Kɛzi Yɛbala Ɛlɔlɛ Ali Yɛahile Yɛ Gɔnwo Mɔ La

Kɛmɔ yɛ muala yɛle Adam abozoamra la ati yɛle abusua ko. Ɔwɔ nuhua kɛ ɔwɔ kɛ menli mɔɔ wɔ abusua ko anu la da ɛlɔlɛ nee ɛbulɛ ali kile bɛ nwo, noko ɛnɛ yɛnnwu ye zɔ. Tɛ ɛhye a Nyamenle kpondɛ a.

MƆƆ NGƐLƐLERA NWUANZANWUANZA NE KA YE WƆ ƐLƆLƐ NWO LA

“Ɔwɔ kɛ ɛkulo ɛ gɔnwo kɛ ɛ nwo.”​—LƐVITIKƆSO 19:18.

“Bɛhɔ zo bɛhulo bɛ kpɔvolɛma.”​—MATEYU 5:44.

MƆƆ YƐYƐ YƐKILE KƐ YƐKULO YƐ GƆNWO MƆ LA

Nea kɛzi Nyamenle ɛha ɛlɔlɛ nwo edwɛkɛ wɔ ye Edwɛkɛ ne anu wɔ 1 Kɔlentema 13:4-7 la:

“Ɛlɔlɛ lɛ abotane yɛɛ ɔ ti akunlu le kɛnlɛma.”

Dwenle Nwo: Saa ɛfo awie na ɔda abotane yɛɛ atiakunlukɛnlɛma ali ɔkile wɔ a, kɛzi ɛte nganeɛ ɛ?

“Ɛlɔlɛ ɛndwe nungule.”

Dwenle Nwo: Saa awie mɔ adwenle yɛ bɛ kesee wɔ debie biala mɔɔ ɛbayɛ la anwo anzɛɛ anye bolo wɔ a, kɛzi ɛte nganeɛ ɛ?

Ɛlɔlɛ ɛnle “angomedi.”

Dwenle Nwo: Saa awie mɔ fi bɛ ɛhulolɛ nu die wɔ nzuzulɛ to nu na bɛnyɛ kyengye wɔ bɛ nzuzulɛ nwo a, kɛzi ɛte nganeɛ ɛ?

Ɛlɔlɛ ‘ɛnva ɛtane ɛnzie ye nu.’

Dwenle Nwo: Nyamenle fi ye ɛhulolɛ nu fa menli mɔɔ nu bɛ nwo la ɛtane kyɛ bɛ. “Ɔnrɛkpondɛ yɛ nwo nvonleɛ dahuu, yɛɛ ɔnrɛva yɛ nwo ɛya ɔnrɛzie ye nu.” (Edwɛne 103:9) Saa yɛfo awie na ɔfa yɛ ɛtane ɔkyɛ yɛ a, yɛ nye die kpalɛ. Ɔti ɔwɔ kɛ yɛyɛ ye ndɛ yɛfa awie mɔ ɛtane yɛkyɛ bɛ.​—Edwɛne 86:5.

Ɛlɔlɛ anye “ɛnlie ninyɛndane nwo.”

Dwenle Nwo: Saa edwɛkɛ ɛtane bie to yɛ a, yɛngulo kɛ awie mɔ bali nwolɛ fɛlɛko. Ɔti yɛnli fɛlɛko wɔ mekɛ mɔɔ edwɛkɛ ɛtane kɛdo awie mɔ la, saa bɔbɔ bɛ nee yɛ anli ye boɛ a.

Amaa wɔanyia Nyamenle nyilalɛ la, ɔwɔ kɛ ɛkulo awie mɔ ɔnva nwo kɛzi bɛde la. Adenle ko mɔɔ yɛbahola yɛalua zo yɛayɛ zɔ la a le kɛ yɛbaboa menli mɔɔ bɛhyia la.