“Kɛkala Me Nye Die Ɛzonlenlɛ Gyima Ne Anwo!”

ƐNEE ME NYE ƐNLIE BIEKO

Alɔbɔlɛ edwɛkɛ ne a le kɛ, mɔɔ menlile kɛyɛ ɛvolɛ 13 la, kɛzi ɛnee mekulo Gyihova la bɔle ɔ bo kɛ ɔka aze. Ɛnee ɔzɔho kɛ me gɔnwo mɔ mɔɔ me nee bɛ kɔ sukulu la lɛ fanwodi kpole kpalɛ na ɛnee mekulo kɛ menyia zɔhane fanwodi ne bie. Mendele nganeɛ kɛ mɛla mɔɔ me awovolɛ di nee ngyinlazo mɔɔ yɛfa yɛbɔ yɛ ɛbɛla wɔ asafo ne anu la le kyengye somaa. Na menyianle adwenle kɛ Gyihova ɛzonlenlɛ le gyima ɛsesebɛ. Ɛnee medie medi dahuu kɛ Gyihova wɔ ɛkɛ noko meande nganeɛ kɛ mebikye ye.

Meangyakyi daselɛlilɛ ɛhɔlɛ bɔkɔɔ noko ɛnee mengɔ ye kpalɛ. Kenle mɔɔ mebaha kɛ mekɔ bie la, menziezie me nwo, ɔti ɔyɛ se kɛ mebabɔ adwelielilɛ bo anzɛɛ me nee awie badendɛ ahyɛ. Ɔlua ɛhye ati, ɛnee mengola menyɛ sia kɔkpɔla anzɛɛ Baebolo ɛzukoalɛ, ɔti ɛnee ɔmmaa me nye ɛnlie wɔ daselɛlilɛ nu na yemɔ akee ammaa me nye anlie ɛzonlenlɛ gyima ne anwo fee. Ɛnee mebiza me nwo kɛ, ‘Kɛ ɔkɛyɛ na awie ahɔ zo ali daselɛ dapɛne biala nee siane biala ɛ?’

Mɔɔ menlile ɛvolɛ 17 la, ɛnee mekulo kɛ mete me nwo. Ɔti mensesale me ninyɛne na menvile sua nu mengɔle Australia. Mɔɔ melɛkɔ la, ɔyɛle me awovolɛ nyane kpalɛ. Ɔgyegyele bɛ noko ɛnee bɛdie bɛdi kɛ mebahɔ zo meazonle Gyihova.

Mɔɔ mewɔ Australia la, akee me sunsum nu gyinlabelɛ ne zɛkyele bɔkɔɔ. Membɔle ɔ bo kɛ metoto debiezukoalɛ ɛhɔlɛ nu. Menvale mgbavolɛ nee mbɛlɛra mɔɔ le kɛ medame mɔɔ kɔ debiezukoalɛ ɛnɛ a, ɛhyema ɛnee bɛlɛkɔ bɛanlo nza na bɛazi agole bɛalielie bɛ nye la agɔnwolɛ. Saa meto me nye me nzi a, menwu kɛ ɛnee me gyakɛ ko wɔ nɔhalɛ ne anu yɛɛ ko gyi ewiade ne anu noko ɛnee nuhua biala ɛmmaa me nye ɛnlie.

MENYIANLE ƐZUKOALƐDEƐ TITILI BIE MƆƆ ƐNEE ME NYE ƐNLA

Kɛyɛ ɛvolɛ nwiɔ anzi, menyiale adiema raalɛ bie mɔɔ maanle mendwenlenle kɛzi melɛbɔ me ɛbɛla la anwo a. Noko ɛnee adiema raalɛ ne ɛnze ye zɔ. Ɛnee me nee mediema mraalɛ nnu mɔɔ bɛtɛgyale la a de ɛleka ko a, na yɛmaanle maangyebakyi zo neavolɛ ne nee ɔ ye Tamara ralile dapɛne ko wɔ yɛ sua nu ɛkɛ. Mekɛ mɔɔ Tamara ahu anye ɛbolo ɛlɛdi asafo ne anu gyimalilɛ ngakyile nwo gyima la, ɔ nee yɛ bɔ adawu na yɛsele. Me nye liele nwolɛ. Ɛnee ɔndu ɔ nwo fee yɛɛ ɔnyɛ se kɛ ɛ nee ye babɔ adawu. Ɛnee ɔyɛ me azibɛnwo kɛ awie mɔɔ yenyi sunsum nu zɛhae la anwo yɛ ɛzelekɛ zɔhane la.

