Dua Nyia Anyelielɛ Dahuu! Buluku Ne Azo Mia Diedi Mɔɔ Ɛlɛ Ye Wɔ Gyihova Nee Gyisɛse Anu La Anu

Saa yɛ Baebolo sukoavoma bahola ayɛ ninyɛne mɔɔ Gyihova kulo la a, ɔwɔ kɛ bɛnyia diedi mɔɔ anu yɛ se la. (Hi 11:6) Yɛbahola yɛalua Nyia Anyelielɛ Dahuu! buluku ne azo yɛaboa bɛ yɛamaa bɛayɛ zɔ. Ngɛlɛlera titili, ngilenu mɔɔ fɛta, kpuya kpalɛ, vidio ngakyile nee nvoninli ngɛnlɛma a wɔ buluku ɛhye anu a. Yɛfa ninyɛne mɔɔ senle ɛngola ɛnzɛkye bɛ la yɛto adiabo ne ɔlua yɛ sukoavoma mɔɔ yɛbaboa bɛ yɛamaa bɛanyia Kilisiene subane ngɛnlɛma na bɛ nee Nyamenle anyia agɔnwolɛvalɛ kpalɛ la azo.​—1Kɔ 3:12-15.

Ɔyɛ se ɔmaa menli bie mɔ kɛ bɛbalie bɛali kɛ bɛbahola bɛava Nyamenle mɔɔ bɛnva bɛ nye bɛnnwu ye la agɔnwolɛ. Ɔwɔ kɛ yɛboa bɛ yɛmaa bɛnyia yɛ ɛlɔlɛ selɛ ne subane ngɛnlɛma ne mɔ anu diedi.

NEA DUA “NYIA ANYELIELƐ DAHUU!” BULUKU NE AZO MIA DIEDI MƆƆ ƐLƐ YE WƆ GYIHOVA ANU LA ANU VIDIO NE NA BUA KPUYA ƐHYE MƆ:

• Kɛzi yɛkola yɛnwu ye kɛ adiema raalɛ ne zieziele ɔ nwo kpalɛ maanle debiezukoalɛ ne ɛ?

• Kɛzi adiema raalɛ ne vale kpuya ngakyile lile gyima boale ye sukoavo ne ɔmaanle ɔlale kɛzi ɔte nganeɛ wɔ Ayezaya 41:10, 13 ne anwo ɛ?

• Kɛzi vidio ne nee Baebolo tɛkese ne hanle sukoavo ne ɛ?

Menli dɔɔnwo ɛnde mɔɔ ɛkpɔnedeɛ ne kile la abo anzɛɛ bɛnlie bɛnli kɛ ɔle ahyɛlɛdeɛ mɔɔ Nyamenle ɛva ɛmaa bɛ a. (Ga 2:20) Ɔti ɔwɔ kɛ yɛboa bɛ yɛmaa bɛnyia diedi wɔ Gyisɛse ɛkpɔnedeɛ afɔle ne anu.

NEA DUA “NYIA ANYELIELƐ DAHUU!” BULUKU NE AZO MIA DIEDI MƆƆ ƐLƐ YE WƆ GYISƐSE ANU LA ANU VIDIO NE NA BUA KPUYA ƐHYE MƆ:

• Kɛzi yɛkola yɛnwu ye kɛ adiema nrenyia ne zieziele ɔ nwo kpalɛ maanle debiezukoalɛ ne ɛ?

• Kɛzi ɔvale edwɛkɛ mɔɔ wɔ “Kpondɛ Dɔɔnwo” foa ne la ɔboale ye sukoavo ne ɛ?

• Duzu ati a ɛnee ɔhyia kpalɛ kɛ ɔyɛ asɔne ɔmaa sukoavo ne a?