Kɛzi Ɛbava Adwelielilɛ Nwo Neazo Ne Wɔali Gyima La

Ɔvi January 2018 mɔɔ ba la, adwelielilɛ nwo neazo finde Yɛ Kilisiene Ɛbɛlabɔlɛ Nee Yɛ Ɛzonlenlɛ​—Nyianu Buluku ne anyunlu. Kɛzi ɔwɔ kɛ yɛfa yɛdi gyima ɛ?

Sukoavo Gyimalilɛ: Saa bɛmaa wɔ sukoavo gyimalilɛ a, ɔwɔ kɛ ɛfa kpuya, ngɛlɛlera yɛɛ kpuya bieko mɔɔ ɔwɔ adwelielilɛ nwo neazo ne anu la ɛdi gyima. Noko akee, ɛhye ɛngile kɛ ɔwɔ kɛ ɛka adwelielilɛ nwo neazo vidio ne anu edwɛkɛ ne pɛpɛɛpɛ. Dua adenle ngakyile zo buke wɔ edwɛkɛ ne anye, kilehile nu nee mɔɔ bokɛboka nwo la. Saa bɔbɔ bɛanga kɛ ɛva buluku bie ɛmaa a, ɛbahola wɔava Ninyɛne Titili Mɔɔ Yɛfa Yɛkilehile la bie wɔamaa.

Wɔ Daselɛlilɛ Nu: Adwelielilɛ nwo neazo ne boa maa yɛnyia nzuzulɛ ngakyile mɔɔ yɛbahola yɛava yɛali gyima la. Saa awie kile nwolɛ anyelielɛ na ɔkulo kɛ ɔsukoa dɔɔnwo a, ɛbahola wɔava sia kɔkpɔla nwo neazo ne wɔali gyima. Ɛbahola wɔahakyi adwelielilɛ nwo neazo ne anu anzɛɛ wɔaha edwɛkɛ fofolɛ. Bie a azɛlɛsinli ne anu amra anye balie siane mɔɔ ɛze la edwɛkɛtile ne anwo kpalɛ. Anzɛɛ bie a wɔ kpalɛzoamra anye die edwɛkɛ mɔɔ ɛzi anzɛɛ amaneɛbɔlɛ nwo. Ɔnva nwo nuhua biala mɔɔ ɛkulo kɛ ɛfa ɛdi gyima la, yɛ bodane a le kɛ ‘edwɛkpa ne ati a yɛyɛ ninyɛne kɔsɔɔti a, amaa yɛabɔ ye nolo yɛahile awie mɔ.’​—1Kɔ 9:22, 23.