Ɛnee Tamara anwo yɛ anyelielɛ kpalɛ. Kɛzi ɔkulo nɔhalɛ ne nee ɛzonlenlɛ gyima ne la, saa ɛ nee ye tu a zɔhane ala a ɛdawɔ noko ɛbayɛ a. Ɛnee ɔ nye die nwo kɛ ɔbayɛ biala mɔɔ ɔbahola la yeamaa Gyihova, noko mame ɛnee membɔ mɔdenle ɔti ɛnee me nye ɛnlie. Adwenle kpalɛ mɔɔ ɔlɛ wɔ Gyihova ɛzonlenlɛ nwo nee kɛzi ɛnee ɔ nye die la nyianle me nwo zo tumi. Ye neazo ne maanle mendwenlenle nɔhalɛ titili bie mɔɔ wɔ Baebolo ne anu la anwo: Gyihova kulo kɛ yɛ muala yɛfa “fɛlɛkolilɛ” nee ‘anyelielɛ yɛteɛdea nu’ yɛsonle ye.—Edw. 100:2.

KƐZI ME NYE LIELE ƐZONLENLƐ GYIMA NE ANWO BIEKO LA

Ɛnee mekulo kɛ me nye die kɛ Tamara la, noko saa ɔbayɛ boɛ a, ɔhyia kɛ meyɛ nzenzaleɛ mgbole bie mɔ. Tɛ ɛkɛ ne ala a mengakyile me subane a, noko membɔle ɔ bo kɛ meyɛ nzenzaleɛ ngyikyi ngyikyi. Membɔle ɔ bo kɛ mesiezie me nwo kolaa na meahɔ daselɛlilɛ yɛɛ ɔyɛ a meyɛ adekpakyelɛ boavolɛ. Ɛhye maanle mengolale menlile me ahonle mɔɔ ɔyɛ a ɔtu la azo na menyianle akɛnrasesebɛ. Kɛmɔ ɛnee meta mefa Baebolo ne medi gyima wɔ daselɛlilɛ nu la ati, ɔmaanle me nye liele daselɛlilɛ ɛhɔlɛ nwo. Yeangyɛ, ɛnee akee meyɛ adekpakyelɛ boavolɛ siane biala.

Membɔle ɔ bo kɛ mefa menli mɔɔ asolo bɛ ɛvolɛ, bɛlɛbɔ mɔdenle wɔ nɔhalɛ ne anu na bɛ nye die ɛzonlenlɛ mɔɔ bɛlɛfa bɛamaa Gyihova anwo la agɔnwolɛ. Bɛ neazo kpalɛ ne boale me maanle menzuzule ninyɛne mɔɔ hyia me kpalɛ wɔ ɛbɛlabɔlɛ nu la anwo na membɔle ɔ bo kɛ mekenga Baebolo ne kenle ko biala. Akee me nye liele daselɛlilɛ nwo kpalɛ na amozii, membanyɛle dahuu adekpakyelɛnli. Ɛvolɛ dɔɔnwo pɛle nu, noko mekɛ ɛhye a le mekɛ mɔɔ limoa mɔɔ me nye liele wɔ asafo ne anu na me ahonle dɔle me azule nu a.

