Ɛ Nee Gyihova Ɛziezie Bɛ Avinli

ƐVOLƐ biala bɛdie Gyihova mboane ne mɔɔ bɛsonle bolɛ la dɔɔnwo bieko wɔ Kilisiene asafo ne anu. Saa bɛ nuhua biala sia ba a, nea kɛzi ɔmaa “anyelielɛ” kpole ba anwuma a! (Luku 15:7, 10) Saa bɛlie wɔ bieko a, ɛbahola wɔanyia anwodozo kɛ Gyisɛse, anwumabɔvolɛ ne mɔ yɛɛ Gyihova anye ɛlie kɛ wɔzia wɔra nɔhalɛ ne anu la. Noko mekɛ mɔɔ ɛ nee Gyihova ɛlɛsiezie bɛ avinli la, bie a ɛbayia ngyegyelɛ. Ngyegyelɛ ne mɔ bie a le boni, na duzu a bahola aboa wɔ a?

NGYEGYELƐ BONI MƆ A ƐBAYIA A?

Menli dɔɔnwo sia ba asafo ne anu a, bɛ adwenle kɔ zo gyegye bɛ. Bie a ɛte kɛzi Belemgbunli Devidi dele nganeɛ la abo. Mɔɔ bɛvale ye ɛtane bɛhyɛle ye bɔbɔ la anzi, ɔhanle kɛ: “Me nvonleɛ ne mɔ ɛbo me nwo zo.” (Edw. 40:12; 65:3) Saa awie sia ba Gyihova ɛkɛ a, bie a ye adwenle babua ye fɔlɛ anzɛɛ ɔbade nganeɛ kɛ yebɔ anyiemgba wɔ ɛvolɛ dɔɔnwo anu. Bɛdule Isabelle la, ɔbole ɛvolɛ 20 na yeazia yeara asafo ne anu.a Ɔhanle kɛ, “Ɛnee ɔyɛ se kɛ mebalie meado nu kɛ Gyihova ɛva me ɛtane ɛhye me.” Saa ɛmaa ɛ sa nu to a, ɛ nee Gyihova agɔnwolɛvalɛ ne bazɛkye bieko. (Mrɛ. 24:10) Bɔ mɔdenle kɛ ɛnrɛmaa edwɛkɛ zɛhae ɛnrɛdo wɔ.

Bie mɔ noko suzu kɛ bɛnrɛhola bɛnrɛyɛ debie biala mɔɔ ɔhyia kɛ bɛyɛ amaa bɛ nee Gyihova anyia agɔnwolɛvalɛ kpalɛ bieko la. Mɔɔ bɛliele Antoine la ɔhanle kɛ, “Mendele nganeɛ kɛ me rɛle ɛvi debie biala mɔɔ menyɛle nee ninyɛne mɔɔ ɛnee meyɛ wɔ mekɛ mɔɔ ɛnee mewɔ asafo ne anu la.” Kɛmɔ bie mɔ te nganeɛ zɛhae la ati, ɔyɛ se kɛ bɛbava bɛ nwo bɛawula sunsum nu gyimalilɛ bie mɔ anu.

Kɛ neazo la, saa ahumuakyima sɛkye awie sua bɔkɔɔ a, bie a ahenle suzu mekɛ nee gyima mɔɔ ɔwɔ kɛ bɛyɛ na bɛazi sua ne bieko la anwo a, ɔbabu ɔ nye. Zɔhane ala a saa ɛtane kpole sɛkye ɛ nee Gyihova agɔnwolɛvalɛ ne a, bie a ɛbade nganeɛ kɛ kyesɛ ɛbɔ mɔdenle kpalɛ na wɔahola ɛ nee Gyihova aziezie bɛ avinli a. Noko ɛbahola wɔanyia moalɛ.

