Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Di Suamenle Mɔɔ Vea Sua Nu La Daselɛ

DEƐMƆTI ƆHYIA LA: Ɔlua nwulema mɔɔ gyegye adwenle la ati, menli dɔɔnwo sulo kɛ bɛbabuke bɛ nlenkɛ ne mɔ bɛamaa awie mɔɔ bɛnze ye la. Wɔ azuamgbole bie mɔ azo, menli bie mɔ lɛ kamela nee anlenkɛ nloa milahyinli mɔɔ bɛdua zo bɛdi adwelie la wɔ bɛ sua nu. Bie a, ɛzulolɛ baha yɛ wɔ mekɛ mɔɔ yɛlɛdi awie mɔɔ yɛnnwu ye la daselɛ la. Ngakyelɛ ɛhye mɔ mɔɔ doɔdoa zo la baboa yɛ yeamaa yɛanyia anwodozo wɔ mekɛ mɔɔ yɛlɛdi menli mɔɔ vea sua nu daselɛ la.

KƐZI BƐYƐ YE LA:

• Nyia adwenle kpalɛ. Suamenlema mɔɔ bɛvea bɛ azua nu la bie mɔ lɛ ɛhulolɛ kɛ bɛ nee yɛ bɛali adwelie

• Kakye kɛ, saa ɛwolo aako ne anu na ɛtɛmianle dɔne ne azo bɔbɔ a, suamenle ne kola nwu debie biala mɔɔ ɛlɛyɛ la na ɔte edwɛkɛ biala mɔɔ ɛkɛha la

• Saa suamenle ne die zo ala a, tendɛ kile ye kɛ asɛɛ ɔgyi ɛ nyunlu a ɛlɛtendɛ ala la. Sele wɔ agɔnwolɛvalɛ adenle zo na ka edwɛkɛ mɔɔ saa anrɛɛ ɔgyi ɛ nyunlu a, ɛbaha la. Saa ɔlɛ kamela noko a, mmafa ɛ nyunlu ɛbikye ye somaa

• Saa ɛdi daselɛ ɛwie bɔbɔ a, nea boɛ wɔ mɔɔ ɛbayɛ nee mɔɔ ɛbaha la anwo, ɔluakɛ suamenle ne bade. Nea boɛ wɔ mɔɔ ɛbaha wɔahile ahenle mɔɔ ɛ nee ye lua la anwo