MENYIANLE AWIE MƆƆ ME NEE YE BAYƐ DAHUU ADEKPAKYELƐ GYIMA NE DAHUU A

Ɛvolɛ ko anzi menyiale Alex, ɛnee ɔlɛ subane kpalɛ yɛɛ ɔkulo Gyihova nee ɛzonlenlɛ gyima ne. Ɛnee ɔle asafo nu sonvolɛ yɛɛ yeva ɛvolɛ nsia yeyɛ dahuu adekpakyelɛ gyima ne. Eza kɛmɔ ɛnee bɛhyia moalɛ kpole wɔ Malawi la ati, Alex hɔyɛle ɛzonlenlɛ gyima ne wɔ ɛkɛ wɔ mekɛ bie anu. Mɔɔ ɔwɔ ɛkɛ ne la, ɔ nee edwɛkpatɛvolɛma mɔɔ yɛle neazo kpalɛ maanle ye na bɛmaanle ye anwosesebɛ kɛ ɔhɔ zo ɔva Belemgbunlililɛ gyima ne ɔlimoa ye ɛbɛlabɔlɛ nu la dule.

Wɔ 2003, me nee Alex gyale, na yɛyɛ dahuu ɛzonlenlɛ gyima ne too yeradwu ɛnɛ. Yɛnyia ɛzukoalɛdeɛ dɔɔnwo na Gyihova ɛyila yɛ wɔ ndenle dɔɔnwo azo.

GYIHOVA YILALE YƐ BIEKO

Wɔ 2009, bɛkpale yɛ kɛ yɛhɔyɛ edwɛkpatɛvolɛma wɔ Timor-Leste, maanle ekyi bie mɔɔ boka Indonesia mbɔra ne mɔ anwo la azo. Ɔzinle yɛ nwo, yɛ nye liele noko mekɛ ko ne ala ɛnee yɛsulo. Siane nnu anzi, yɛhɔdwule maanle ne suakpole Dili azo.

Mɔɔ yɛhɔdwule ɛkɛ ne la, ɛnee ɔwɔ kɛ yɛyɛ nzenzaleɛ wɔ yɛ ɛbɛlabɔlɛ nu. Ɛnee ɔwɔ kɛ yɛsukoa amaamuo, aneɛ, nee asetɛnla fofolɛ yɛɛ aleɛ ngakyile ɛlilɛ. Saa yɛkɔ daselɛlilɛ a, yɛta yɛyia ehyianvolɛma, menli mɔɔ bɛangɔ sukulu nee menli mɔɔ bɛsisi bɛ la. Yɛɛ yɛnwunle menli mɔɔ konle nee basabasayɛlɛ ɛmaa bɛboda na bɛlɛdi nyane la.a

Ɛnee daselɛlilɛ yɛ anyelielɛ! Kɛ neazo la, kenle ko bie menyiale kakula raalɛ bie mɔɔ bɛfɛlɛ ye Mariab mɔɔ ɛli ɛvolɛ 13 na ɔlɛdi alɔbɔlɛ la. Ɛnee ye mame wule la ɛtɛkyɛle yɛɛ ɔnda ɔnnwu ye papa. Ɛnee Maria ɛnnwu mɔɔ ɔyɛ wɔ ye ɛbɛlabɔlɛ nu kɛ mɔɔ ngakula mɔɔ bɛ nee ye sɛ atipɛne de ala la. Mekakye kɛ mekɛ bie, ɔzunle wɔ mekɛ mɔɔ ɛnee ɔlɛka kɛzi ɔte nganeɛ la. Noko kɛmɔ ɛnee mende ye aneɛ ne kpalɛ la ati, ɛnee mende mɔɔ ɔlɛka la abo. Menzɛlɛle Gyihova kɛ ɔboa me ɔmaa memaa ye anwosesebɛ, akee membɔle ɔ bo kɛ mekenga ngɛlɛlera mɔɔ ɔbamaa ye anwosesebɛ la meahile ye. Ɛvolɛ ekyi guale nu la, menwunle kɛ nɔhalɛ ne ɛmaa Maria ɛhakyi ye subane, kɛzi ɔde nee ye ɛbɛlabɔlɛ. Bɛzɔnenle ye na kɛkala ɔdaye noko ɔ nee awie mɔ sukoa Baebolo ne. Ɛnɛ, Maria lɛ sunsum nu abusua kpole na ɔte nganeɛ kɛ bɛkulo ye.