Gyihova ɛlɛka ahile yɛ kɛ: “Akee bɛrɛla bɛmaa yɛziezie yɛ avinli.” (Aye. 1:18) Wɔbɔ mɔdenle ‘wɔziezie’ ninyɛne bie mɔ dɛba. Mɔɔ wɔyɛ la ɛmaa Gyihova anye ɛlie ɛ nwo kpalɛ. Dwenle nwolɛ nea: Kɛ mɔɔ wɔzia wɔra Gyihova ɛkɛ la ati, ɔbahola yeava wɔ yeayɛ neazo yeahile abɔnsam kɛ ɔle adalɛ!—Mrɛ. 27:11.

Kɛ mɔɔ wɔyɛ ɛhye la ati, yemaa wɔbikye Gyihova kpalɛ na yebɔ ɛwɔkɛ kɛ ɔdaye noko ɔbabikye wɔ. (Gye. 4:8) Ɔle kpalɛ kɛ awie mɔ banwu kɛ wɔzia wɔra asafo ne anu, noko ɔwɔ kɛ ɛyɛ ninyɛne bie mɔ ɛboka nwo. Ɔwɔ kɛ ɛkɔ zo ɛmia ɛlɔlɛ mɔɔ ɛlɛ ɛmaa ɛ Ze nee ɛ Gɔnwo Gyihova la anu. Kɛ ɔkɛyɛ na wɔahola wɔayɛ ɛhye ɛ?

FA BODANE MƆƆ ƐBAHOLA WƆADWU NWO LA SIE Ɛ NYE ZO

Bɔ mɔdenle kɛ ɛbava bodane mɔɔ ɛbahola wɔadwu nwo la wɔazie ɛ nye zo. Bie a ɛtɛkakye ninyɛne mɔɔ wɔzukoa ye wɔ Gyihova nee kenle bie ɛwɔkɛ ngakyile ne mɔ anwo la. Noko ɔwɔ kɛ ɛyɛ ngyehyɛleɛ kpalɛ bieko wɔayɛ sunsum nu ninyɛne, na ɛhye bie a le ɛbahɔ daselɛlilɛ nee debiezukoalɛ dahuu na wɔanyia mekɛ ɛ nee ɛ mediema abɔ nu ayɛ ninyɛne. Suzu bodane ɛhye mɔ anwo.

Ɛ nee Gyihova ɛdendɛ dahuu. Ɛ Ze ne te ɔ bo kɛ saa wɔ adwenle kɔ zo bua wɔ fɔlɛ a ɔbamaa yeayɛ se kɛ ɛbayɛ asɔne. (Wlo. 8:26) Noko ‘kɔ zo yɛ asɔne’ na ka kɛzi ɛkulo kɛ ɛfa Gyihova agɔnwolɛ la anwo edwɛkɛ kile ye. (Wlo. 12:12) Andrej hanle kɛ: “Me adwenle buale me fɔlɛ kpole yɛɛ mendele nganeɛ kɛ mebɔ anyiemgba. Noko mekɛ biala mɔɔ mebayɛ asɔne la, nganeɛdelɛ zɔhane azo te. Me adwenle gyinlanle.” Saa ɛnnwu mɔɔ ɛyɛ nwolɛ asɔne a, suzu asɔne mɔɔ Belemgbunli Devidi mɔɔ ɔnlunle ɔ nwo yɛle mɔɔ bɛhɛlɛ ye wɔ Edwɛne 51 nee 65 la anwo.

