ sua nu nee ɛleka mɔɔ ɛde la ayɛ bɔkɔbɔkɔ. Saa menli mɔɔ de wɔ kpalɛ ne azo la ɛnli bɛ nwo eni bɔbɔ a, ɛbahola wɔayɛ ye zɔ. Eza ɛbahola wɔaboa wɔamaa bɛaziezie Belemgbunlililɛ Asalo nee Nyianu Asalo ɛkɛ. Saa wɔ tɛnlabelɛ ne bamaa wɔ adenle a, ɛbahola wɔadu ɛ nwo wɔamaa wɔaboa esiane mekɛ nu gyima ne wɔ ɛleka mɔɔ ɛwɔ la. Ɛhye bahile kɛ ɛkpondɛ kɛ ɛboa ɛ mediema wɔ mekɛ mɔɔ bɛhyia wɔ moalɛ la. Biza ɛ nwo kɛ, ‘Asoo mebahola meazukoa kɛzi bɛyɛ ninyɛne bie mɔ la amaa Gyihova maa me adenle ɔmaa metɛnla azɛlɛ ne azo dahuu a meava meali gyima ɔ?’
WƆZIEZIE Ɛ NWO KƐ ƐBABOA MENLI MƆƆ BƐBADWAZO BƐ LA Ɔ?
Mɔɔ bɛdwazole Gyeeyaelɛse ara raalɛ ne ɛkɛ ne ala la, Gyisɛse hanle kɛ bɛmaa ye debie ɔli. (Maake 5:42, 43) Bie a ɛnee ɔnyɛ se kɛ bɛbanlea kakula raalɛ zɔhane mɔɔ ɛnee yeli ɛvolɛ 12 la. Noko dwenle gyima dodo mɔɔ yɛbayɛ wɔ mekɛ mɔɔ Gyisɛse ɛwɔkɛ mɔɔ se “bɛdabɛ mɔɔ bɛwɔ ngakyelɛ nla ne mɔ anu la kɔsɔɔti bade ɔ ne na bɛavinde” la ɛra nu la anwo. (Dwɔn 5:28, 29) Baebolo ne ɛnga nwolɛ edwɛkɛ dɔɔnwo ɛdeɛ, noko yɛkola yɛpɛ nwolɛ nvoninli kɛ bɛdabɛ mɔɔ bɛbadwazo bɛ la bahyia aleɛ, dabelɛ nee adɛladeɛ. Ɛbahola wɔamaa yeala ali kɛkala bɔbɔ kɛ wɔziezie ɛ nwo kɛ ɛbaboa ɔ? Ɛnee suzu kpuya ɛhye mɔ anwo.
Kɛ ɔkɛyɛ na wɔahile ye ɛnɛ kɛ wɔziezie ɛ nwo kɛ ɛbanyia azɛlɛ ne ɛ?
Saa bɛbɔ nolo kɛ maangyebakyi zo neavolɛ ne barakpɔla bɛ asafo ne a, asoo ɛtu ɛ nwo ɛmaa kɛ ɛbamaa ye aleɛ ɔ? Saa menli mɔɔ wɔ dahuu ɛzonlenlɛ gyima ne anu la bie mɔ fi Bɛtɛle ba wɔ asafo ne anu anzɛɛ saa maangyebakyi zo neavolɛ bie wie ye neavolɛ adenduvo gyima ne na ɔba sua nu a, ɛbahola wɔaboa bɛ wɔamaa bɛanyia ɛleka bɛadɛnla ɔ? Saa bɛbayɛ maanzinli nyianu anzɛɛ nyianu titili bie wɔ ɛleka mɔɔ ɛwɔ la a, asoo ɛbahola wɔadu ɛ nwo wɔamaa wɔaboa kolaa na bɛabɔ nyianu ne abo anzɛɛ wɔ mekɛ mɔɔ bɛkpɔne la anzɛɛ wɔaboa wɔamaa bɛalie nyɛvolɛ mɔɔ bara la ɔ?
