Ɔzelele Ɔhilele Bɛ La Ati Ɔ!

ƐNEE mbɛlɛra nwiɔ bie lua ɛleka bie mɔɔ gyima gyima wɔ la wɔ Baguio City mɔɔ wɔ Philippines la. Bɛnwunle ehwili bie mɔɔ bɛfa bɛyɛ bagua nu daselɛlilɛ la, noko bɛangɔ nwolɛ. Adiema raalɛ Helen mɔɔ ɛnee gyi ehwili ne anwo la zelele hilele bɛ. Mbɛlɛra ne mɔ angyinla, noko bɛ nye liele kɛzi Helen zelele hilele bɛ la anwo.

Nzinlii mɔɔ mbɛlɛra ne mɔ de kale nu ɛlɛkɔ sua nu la, bɛnwunle Belemgbunlililɛ Asalo bie mɔɔ bɛhɛlɛ jw.org sɛkɛlɛneɛ ne bie wɔ nwolɛ la. Bɛhakyele kɛ, bɛhɛlɛ deɛ ko ne ala bie wɔ ehwili ne mɔɔ bɛfa bɛyɛ bagua nu daselɛlilɛ mɔɔ bɛnwunle ye la anwo. Bɛdwule bɛvile kale ne anu na bɛhɔnleanle mekɛ mɔɔ asafo ngakyile mɔɔ yia wɔ Belemgbunlililɛ Asalo ɛkɛ ne la fa ba debiezukoalɛ la.

Mbɛlɛra nwiɔ ne hɔle debiezukoalɛ mɔɔ bɛbayɛ la anu ko. Mɔɔ bɛlɛwolo Belemgbunlililɛ Asalo ɛkɛ ne la, ɛze ahenle mɔɔ bɛnwunle ye la ɔ? Helen ɔ! Ɛkɛ ne ala bɛnwunle kɛ ɔdaye a ɔzelele ɔhilele bɛ la. Helen hanle kɛ, “Mɔɔ bɛlɛba me nwo ɛkɛ ne la, me ahonle dule ekyi. Ɛnee me adwenle yɛ me kɛ bie a meyɛ debie ɛtane bie.” Noko mbɛlɛra ne mɔ hanle hilele Helen kɛ, bɛnwunle ye wɔ ehwili ne anwo.

Bɛ nye liele debiezukoalɛ ne nee kɛzi mediema ne mɔ liele bɛ la anwo; bɛande nganeɛ kɛ bɛle nyɛvolɛ. Mɔɔ bɛkpɔnenle debiezukoalɛ na bɛnwunle kɛ awie mɔ ɛlɛsiezie Belemgbunlililɛ Asalo ɛkɛ ne la, bɛbizale kɛ saa bɛbahola bɛaboa a. Mbɛlɛra ne mɔ ko ɛdu ɛvi maanle ne anu noko ko ne kɔ debiezukoalɛ yɛɛ yebɔ Baebolo ɛzukoalɛ bo. Kɛmɔ ɔzelele ɔhilele bɛ la ati a ɔrale ye zɔ a!