Bɛlɛdi daselɛ wɔ Monrovia mɔɔ wɔ Liberia la

Edwɛkɛ Mɔɔ Yɛbaha La Neazo

●○○ ƐKPƆLALƐ MƆƆ LIMOA

Kpuya: Asoo nvasoɛ wɔ Baebolo ne azo ɛnɛ ɔ?

Ngɛlɛlera: 2Ti 3:16

Kpuya Bieko: Duzu edwɛkɛ a wɔ Baebolo ne anu a?

○●○ SIA KƆKPƆLA MƆƆ LIMOA

Kpuya: Duzu edwɛkɛ a wɔ Baebolo ne anu a?

Ngɛlɛlera: Mt 6:10

Kpuya Bieko: Duzu a Nyamenle Belemgbunlililɛ ne bayɛ a?

○○● SIA KƆKPƆLA MƆƆ TƆ ZO NWIƆ

Kpuya: Duzu a Nyamenle Belemgbunlililɛ ne bayɛ a?

Ngɛlɛlera: Da 2:44

Kpuya Bieko: Kɛzi ɛhye baha azɛlɛ ne ɛ?

Ɔbɔ ye siane ɛhye mɔɔ kɔ la, edwɛkɛ mɔɔ yɛbaha la neazo nsa ne mɔɔ yɛbava yɛali gyima la ɛnrɛyɛ kɛ dɛba ne la. Emomu, yɛbava mukenye kpuya, ngɛlɛlera yɛɛ kpuya bieko mɔɔ babuke adenle yeamaa sia kɔkpɔla bieko la a yɛali gyima wɔ foa ɛhye mɔɔ finde Yɛ Ɛbɛlabɔlɛ Nee Yɛ Ɛzonlenlɛ Nyianu Buluku ne anu a. Wɔ dapɛne ne anu yɛbanlea Edwɛkɛ mɔɔ yɛbaha la neazo ne anwo vidio ko. Nolobɔlɛnli biala bahola akpa mbuluku mɔɔ yɛfa yɛkilehile la anu ko mɔɔ ɔbava yeayɛ ye gyimalilɛ ne la—wɔ ɛkpɔlalɛ mɔɔ limoa anzɛɛ wɔ sia kɔkpɔla foa ne. Eza nyianu buluku ne banyia kpuya nwiɔ mɔɔ yɛbahola yɛava yɛayɛ sia kɔkpɔla a. Ɛhye bamaa yɛadwu bodane mɔɔ yɛlɛ kɛ yɛkilehile “bɛdabɛ mɔɔ bɛ subane kile kɛ bɛfɛta dahuu ngoane la” anwo.—Gyi 13:48.

Sukoavoma Gyimalilɛ: Ɔwɔ kɛ sukoavoma fa edwɛkɛ mɔɔ yɛbaha la neazo ne di gyima, kyesɛ bɛhile ye ngakyile.