YƐ KILISIENE ƐBƐLABƆLƐ
Asoo Wɔziezie Ɛ Nwo Kpalɛ Wɔmaa Ngyegyelɛ Mekɛ Ɔ?
Saa ninyɛne nu yɛ se wɔ ewiade amuala bɔbɔ a, yɛmmaa ɔngyegye yɛ somaa. Duzu ati ɔ? Ɔluakɛ yɛde mekɛ mɔɔ li awieleɛ wɔ awieleɛ mekɛ ɛhye anu la anu yɛɛ Baebolo ne ɛbɔ yɛ kɔkɔ kɛ yɛmmafa yɛ nye yɛto “anwonyia mɔɔ sɛkye la” azo. (1Ti 6:17; 2Ti 3:1) Duzu a Belemgbunli Gyɛhɔhyafate neazo ne kilehile yɛ wɔ yɛ nwo mɔɔ ɔwɔ kɛ yɛsiezie yɛmaa ngyegyelɛ mekɛ la anwo a?
Mɔɔ agbɔvolɛma nwunlonwunlanle Gyɛhɔhyafate la, ɔvale ɔ nwo ɔdole Gyihova anwo zo. (2Ek 20:9-12) Eza ɔbɔle azuamgbole mɔɔ bɛlie nwolɛ bane la anwo bane na ɔyɛle sogyama azokoɛleɛ ɔvale ɔzieziele ɔ nwo. (2Ek 17:1, 2, 12, 13) Yɛdayɛ noko yɛbahola yɛava yɛ nwo yɛado Gyihova anwo zo na yɛayɛ ninyɛne bie mɔ yɛava yɛaziezie yɛ nwo yɛamaa ngyegyelɛ mekɛ kɛ mɔɔ Gyɛhɔhyafate yɛle la.
NEA WƆZIEZIE Ɛ NWO KPALƐ WƆMAA ESIANE MEKƐ Ɔ? VIDIO NE NA BUA KPUYA ƐHYE MƆ:
Duzu a yɛbahola yɛayɛ yɛava yɛaziezie yɛ nwo yɛamaa esiane mekɛ a?
Saa yɛbahola yɛaboa awie mɔ a, duzu a ɔwɔ kɛ yɛdimoa yɛyɛ yɛsiezie yɛ nwo a?