Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Pɛ Baebolo Ɛzukoalɛ Mɔɔ Ɛnzo Ma La Azo

DEƐMƆTI ƆHYIA LA:Ɔwɔ kɛ menli bɔ Gyihova duma ne amaa bɛlie bɛ ngoane. (Wlo 10:13, 14) Noko, tɛ awie biala mɔɔ kɛlie Baebolo ɛzukoalɛ kɛdo nu la a kulo kɛ ɔfa Gyihova ngyinlazo ne mɔ ɔbɔ ye ɛbɛla a. Yɛfa yɛ mekɛ yɛdi gyima kpalɛ wɔ daselɛlilɛ nu yɛboa menli mɔɔ kulo kɛ bɛyɛ nzenzaleɛ amaa bɛayɛ mɔɔ sɔ Gyihova anye la. Saa mekɛ ekyi gua nu na yɛnwu kɛ Baebolo sukoavo bie ɛnnyia anyuhɔlɛ kpalɛ biala a, nrɛlɛbɛ wɔ nu kɛ yɛbapɛ debiezukoalɛ ne azo na yɛava yɛ mekɛ yɛaboa bɛdabɛ mɔɔ Gyihova ɛlɛtwe bɛ ara ɔ nwo yɛɛ ye ahyehyɛdeɛ ne anu la. (Dwn 6:44) Saa ahenle da ye ali nzinlii kɛ ye ‘subane kile kɛ ɔfɛta dahuu ngoane’ a, yɛfi anyelielɛ nu yɛbɔ Baebolo ɛzukoalɛ ne abo bieko.​—Gyi 13:48.

KƐZI BƐYƐ YE LA:

• Kanvo sukoavo ne wɔ ɛhulolɛ mɔɔ yenyia kɛ ɔbanyia nɔhalɛ ndelebɛbo la.​—1Ti 2:4

• Si deɛmɔti ɔhyia kɛ ɔfa mɔɔ ɔlɛsukoa la ɔyɛ gyima la azo.​—Lu 6:46-49

• Fi atiakunlukɛnlɛma nu ɛ nee ye ɛzuzu Gyisɛse ma ɛlualɛ ɛrɛlɛ ne anwo, na maa ɔdwenledwenle deɛmɔti ɔnnyia anyuhɔlɛ la anwo.​—Mt 13:18-23

• Dua nrɛlɛbɛ adenle zo kile ye deɛmɔti ɛlɛpɛ debiezukoalɛ ne azo la

• Maa ɔnwu ye kɛ ɔyɛ a ɛbarakpɔla ye wɔamaa ye anwosesebɛ na saa kenle bie ɔyɛ nzenzaleɛ a, bɛbabɔ debiezukoalɛ ne abo bieko

NEA VIDIO NE, NA AKEE BUA KPUYA ƐHYE MƆ:

• Duzu a ɛyɛlɛ ye nzonlɛ wɔ bɛ adawubɔlɛ ne anu mɔɔ kile kɛ sukoavo ne ɛngɔ ɔ nyunlu wɔ sunsum nu a?

• Kɛzi adiema nrenyia ne boale sukoavo ne na ɔmaanle ɔnwunle deɛmɔti ɔhyia kɛ ɔyɛ nzenzaleɛ la ɛ?

• Kɛzi Adiema nrenyia ne maanle suamenle ne dele nganeɛ kɛ saa kenle bie ɔkulo kɛ ɔsia ɔsukoa a, ɔbahola yeayɛ ye zɔ ɛ?