Sukoa Baebolo ne dahuu. Ɛhye bamaa ɛ nwo ayɛ se wɔ sunsum nu na yeamaa ɛlɔlɛ mɔɔ ɛlɛ ɛmaa Gyihova la ayɛ kpole. (Edw. 19:7-11) Felipe hanle kɛ: “Kɛmɔ ɛnee menlɛ ngyehyɛleɛ kpalɛ mɔɔ medua zo meyɛ sunsum nu ninyɛne la ati, ɔmaanle menyɛle bɛtɛɛ na yeammaa meanli nɔhalɛ meammaa Gyihova. Ɛnee mengulo kɛ meyɛ nvonleɛ ko ne ala bieko, ɔti menzile kpɔkɛ kɛ mebamaa bɛtianwo debiezukoalɛ ahyia me.” Ɛdawɔ noko ɛbahola wɔayɛ zɔ. Saa ɛkpondɛ kɛ ɛnyia edwɛkɛtile ngakyile mɔɔ ɛbava wɔayɛ ɛ ti anwo debiezukoalɛ a, duzu ati a ɛmbiza ɛ gɔnwo bie mɔɔ ɛnyi sunsum nu la ɛmmaa ɔmboa wɔ ɛ?

Fa ɛ mediema mrenyia nee mraalɛ agɔnwolɛ bieko. Bɛdabɛ mɔɔ bɛsia bɛba asafo ne anu la bie mɔ suzu kɛ wɔannea a awie mɔ ɛnrɛnyia bɛ nwo adwenle kpalɛ. Larissa hanle kɛ: “Me ti zile aze kpalɛ. Mendele nganeɛ kɛ memaa mediema mɔɔ wɔ asafo ne anu la asa ɛzi aze. Ɔhyɛle kpalɛ na meaye me adwenle meavi zo.” Nyia anwodozo kɛ mgbanyima ne mɔ nee mediema mɔɔ bɛnyi sunsum nu la kulo kɛ bɛboa wɔ bɛmaa ɛ nee Gyihova siezie bɛ avinli. (Nea ɛlɛka “Duzu A Asafo Nu Mgbanyima Bahola Ayɛ A?”) Bɛ nye ɛlie kɛ wɔzia wɔra la na bɛkulo kɛ ninyɛne kɔ boɛ maa wɔ!—Mrɛ. 17:17.

Duzu a bahola aboa wɔ yeamaa wɔabikye asafo ne anu amra kpalɛ a? Fa ɛ nwo wula ninyɛne mɔɔ mediema ne mɔ yɛ la anu kpalɛ, kɔ debiezukoalɛ nee daselɛlilɛ dahuu. Kɛzi ɛhye baboa wɔ ɛ? Felix hanle kɛ: “Ɛnee asafo ne anu amra anye la kɛ mebazia meara. Mendele nganeɛ kɛ me nwo hyia bɛ. Bɛ muala bɛboale me bɛmaanle menwunle kɛ meraboka abusua ne anwo bieko, mendele nganeɛ kɛ bɛva me ɛtane bɛhyɛ me na ɔmaanle mengɔle me nyunlu.”—Nea ɛlɛka “Duzu A Ɛbahola Wɔayɛ A?”

MMAMAA Ɛ SA NU TO!

Saa ɛlɛsiezie ɛ nee Gyihova avinli a, Seetan bahɔ zo ava ngyegyelɛ dɔɔnwo ara ɛ nwo zo kɛ ɔmaa ɛ sa nu ado. (Luku 4:13) Siezie ɛ nwo kɛ ɛbamia ɛ nee Gyihova agɔnwolɛvalɛ ne anu.

Gyihova bɔle ye mboane ne mɔ anwo ɛwɔkɛ kɛ: “Mebakpondɛ mɔɔ ɛminli la, mebava mɔɔ ɛvo adenle la meara, mebabɔ mɔɔ ɛboda la bɔlɛ na meamaa mɔɔ anwo ɛbɛlɛ ye la anwosesebɛ.” (Yiz. 34:16) Gyihova ɛboa menli dɔɔnwo yemaa bɛ nee ye ɛnyia agɔnwolɛvalɛ kpalɛ bieko. Nyia anwodozo kɛ ɔkulo kɛ ɔboa wɔ ɔmaa ɛkɔ zo ɛ nee ye nyia agɔnwolɛvalɛ mɔɔ anu yɛ se la.