Gyihova ɛlɛyila edwɛkɛhanlɛ gyima ne azo wɔ Timor-Leste. Bɛzɔnenle nolobɔlɛma ne anu dɔɔnwo wɔ ɛvolɛ bulu mɔɔ ɛze la anu, noko bɛ nuhua dɔɔnwo sonle kɛ adekpakyelɛma, asafo nu azonvolɛ anzɛɛ mgbanyima. Bɛ nuhua bie mɔ yɛ gyima wɔ edwɛbohilelɛ ɔfese ɛkɛ na bɛboa bɛmaa bɛkile yɛ mbuluku ne mɔ abo bɛkɔ bɛ sua zo aneɛ nu. Saa mete kɛ bɛlɛto edwɛne wɔ debiezukoalɛ bo, menwu kɛzi bɛ nloa anwo ɛyɛ ɛzelekɛ na bɛrayɛ Gyihova agɔnwo mɔ la a, ɔmaa me nye die kpole.

MEANZUZU KƐ ME NYE BALIE KPOLE ZƐHAE

Timor-Leste asetɛnla nee Australia ɛdeɛ ne ɛnle ko fee, noko meanzuzu kɛ me nye balie kpole zɛhae. Ɔdwu mekɛ ne bie a, yɛfo kale ekyi mɔɔ menli dɔɔnwo ɛyi nu na eza yeva fɛlɛ welera nee ninyɛne gyɛne wɔ gua nu lɔ la. Ɔyɛ a, yɛyɛ Baebolo ɛzukoalɛ wɔ sua ekyi mɔɔ anu dɔ, bɛtɛtole azɛlɛ ne anwo semante na ngɔkɔlɛ luolua ɛkɛ la anu. Noko ɔnva nwo ngyegyelɛ ɛhye mɔ, ɛnee meta meka kɛ, ‘Ɛhye yɛ anyelielɛ!’

Saa medwenledwenle mekɛ mɔɔ ɛze ɛhɔ la anwo a, me nye die kɛ me awovolɛ yɛle biala mɔɔ bɛbahola la bɛhilehilele me Gyihova ndenle ne mɔ wɔ mekɛ bɔbɔ mɔɔ ɛnee menyɛ dɔɔnwo memmaa Gyihova la. Edwɛkɛ mɔɔ wɔ Mrɛlɛbulɛ 22:6 la ɛyɛ nɔhalɛ wɔ me afoa nu. Me mame nee me papa anye die me nee Alex anwo; bɛ nye die kɛ Gyihova ɛlɛfa yɛ ali gyima la. Ɔvi 2016 mɔɔ ba la, yɛlɛyɛ maangyebakyi zo neavolɛ gyima ne wɔ Australasia ɔfese ne azɛlɛsinli ne anu.

Ɔsi me nwo kɛ mekɛ bie mɔɔ ɛze ɛhɔ la ɛnee me nye ɛnlie edwɛkɛhanlɛ gyima ne anwo la. Kɛkala me nye die ɛzonlenlɛ gyima ne anwo! Meranwu kɛ, ɔnva nwo mɔɔ bazi wɔ yɛ ɛbɛlabɔlɛ nu la, saa yɛ nye balie kpalɛ a, kyesɛ yɛfi yɛ ahonle muala anu yɛsonle Nyamenle. Nɔhalɛ nu, ɛvolɛ 18 mɔɔ me nee Alex ɛva ɛzonle Gyihova la ɛmaa me nye ɛlie ɛdɛla mekɛ biala. Bɔ zo mɔɔ menwu kɛ edwɛkɛ mɔɔ edwɛndolɛnli Devidi hanle hilele Gyihova la le nɔhalɛ a. Ɔhanle kɛ: “Menli mɔɔ nriandi kɔfea wɔ nu la kɔsɔɔti bali fɛlɛko; bɛbava anyelielɛ bɛadea nu dahuu. . . . Na bɛdabɛ mɔɔ bɛkulo wɔ duma ne la bɛali fɛlɛko wɔ wɔ nu.”—Edw. 5:11.