Fa Vidio Kilehile Wɔ Baebolo Sukoavoma

Nvoninli maa awie fa ye adwenle sie debie bie azo na ɔboa ye ɔmaa ɔte ɔ bo na ɔkakye mɔɔ yezukoa la. Gyihova, Yɛ Kilehilevolɛ Kpole Kpalɛ ne vale lile gyima hilehilele ɛzukoalɛdeɛ mɔɔ anwo hyia la anu. (Mɔ 15:5; Gyɛ 18:1-6) Gyisɛse, Kilehilevolɛ Kpole ne noko vale nvoninli lile gyima. (Mt 18:2-6; 22:19-21) Nvoninli ɛhye mɔ mɔɔ ɛlɛboa kpalɛ kenle nsa ye la bie a le vidio. Ɛfa vidio ɛdi gyima kpalɛ wɔ mekɛ mɔɔ ɛlɛkilehile wɔ Baebolo sukoavoma la ɔ?

Bɛyɛ vidio bulu mɔɔ baboa yɛ yeamaa yɛahilehile ɛzukoalɛdeɛ mɔɔ wɔ Edwɛkpa Mɔɔ Vi Nyamenle Ɛkɛ brohyua ne anu la anu. Vidio ko biala edwɛkɛtile ne nee kpuya ne mɔ mɔɔ bɛyɛ bɛ bile wɔ ɛzukoalɛdeɛ ne anu la ko yia. Brohyua ne mɔɔ wɔ jw.org azo la lɛ links mɔɔ kakye yɛ mekɛ mɔɔ ɔwɔ kɛ yɛye vidio ko biala la. Bieko, yɛlɛ vidio ngakyile mɔɔ yɛbahola yɛava yɛaboka Ninyɛne Titili Mɔɔ Yɛfa Yɛkilehile la anwo yɛahilehile a.

Ɛ nee wɔ sukoavo bie ɛlɛsuzu Baebolo nu edwɛkɛtile bie mɔɔ bie a ɔyɛ se kɛ ɔbade ɔ bo la anwo ɔ? Anzɛɛ wɔ sukoavo ne ɛlɛyia sɔnea kpɔtee bie ɔ? Neɛnlea vidio mɔɔ wɔ jw.org® yɛɛ JW Broadcasting® azo la anu na kpa nuhua ne mɔɔ ɔbaboa ye la. Bie a, ɛ nee wɔ sukoavo ne bahola abɔ nu anlea vidio ɛhye mɔ anu ko na akee bazuzu nwolɛ.

Siane biala bɛye vidio fofolɛ. Saa ɛlɛnea vidio ɛhye mɔ a, dwenle adenle mɔɔ ɛbahola wɔalua zo wɔava wɔahilehile awie mɔ la anwo.