Fa Nyia Anyelielɛ Dahuu! Buluku Ne Di Gyima Wɔ Daselɛlilɛ Nu

Yɛ nye ɛlie kpalɛ kɛ yɛnyia brohyua nee buluku fofolɛ mɔɔ yɛbava yɛayɛ Baebolo ɛzukoalɛ la a! Yɛsɛlɛ Gyihova kɛ ɔyila yɛ mɔdenlebɔlɛ zo ɔmaa menli dɔɔnwo ɛrayɛ ye ɛdoavolɛma. (Mt 28:18-20; 1Kɔ 3:6-9) Kɛzi yɛbava mbuluku fofolɛ ɛhye mɔ yɛali gyima ɛ?

Kɛmɔ Nyia Anyelielɛ Dahuu! sukoa Baebolo ne buluku ne bamaa yɛalua ndenle ngakyile zo yɛahilehile la ati, ɔhyia kɛ ɛfa adehilelɛ ɛhye mɔ ɛdi gyima wɔ mekɛ mɔɔ ɛlɛsiezie ɛ nwo nee mekɛ mɔɔ ɛlɛyɛ Baebolo ɛzukoalɛ ne la.a

• Bɛgenga edwɛkɛ ne na bɛzuzu kpuya ne mɔ anwo

• Bɛgenga ngɛlɛlera ne mɔɔ bɛhile kɛ “bɛgenga” la na boa sukoavo ne maa ɔnwu kɛzi ɔbava yeayɛ gyima la

• Bɛnlea vidio ne mɔ na bɛva kpuya mɔɔ boka nwo la bɛzuzu nwolɛ

• Bɛbɔ mɔdenle kɛ saa bɛyia a, bɛbawie ɛzukoalɛdeɛ ko

Wɔ daselɛlilɛ nu, amaa wɔanwu ye kɛ awie anye die nwo la, dimoa fa brohyua ne maa ye. (Nea ɛlɛka “Kɛzi Bɛfa Nyia Anyelielɛ Dahuu! Brohyua Ne Bɛmaa Wɔ Ɛkpɔlalɛ Mɔɔ Limoa Anu La.”) Saa bɛsukoa brohyua ne bɛwie na sukoavo ne lɛ ɛhulolɛ kɛ ɔbadoa zolɛ a, akee fa buluku ne maa ye na bɛbɔ ɔ bo wɔ ɛzukoalɛdeɛ 04 ne. Saa ɛ nee awie ɛlɛsukoa yɛ mbuluku ne mɔ ko a, kakyi debiezukoalɛ ne kɔ Nyia Anyelielɛ Dahuu! buluku ne anu na si ɛleka mɔɔ bɛbabɔ ɔ bo la anwo kpɔkɛ.

NEA AKOABA BA WƆ BAEBOLO ƐZUKOALƐ NE ABO VIDIO NE NA BUA KPUYA ƐHYE MƆ:

• Duzu a sukoavoma bazukoa ye wɔ buluku fofolɛ ɛhye anu a?

• Kɛmɔti a ɔwɔ kɛ ɛye vidio ɛhye ɛkile sukoavoma fofolɛ ɛ?

• Bodane boni mɔ a ɔwɔ kɛ ɛmaa sukoavo ne anwosesebɛ ɛmaa ɔfa ɔsie ɔ nye zo na ɔdwu nwo a? —Nea ɛlɛka “Foa Biala Edwɛkɛ Titili Nee Ye Bodane”