SIEZIE Ɛ NWO KƐ ƐBAHILEHILE BƐ
Ɔlua edwɛkɛ mɔɔ wɔ Gyima ne 24:15 la ati, yɛ nye la kɛ bɛbadwazo menli mgbe mgbe dɔɔnwo. Bɛ nuhua dɔɔnwo annyia nwolɛ adenle annwu Gyihova kolaa na bɛawu. Saa bɛdwazo bɛ a, bɛbava zɔhane nwolɛ adenle ne bɛamaa bɛ.a Nyamenle nɔhalɛ azonvolɛ mɔɔ bɛlɛ anwubielɛ la baboa bɛamaa bɛahilehile bɛ. (Aye. 11:9) Charlotte mɔɔ ɛbɔ edwɛkpa ne nolo wɔ Europe, South America, yɛɛ Africa la anye la mekɛ ɛhye ade. Ɔvale anyelielɛ ɔhanle kɛ: “Me nye la mekɛ mɔɔ mebahilehile awie mɔ wɔ mekɛ mɔɔ bɛbadwazo bɛ la. Saa mekenga awie mɔɔ dɛnlanle aze wɔ tete ne la anwo debie a, mɔɔ meta medwenle nwo la a le kɛ: ‘Saa sonla ɛhye nwunle Gyihova a, anrɛɛ ye ɛbɛlabɔlɛ bayɛ ngakyile.’ Me nwo ɛlɛdɔ mekɛ mɔɔ mebaha ninyɛne mɔɔ bɛdabɛ mɔɔ bɛbadwazo bɛ la annwu ye la anwo edwɛkɛ meahile bɛ la.”
Gyihova azonvolɛ nɔhavoma mɔɔ dɛnlanle aze kolaa na Gyisɛse ara azɛlɛ ye azo la bɔbɔ lɛ ninyɛne dɔɔnwo mɔɔ ɔwɔ kɛ bɛsukoa a. Suzu kɛzi ɔbayɛ anyelielɛ nee nwolɛ adenle kɛ yɛbahilehile kɛzi ngapezo ngakyile mɔɔ Daneɛle hɛlɛle mɔɔ yeande ɔ bo la rale nu la anu yɛahile ye la anwo. (Dan. 12:8) Na Wulutu nee Nawome mɔɔ yɛboa bɛ yɛamaa bɛanwu kɛ bɛ bo zo amra anu a Mɛzaya ne vi rale la noko ɛ? Nea kɛzi ɔbayɛ anyelielɛ kɛ yɛbayɛ ewiade amuala ngilehilelɛ zɔhane bie mɔɔ awie biala ɛngyegye yɛ anzɛɛ debie biala ɛndwehwe yɛ adwenle kɛ mɔɔ ɔde ye wɔ ɛtane ewiade ye anu ɛnɛ la a!
Kɛzi ɛbahile kɛ wɔziezie ɛ nwo kɛkala kɛ ɛbayɛ zɔhane gyima ne bie ɛ? Adenle ko a le kɛ ɛbabɔ mɔdenle wɔanyia anyuhɔlɛ wɔ wɔ ngilehilelɛ nu na wɔayɛ ewiade amuala edwɛkɛhanlɛ gyima ne mɔɔ yɛlɛyɛ ye ɛnɛ la bie dahuu. (Mat. 24:14) Saa wɔ ɛvolɛ anzɛɛ tɛnlabelɛ gyɛne ɛmmaa ɛngola ɛnyɛ dɔɔnwo kɛkala bɔbɔ a, mɔdenle mɔɔ ɛbabɔ la bahile kɛ wɔziezie ɛ nwo kɛ ɛbahilehile bɛdabɛ mɔɔ bɛbadwazo bɛ la.
Ɔhyia kɛ ɛbadwenledwenle kpuya ɛhye mɔ mɔɔ anwo hyia la anwo, Asoo amgba ɛ nye la kɛ ɛbanyia azɛlɛ ne? Ɛ nye la mekɛ mɔɔ yɛbayɛ azɛlɛ ne paladaese na yɛava ninyɛne mɔɔ menli mɔɔ bɛbadwazo bɛ la hyia nwo la yɛamaa bɛ na yɛahilehile bɛ la ɔ? Saa ɛfa nwolɛ adenle mɔɔ wɔnyia ye ɛnɛ la ɛyɛ gyima mɔɔ ɛbayɛ ye kenle bie wɔ mekɛ mɔɔ wɔnyia azɛlɛ ne la a, ɔbahile kɛ wɔziezie ɛ nwo!
a Nea edwɛkɛ, “Bɛfa Menli Dɔɔnwo Ne Bɛba Tenleneyɛlɛ Nu” mɔɔ wɔ September 2022 Ɛzinzalɛ Arane ne anu la.